ഇപ്പോൾ എന്ത് ഔദ്യോഗിക ആവശ്യത്തിന് ആയാലും ആധാർ ചോദിക്കാത്ത ഇടങ്ങൾ വിരളമായിരിക്കും. ഫോണും ബാങ്ക് അക്കൗണ്ടും ഉൾപ്പെടെ ആധാറുമായി ലിങ്ക് ചെയ്തിട്ടുമുണ്ട്. എന്നാൽ ഇന്നും ആധാർ അപ്ഡേറ്റ് ചെയ്യാത്ത നിരവധി പേരുണ്ട്. ഇക്കൂട്ടരോട് ആധാർ കാർഡ് അപ്ഡേറ്റ് ചെയ്യണമെന്ന് അഭ്യർഥനയുമായി ചെയ്യുകയാണ് യുഐഡിഎഐ.

അതായത് 10 വർഷത്തിലേറെയായി യുണീക് ഐഡി നൽകിയിട്ടും അവരവരുടെ വിശദാംശങ്ങൾ അപ്‌ഡേറ്റ് ചെയ്യാത്ത ആധാർ ഉടമകളോട് തിരിച്ചറിയൽ രേഖകളും റസിഡൻസ് പ്രൂഫ് രേഖകളും അപ്‌ഡേറ്റ് ചെയ്യാൻ യുഐഡിഎഐ അഭ്യർത്ഥിച്ചിരിക്കുന്നത്. ആധാർ നമ്പറുകൾ നൽകുന്ന സർക്കാർ ഏജൻസിയാണ് യുഐഡിഎഐ എന്നത്.

ഇവർ കഴിഞ്ഞ ദിവസം പുറത്തിറക്കിയ പ്രസ്താവനയിലാണ് ഇക്കാര്യം പറയുന്നത്. ആധാർ കാർഡ് അപ്‌ഡേറ്റ് ഓൺലൈനിലും ആധാർ കേന്ദ്രങ്ങളിലും ചെയ്യാമെന്ന് പ്രസ്താവനയിൽ ചൂണ്ടിക്കാണിക്കുന്നു. 10 വർഷത്തിന് മുമ്പ് യുണീക് ഐഡന്റിഫിക്കേഷൻ നമ്പർ നൽകിയവരും അവരുടെ രേഖകൾ അപ്‌ഡേറ്റ് ചെയ്യാൻ യുഐഡിഎഐ അഭ്യർത്ഥിക്കുന്നുമുണ്ട്.

എന്നാൽ ഈ അപ്‌ഡേറ്റ് നിർബന്ധമാണോ എന്ന് യുഐഡിഎഐ ഇതുവരെ വ്യക്തമാക്കിയിട്ടില്ല.10 വർഷം മുമ്പ് ആധാർ സ്വന്തമാക്കുകയും തുടർന്നുള്ള ഒരു വർഷവും വിവരങ്ങൾ അപ്‌ഡേറ്റ് ചെയ്യാതിരിക്കുകയും ചെയ്യുന്ന ഏതൊരു വ്യക്തിയും ഡോക്യുമെന്റ് അപ്‌ഡേറ്റ് ചെയ്യണമെന്നാണ് വ്യക്തമാക്കുന്നത്.

ആയതിനാൽ തന്നെ ആവശ്യമായ ഫീസ് അടച്ച് തിരിച്ചറിയൽ രേഖകളും താമസം സംബന്ധിച്ച തെളിവുകളും അപ്‌ഡേറ്റ് ചെയ്യണം. ഐറിസ്, വിരലടയാളം, ഫോട്ടോഗ്രാഫുകൾ എന്നിവയുടെ സഹായത്തോടെയാണ് ആധാർ രജിസ്റ്റർ ചെയ്യുന്നത്. കഴിഞ്ഞ 10 വർഷത്തിനിടയിൽ, വ്യക്തികളുടെ തിരിച്ചറിയൽ മാർഗമായി ആധാർ നമ്പർ മാറിയിട്ടുണ്ടെന്നും പ്രസ്താവനയിൽ പറയുകയുണ്ടായി.