മലപ്പുറത്ത് പള്ളിയിലെ ഇമാമിനെ കൊലപ്പെടുത്താന്‍ ശ്രമിച്ച കേസിൽ പ്രതികള്‍ അറസ്റ്റിൽ. സംഭവത്തിൽ കൂട്ടായി വാടിക്കല്‍ സ്വദേശികളായ മുബാറക്ക് (26) ഇസ്മയില്‍ (35) എന്നിവരെയാണ് തിരൂര്‍ പോലീസ് അറസ്റ്റ് ചെയ്തത്. ഇന്നലെയാണ് രാത്രിയിലാണ് കേസിനാസ്പദമായ സംഭവം നടന്നത്. തിരൂര്‍ പടിഞ്ഞാറെക്കര പള്ളിയിലെ ഇമാമിനെ ഇരുമ്പ് വടി കൊണ്ട് പ്രതികള്‍ തലയ്ക്കടിച്ച് കൊലപ്പെടുത്താന്‍ ശ്രമിക്കുകയായിരുന്നു.

പ്രതികളിൽ ഒരാളായ മുബാറക്കിന്റെ വിവാഹാലോചനയുമായി ബന്ധപ്പെട്ട് പെണ്‍വീട്ടുകാര്‍ ഇമാമിനോട് കാര്യങ്ങള്‍ അന്വേഷിച്ചിരുന്നു. എന്നാൽ ഇതിന് പിന്നാലെ വിവാഹം മുടങ്ങുകയായിരുന്നു. ഇതോടെയാണ് ആക്രമണത്തിലേക്ക് നയിച്ചതെന്നാണ് പോലീസ് പറയുന്നത്.

അതേസമയം തലയ്ക്കു പിന്നില്‍ ഗുരുതരമായി പരുക്കേറ്റ ഇമാമിനെ കോഴിക്കോട് മെഡിക്കല്‍ കോളേജില്‍ പ്രവേശിപ്പിച്ചിരിക്കുകയാണ്. അക്രമത്തിനു ശേഷം പ്രതികള്‍ ഒളിവില്‍ പോയിരുന്നു. തുടർന്ന് പെരുന്തുരുത്തി തൂക്കുപാലത്തിന് സമീപത്ത് നിന്നാണ് പിന്നീട് പ്രതികളെ പിടികൂടിയത്.