എതിരാളികളെ പൂട്ടിട്ട് മിസ്ത്രി... മുന്കാല കോണ്ഗ്രസ് ചരിത്രം ശശി തരൂരിന് ആവേശമാകുന്നു; മുന്കാലത്ത് ഔദ്യോഗിക സ്ഥാനാര്ത്ഥികള് തോറ്റത് ചര്ച്ചയാകുന്നു; ശശി തരൂരിനെതിരെ നിലപാടടെടുത്ത പിസിസികള്ക്ക് കനത്ത തിരിച്ചടി; പക്ഷം ചേരണമെങ്കില് നേതാക്കള് പദവി ഒഴിയണമെന്ന് മിസ്ത്രി
ശശി തരൂരിന് ഏറെ പ്രതീക്ഷ നല്കി മുന്കാല കോണ്ഗ്രസ് ചരിത്രം. ഔദ്യോഗിക സ്ഥാനാര്ഥിയുടെ പരിവേഷം ഖര്ഗെയ്ക്കുണ്ടെങ്കിലും കോണ്ഗ്രസ് ചരിത്രത്തിലെ 2 സംഭവങ്ങളില് തരൂരിനു പ്രതീക്ഷയര്പ്പിക്കാം - 1939 ല് മഹാത്മാ ഗാന്ധിയുടെ പിന്തുണയോടെ പ്രസിഡന്റ് സ്ഥാനത്തേക്കു മത്സരിച്ച പട്ടാഭി സീതാരാമയ്യയെ സുഭാഷ് ചന്ദ്രബോസ് തോല്പിച്ചു. 1950 ല് പ്രധാനമന്ത്രി ജവാഹര്ലാല് നെഹ്റുവിന്റെ സ്ഥാനാര്ഥി ആചാര്യ കൃപലാനി എതിരാളിയായ പുരുഷോത്തം ദാസ് ടണ്ഠനോടു തോറ്റു.
ശക്തമായ പ്രചരണമാണ് ശശി തരൂര് നടത്തുന്നത്. കോണ്ഗ്രസ് പ്രസിഡന്റ് തിരഞ്ഞെടുപ്പില് ഹൈക്കമാന്ഡിന്റെ പിന്തുണയില്ലെങ്കിലും ശക്തമായ പ്രചാരണത്തിലൂടെ കളംപിടിക്കാന് ശശി തരൂര്. ഔദ്യോഗിക പക്ഷത്തെ ഭൂരിഭാഗം നേതാക്കളും പിന്നില് അണിനിരക്കുമ്പോള് വിജയം അനായാസമെന്ന പ്രതീക്ഷയില് മല്ലികാര്ജുന് ഖര്ഗെ.
22 വര്ഷത്തിനു ശേഷം പ്രസിഡന്റ് തിരഞ്ഞെടുപ്പിനു കളമൊരുങ്ങിയ കോണ്ഗ്രസ് ക്യാംപില് ഉയരുന്നത് ആവേശം. 'നാളെയെക്കുറിച്ചു ചിന്തിക്കൂ, തരൂരിനെക്കുറിച്ച് ചിന്തിക്കൂ' എന്ന മുദ്രാവാക്യമുയര്ത്തിയാണ് തരൂരിന്റെ പ്രചാരണം. ഒരു ദിവസം, ഒരു നഗരം എന്ന നിലയിലാണ് അദ്ദേഹത്തിന്റെ പ്രചാരണ യാത്ര. തിരഞ്ഞെടുപ്പിനു രണ്ടാഴ്ച മാത്രം ബാക്കി നില്ക്കെ, രാജ്യത്തുടനീളമുള്ള വോട്ടര്മാരെയെല്ലാം നേരില് കാണുക അസാധ്യമാണെങ്കിലും പരമാവധി സംസ്ഥാനങ്ങള് സന്ദര്ശിക്കാനുള്ള ഓട്ടത്തിലാണു തരൂര്.
ഊര്ജം നിറഞ്ഞ പ്രസംഗം, യുവാക്കളെ സ്വാധീനിക്കുന്ന പ്രതിഛായ എന്നിവയാണു പ്രചാരണക്കളത്തിലെ കരുത്ത്. യുപി പോലുള്ള ഉത്തരേന്ത്യന് സംസ്ഥാനങ്ങളിലെ വോട്ടര്മാരുടെ വിശദാംശങ്ങള് ലഭിക്കുക എളുപ്പമല്ലാത്തതിനാല് ഇവരെ കണ്ടെത്താനും വോട്ടഭ്യര്ഥിക്കാനും തരൂരിന്റെ സംഘാംഗങ്ങള് അവിടെയെത്തിയിട്ടുണ്ട്. പ്രചാരണത്തില് തരൂര് അതിവേഗം പായുമ്പോള് മറുവശത്തുള്ള ഖര്ഗെ സാവധാനം നീങ്ങുകയാണ്.
