മൂന്നാറില്‍ സഞ്ചാരികള്‍ക്ക് കണ്ണിനു കുളിര്‍മയേകാന്‍ നീലക്കുറിഞ്ഞി പൂത്തു. ഇടുക്കി ജില്ലയിലെ കള്ളിപ്പാറ മലനിരകളിലാണ് ഇത്തവണ നീലവസന്തം എത്തിയത്. ശാന്തന്‍പാറ ഗ്രാമപഞ്ചായത്തിലെ കള്ളിപ്പാറ മലനിരകളിലാണ് നീലക്കുറിഞ്ഞി പൂത്തിരിക്കുന്നത് .തമിഴ്‌നാടുമായി അതിര്‍ത്തി പങ്കിടുന്ന മലനിരകളിലാണ് വ്യാപകമായി കുറിഞ്ഞി ഇപ്പോള്‍ പൂത്തത്.

വിനോദസഞ്ചാരികള്‍ക്ക് കാഴ്ചയുടെ വിസ്മയം തീര്‍ക്കുകയാണ് ഈ നീലക്കുറിഞ്ഞി വസന്തം.ഇടുക്കി ജില്ലയിലെ പശ്ചിമഘട്ട മലനിരകളെ നീലപ്പട്ട് അണിയിച്ച് പൂവിട്ട നീലക്കുറിഞ്ഞികള്‍ കാണാന്‍ നിരവധി ആളുകള്‍ എത്തിത്തുടങ്ങി. ശാന്തന്‍പാറ പഞ്ചായത്തിലെ കള്ളിപ്പാറ മലനിരകളിലാണ് ഇത്തവണ നീലക്കുറിഞ്ഞികള്‍ വ്യാപകമായി പൂത്തിരിക്കുന്നത്.

ശാന്തന്‍പാറയില്‍നിന്ന് മൂന്നാര്‍തേക്കടി സംസ്ഥാനപാതയിലൂടെ ആറ് കിലോമീറ്റര്‍ സഞ്ചരിച്ചാല്‍ കള്ളിപ്പാറയില്‍ എത്താം. ഇവിടെനിന്ന് ഒന്നര കിലോമീറ്റര്‍ മലകയറിയാല്‍ നീലവസന്തത്തിന്റെ മായാജാലമാണ് കണ്‍മുന്നില്‍ വിടരുക. അതിര്‍ത്തി മലനിരകളുടെയും ചതുരംഗപ്പാറ, കാറ്റാടിപ്പാറ എന്നീ പ്രദേശങ്ങളുടെയും വിദൂര ദൃശ്യം ആരുടെയും മനം കുളിര്‍പ്പിക്കും.ഒപ്പം ഇടവിടാതെ യുള്ള തണുത്ത കാറ്റിന്റെ തലോടലും.

നീലക്കുറിഞ്ഞി വസന്തം കാണാന്‍ സഞ്ചാരികള്‍ക്ക് കെ.എസ്.ആര്‍.ടി.സി ബഡ്ജറ്റ് ടൂറിസം സെല്‍ അവസരമൊരുക്കുന്നു. മൂന്നാര്‍ ഡിപ്പോയില്‍ നിന്ന് കള്ളിപ്പാറ, ചതുരംഗപ്പാറ എന്നീ കേന്ദ്രങ്ങളെ ബന്ധിപ്പിച്ച് സൈറ്റ് സീയിങ് സര്‍വീസ് ഏര്‍പ്പെടുത്തി.

മൂന്നാര്‍ ഡിപ്പോയില്‍ നിന്ന് എല്ലാ ദിവസവും രാവിലെ 9 മണിക്ക് പുറപ്പെട്ട് വൈകുന്നേരം 6 മണിയോടെ തിരിച്ചെത്തുന്ന വിധത്തിലാണ് സര്‍വീസ് ക്രമീകരിച്ചിരിക്കുന്നത്. 30 പേരെങ്കിലും ആളുകള്‍ ഉണ്ടെങ്കില്‍ മാത്രമേ ദിവസവും സര്‍വീസ് തുടരുവെന്ന് മൂന്നാര്‍ കെ എസ് ആര്‍ ടി സി ഓഫീസര്‍ അറിയിച്ചു. നിലവില്‍ ചതുരംഗപ്പാറ ക്ക് സൈറ്റ് സിയിങ് സര്‍വീസ് ഉണ്ട്.യാത്രക്കാര്‍ക്ക് ഫോണ്‍ മുഖാന്തിരം സീറ്റ് ബുക്ക് ചെയ്യുന്നതിനുള്ള സൗകര്യം ഉണ്ടായിരിക്കും. ഒരാള്‍ക്ക് 300 രൂപയാണ് ടിക്കറ്റ് നിരക്കെന്ന് കെ.എസ്.ആര്‍.ടി.സി അറിയിച്ചു.