ഇതാണ് മിന്നും വിജയം.... അപകടത്തില്‍ പരുക്കേറ്റിട്ടും   വിധിയോട് പൊരുതി 72-ാം വയസ്സില്‍ ഭാര്യയോടൊപ്പം പന്ത്രണ്ടാം തരം തുല്യതാ പരീക്ഷയില്‍ വിവിധ വിഷയങ്ങളില്‍ എ പ്ലസോടെ വിജയം നേടി മുന്‍ സൈനികന്‍

ഓച്ചിറ ചങ്ങന്‍കുളങ്ങര കണ്ണമത്ത്തറ കൗസ്തുഭവത്തില്‍ രമണന്‍ (72) ഭാര്യ പത്മിനി (61) എന്നിവരാണ് മിന്നും വിജയം കരസ്ഥമാക്കിയത്. ജില്ലയിലെ ഏറ്റവും പ്രായം കൂടിയ പഠിതാവാണു രമണന്‍.

1967 -ല്‍ എസ്എസ്എല്‍സി പാസായ രമണന് അടുത്തവര്‍ഷം തന്നെ സിആര്‍പിഎഫില്‍ സെലക്ഷന്‍ ലഭിച്ചു. തുടര്‍ന്ന് 15 വര്‍ഷം സൈന്യത്തിന്റെ ഭാഗമായി രാജ്യ സേവനം നടത്തി. പിന്നീട് വിദേശത്ത് പല ജോലികളിലും ഏര്‍പ്പെട്ടിരുന്നു. തിരികെ നാട്ടിലെത്തിയതിനു ശേഷം വിവിധ കമ്പനികളില്‍ സുരക്ഷാ ഉദ്യോഗസ്ഥനായി.

ഭാര്യ പത്മിനി എല്‍ഐസി ഏജന്റായി ജോലി നോക്കുകയാണ്. ഇതിനിടയില്‍ ഭാര്യയെ സഹായിക്കാനായി രമണനും ഭാര്യയോടൊപ്പം ഫീല്‍ഡ് വര്‍ക്കിനു പോകാന്‍ തുടങ്ങി.

കോവിഡ് കാലത്താണ് ഓച്ചിറ ബ്ലോക്ക് പഞ്ചായത്ത് തുല്യത കേന്ദ്രത്തിലെ കോഓര്‍ഡിനേറ്റര്‍ ശ്രീലേഖ 12-ാം തരം തുല്യത കോഴ്‌സിനു പഠിക്കാനായി ആഗ്രഹമുള്ളവരെ തേടി എത്തുന്നത്. തുടര്‍ന്ന് ഇരുവരും കൃത്യമായി ക്ലാസുകളില്‍ പങ്കെടുത്തു. അറിവു നേടാനുള്ള മാതാപിതാക്കളുടെ ആഗ്രഹത്തെ മക്കളായ പ്രിന്‍സും പ്രിയങ്കയും കൊച്ചുമക്കളും പ്രോത്സാഹിപ്പിച്ചതോടെ ഇരുവരും പഠനവുമായി മുന്നേറി.

പരീക്ഷയ്ക്ക് രണ്ടു മാസം മുന്‍പ് അപകടത്തില്‍ രണ്ടു പേര്‍ക്കും പരുക്കേറ്റിരുന്നു. ആശുപത്രിയില്‍ ചികിത്സയില്‍ ആയിരുന്നപ്പോഴും അവര്‍ മത്സരിച്ചു പഠിച്ചു. ഓച്ചിറ ഗവ.എച്ച്എസ്എസിലാണ് പരീക്ഷ എഴുതിയത്. ഫലം വന്നപ്പോള്‍ മിക്ക വിഷയങ്ങളില്‍ എപ്ലസ് നേടി രമണനും പത്മിനിയും വിജയിച്ചു. ഓച്ചിറ ബ്ലോക്ക് പഞ്ചായത്തില്‍ നിന്നു പരീക്ഷ എഴുതിയ 30 പേരില്‍ 29 പേരും വിജയിച്ചു. സംസ്ഥാന തലത്തിലും രമണന്‍ മുന്നിലെത്തുമെന്നാണ് പ്രതീക്ഷ.