പിസിസി നേതാക്കളെ നേരിട്ടു വിളിച്ച് വോട്ടുറപ്പിക്കുകയാണ് അദ്ദേഹം. വരും ദിവസങ്ങളില് അദ്ദേഹവും വിവിധ സംസ്ഥാനങ്ങള് സന്ദര്ശിക്കും. നിലവിലെ ആരോഗ്യസ്ഥിതിയില് തരൂരിന്റെ ആവേശത്തിനൊപ്പം പിടിക്കാനുള്ള ഊര്ജം ഖര്ഗെയ്ക്കില്ലെങ്കിലും ഹൈക്കമാന്ഡിന്റെ അനൗദ്യോഗിക പിന്തുണ അദ്ദേഹത്തിന് കാര്യങ്ങള് എളുപ്പമാക്കുന്നു.
ദീപേന്ദര് ഹൂഡ, ഗൗരവ് വല്ലഭ് എന്നിവരടക്കമുള്ള ദേശീയ നേതാക്കള് പാര്ട്ടി വക്താവ് പദവി രാജിവച്ചാണ് ഖര്ഗെയുടെ പ്രചാരണച്ചുമതല ഏറ്റെടുത്തിരിക്കുന്നത്.
തരൂര് മുയലിനെ പോലെ കുതിക്കുകയാണ്. ഖര്ഗെ ആമയെ പോലെ സാവധാനം നീങ്ങി അന്തിമ വിജയം നേടും എന്നാണ് ഖര്ഗെ അനുകൂലികളുടെ പ്രചരണം. ജയിക്കാന് സാധിച്ചില്ലെങ്കിലും ഖര്ഗെയുടെ ഭൂരിപക്ഷം കുറയ്ക്കാനായാല് പോലും തരൂരിനു നേട്ടമാണ്. താന് മുന്നോട്ടുവച്ച മാറ്റത്തിനു പാര്ട്ടിയില് ലഭിച്ച സ്വീകാര്യതയ്ക്കുള്ള തെളിവായി അദ്ദേഹത്തിന് അത് ഉയര്ത്തിക്കാട്ടാം. പുതിയ പ്രസിഡന്റ് വന്നശേഷം പ്രവര്ത്തക സമിതിയിലേക്കും തിരഞ്ഞെടുപ്പിലൂടെ അംഗങ്ങളെ തീരുമാനിക്കണമെന്ന നിലപാട് തരൂര് സ്വീകരിക്കും.
അതേസമയം മല്ലികാര്ജുന് ഖര്ഗെയും ശശി തരൂരും സ്വന്തം നിലയ്ക്കാണു മത്സരിക്കുന്നതെന്നും ആര്ക്കു വേണമെങ്കിലും വോട്ട് ചെയ്യാന് പിസിസി പ്രതിനിധികള്ക്ക് സ്വാതന്ത്ര്യമുണ്ടെന്നും കേന്ദ്ര തിരഞ്ഞെടുപ്പ് സമിതി അധ്യക്ഷന് മധുസൂദന് മിസ്ത്രി ഉത്തരവിറക്കി. എഐസിസി ഭാരവാഹികള്, പിസിസി പ്രസിഡന്റുമാര്, ഭാരവാഹികള്, നിയമസഭാകക്ഷി നേതാക്കള്, വക്താക്കള് എന്നിവര് ഏതെങ്കിലും സ്ഥാനാര്ഥിക്ക് അനുകൂലമായോ എതിരായോ പ്രചാരണം നടത്താന് പാടില്ല. അങ്ങനെ ചെയ്യാന് ആഗ്രഹിക്കുന്നവര് ആദ്യം പാര്ട്ടി പദവി രാജിവയ്ക്കണം. സംസ്ഥാനങ്ങള് സന്ദര്ശിക്കുന്ന സ്ഥാനാര്ഥികള്ക്ക് പിസിസി പ്രസിഡന്റുമാര് പ്രചാരണത്തിനുള്ള സൗകര്യങ്ങള് ഏര്പ്പാടാക്കണമെന്നും മിസ്ത്രി വ്യക്തമാക്കി.
"
https://www.facebook.com/Malayalivartha
