വിവാഹം എന്നത് സ്വർഗത്തിൽ വച്ച് നടക്കണം എന്നാണല്ലോ പഴമൊഴി. അച്ഛന്റെയും അമ്മയുടെയും ബന്ധുക്കളുടേയുമൊക്കെ നിർബന്ധത്തിൽ വഴങ്ങി കല്യാണത്തിന് വഴങ്ങുകയും പിന്നെ ദുഖിക്കേണ്ടി വന്നവരെയുമൊക്കെ നാം പലപ്പോഴും കണ്ടിട്ടുണ്ട്. എന്നാൽ അപ്പനെയും അമ്മയെയും സന്തോഷിപ്പിക്കാനായിട്ട് കല്യാണം കഴിക്കരുത് എന്ന് പറയുകയാണ് ഡോ. നെൽസൺ ജോസഫ്.

ഫേസ്ബുക്ക് കുറിപ്പ് ഇങ്ങനെ;

" അപ്പനെയും അമ്മയെയും സന്തോഷിപ്പിക്കാനായിട്ട് കല്യാണം കഴിക്കരുത് "
ഒരു സിമ്പിൾ റൂളാണ്. ഫോളോ ചെയ്താൽ നല്ലതേ വരൂ. ഈയിടെയായിട്ട് വാർത്തകളാവുന്ന വിവാഹങ്ങളുടെ താഴെ കാണുന്ന കമൻ്റുകളിൽ ഒന്നാണ് വേദനിക്കുന്ന അച്ഛനെയും അമ്മയെയും ഓർത്തില്ലല്ലോ എന്ന്. അവസാനം കണ്ടത് ഒന്നിച്ച് ജീവിക്കാൻ തീരുമാനിച്ച ആദിലയുടെയും ഫാത്തിമയുടെയും വാർത്തയുടെ കീഴിലാണെന്ന് മാത്രം.

തങ്ങളെ ഒരു വിധത്തിലും ബാധിക്കാത്ത ഒരു കാര്യത്തിൽ, പ്രായപൂർത്തിയായ രണ്ട് പേർ നിയമത്തിൻ്റെ പിന്തുണയോടെ എടുത്ത ഒരു തീരുമാനത്തിൽ നോവുന്നവരുടെ എണ്ണം കണ്ടപ്പൊ ഒരാശ്വാസം...
എല്ലാം പഴയപോലൊക്കെത്തന്നെ അവിടുണ്ടല്ലോന്ന്. ബൈ ദി ബൈ, നമ്മൾ വിഷയത്തീന്ന് തെന്നിമാറുന്നു. അതിപ്പൊ വിവാഹം വിവാദമൊന്നുമാവണ്ട അച്ഛനോ അമ്മയ്ക്കോ ബന്ധുക്കൾക്കോ ഒക്കെ "വിഷമം" തോന്നാൻ. ജാതി, മതം, ഭാഷ ഇതൊക്കെ ഒന്നായാൽപ്പോലും പിന്നേം കിടക്കുന്നു സംഗതികൾ.. കുടുംബപാരമ്പര്യം തൊട്ട് അങ്ങോട്ട്.. വിവാഹത്തിൻ്റെ ലക്ഷ്യം അപ്പനെയും അമ്മയെയും സന്തോഷിപ്പിക്കൽ ആവരുത് എന്നാണ് എൻ്റെ അഭിപ്രായം.

തനിക്ക് വ്യക്തിപരമായി ഇഷ്ടമില്ലാത്ത, താല്പര്യമില്ലാത്ത ഒരു വ്യക്തിയെ കഷ്ടപ്പെട്ട് ഇഷ്ടപ്പെടാൻ നോക്കി ജീവിതം മുന്നോട്ട് കൊണ്ടുപോവുന്നത് ചിലപ്പൊ രണ്ട് പേർക്കും ഗുണമായിരിക്കില്ല ചെയ്യുന്നത്. ഇനി തിരിച്ചൊന്ന് ചിന്തിച്ചാൽ, മക്കളുടെ സന്തോഷം എന്നാണല്ലോ ഇതിൻ്റെയൊക്കെ പിന്നിലെ ലോജിക്.

അങ്ങനെയാണെങ്കിൽ അവർക്ക് മനസിന് ഇഷ്ടമുള്ള ഒരാൾക്കൊപ്പം ജീവിക്കുന്നതാവില്ലേ അവരുടെ സന്തോഷം? അതോ പ്രായപൂർത്തിയായ സ്വന്തം മകനോ മകൾക്കോ തൻ്റെ ജീവിതപങ്കാളി ആരാവണം എന്ന് തീരുമാനിക്കാനുള്ള അറിവോ പക്വതയോ ഇല്ല എന്നാണോ വിശ്വസിക്കുന്നത്.. അങ്ങനെയാണെങ്കിൽ വലിയ ഉത്തരവാദിത്വമുള്ള കുടുംബജീവിതം നയിക്കാനുള്ള പക്വതയും അവർക്ക് ഉണ്ടാവില്ല കേട്ടോ. അവരുടെ തിരഞ്ഞെടുപ്പുകളിൽ തെറ്റ് പറ്റില്ലേ എന്നും ചോദിക്കാം.

തെറ്റ് പറ്റാം. നമുക്കും തെറ്റുകൾ പറ്റാറുണ്ടല്ലോ? എന്നു കരുതി തീരുമാനങ്ങൾ എടുക്കാതെയിരിക്കുകയാണോ ചെയ്യാറുള്ളത്? അവർക്ക് തെറ്റ് പറ്റിയാൽ പിന്നിൽ താങ്ങായി നമ്മളുണ്ടാവും എന്നുള്ളതല്ലേ അവർക്ക് ധൈര്യമാവേണ്ടത്? അല്ല, എന്തിനാണ് വിവാഹം കഴിക്കുന്നത്? ആരോ കമൻ്റിൽ പറഞ്ഞുകണ്ടു - " പിള്ളേരുണ്ടാവാനാണ് " - മനുഷ്യരാശിയെ നിലനിർത്താനാണ് എന്ന്.. You see....A കുഞ്ഞിക്കാൽ.. ഓ, എത്ര മഹനീയമായ ഉദ്ദേശ്യം... അതിനാണെങ്കിൽ കല്യാണം ഒരു അത്യാവശ്യ ഘടകമല്ല. പരസ്പരം സ്നേഹിച്ച് രണ്ട് വ്യക്തികൾക്ക് മുന്നോട്ട് പോവാനായി ഉണ്ടാക്കുന്ന ഒരു കരാറാണ് വിവാഹമെന്ന് സത്യം പറഞ്ഞാൽ ആരും ഓർക്കാറില്ലെന്ന് സാരം.. ആ സ്കെയിൽ കൊണ്ട് അളന്നാൽ വിവാഹം വിവാദമായേക്കില്ല.