നരബലിക്കിരയായ തമിഴ്‌നാട് സ്വദേശി പത്മയുടെ സ്വര്‍ണം മുഖ്യ സൂത്രധാരന്‍ മുഹമ്മദ് ഷാഫി പണയം വെച്ചതായി കണ്ടെത്തി....കിട്ടിയ തുകയുടെ ഒരു വിഹിതം ഭാര്യക്ക് കൈമാറിയതായി ഷാഫി ചോദ്യം ചെയ്യലില്‍ സമ്മതിച്ചെന്ന് പോലീസ് , നരബലിക്കു മുമ്പുള്ള മാസങ്ങളില്‍ കേരളമാകെ ഷാഫി സഞ്ചരിച്ചതായി കണ്ടെത്തല്‍.

പോലീസ് ഷാഫിയുടെ ഗാന്ധിനഗറിലെ വാടകവീട്ടില്‍ പരിശോധന നടത്തിയപ്പോള്‍ പണയം വെച്ചതിന്റെ രസീത് കണ്ടെടുത്തതായാണ് വിവരം. ഭാര്യയുടെയും മക്കളുടെയും മൊഴിയും എടുത്തു.പത്മയുടെ കൈയില്‍ ആറു പവനോളം ആഭരണങ്ങള്‍ ഉണ്ടായിരുന്നതായി സഹോദരി പഴനിയമ്മ നേരത്തേ വെളിപ്പെടുത്തിയിരുന്നു.

നാലര പവന്‍ സ്വര്‍ണം ചിറ്റൂര്‍ റോഡിലെ ഒരു ധനകാര്യ സ്ഥാപനത്തില്‍ ഷാഫി പണയം വെച്ചതിന്റെ രേഖകള്‍ കണ്ടെത്തി. ഒരു ലക്ഷത്തി പതിനായിരം രൂപയാണ് ഷാഫി വാങ്ങിയത്. ഇതില്‍ 40,000 രൂപയാണ് ഭാര്യക്കു നല്‍കിയത്. ഷാഫി അടുത്തയിടെ 40,000 രൂപ തന്നെ ഏല്‍പ്പിച്ചിരുന്നതായി ഭാര്യ നഫീസ മൊഴി നല്‍കി.

വണ്ടി വിറ്റു കിട്ടിയ കാശാണ് എന്ന് പറഞ്ഞാണത്രെ നല്‍കിയത്. പത്മയെ നരബലിക്കിരയാക്കിയ ശേഷം സ്വര്‍ണാഭരണങ്ങള്‍ മൃതദേഹത്തില്‍നിന്ന് ഊരിയെടുക്കുകയായിരുന്നുവെന്ന് പോലീസ് പറയുന്നു. വെള്ളിയാഴ്ച രാവിലെ ഒമ്പതിന് എറണാകുളം പോലീസ് ക്ലബ്ബില്‍ നടന്ന ചോദ്യം ചെയ്യല്‍ വൈകീട്ട് വരെ നീണ്ടു. മുഖ്യ പ്രതി മുഹമ്മദ് ഷാഫിയെ കടവന്ത്ര സ്റ്റേഷനിലും ഭഗവല്‍ സിങ്ങിനെ മുളവുകാട് സ്റ്റേഷനിലും ലൈലയെ നോര്‍ത്ത് സ്റ്റേഷനിലുമാണ് പാര്‍പ്പിച്ചത്. ചോദ്യം ചെയ്യലിന്റെ പുരോഗതി അനുസരിച്ച് പ്രതികളുമായി തെളിവെടുപ്പ് നടത്താനുള്ള ഒരുക്കത്തിലാണ് പോലീസ്.

അതേസമയം നരബലിക്കു മുമ്പുള്ള മാസങ്ങളില്‍ കേരളമാകെ ഷാഫി സഞ്ചരിച്ചതായി കണ്ടെത്തല്‍. സംസ്ഥാനത്തിന്റെ പല ഭാഗങ്ങളില്‍ നിന്ന് പലരേയും ഇലന്തൂരിലേക്ക് കൂട്ടിക്കൊണ്ടുവന്നിട്ടുണ്ട്. കൊച്ചി നഗരത്തില്‍ തന്നെ ഒട്ടേറെ സ്ത്രീകളെ ഇയാള്‍ പൂജയ്ക്കായി സമീപിച്ചിരുന്നു. ലോട്ടറി വില്പനക്കാരെയും കട നടത്തുന്ന ചില സ്ത്രീകളെയും സമീപിച്ചിട്ടുണ്ടായിരുന്നു.

എറണാകുളത്ത് ചിറ്റൂര്‍ റോഡില്‍ ഇയാള്‍ നടത്തിയിരുന്ന ഹോട്ടലിനു സമീപം കട നടത്തിയിരുന്ന ഒരു സ്ത്രീയോടും പൂജയ്ക്കായി വരാന്‍ പറഞ്ഞതായാണ് സൂചനകള്‍. കച്ചവടം മെച്ചപ്പെടാനും ഐശ്വര്യത്തിനുമായി മന്ത്രവാദം നടത്താന്‍ ഇയാള്‍ ആവശ്യപ്പെടുകയായിരുന്നു. അത്തരത്തില്‍ പലരേയും സമീപിച്ചു. അങ്ങനെയാണ് നടക്കാന്‍ പോലും പ്രയാസപ്പെട്ടിരുന്ന പത്മയെ വലയില്‍ വീഴ്ത്തിയത്.

ഇയാളുടെ ഹോട്ടലിനു സമീപത്തുള്ളവരുമായി ഷാഫി നല്ല ചേര്‍ച്ചയിലല്ലായിരുന്നു. പലരെയും അസഭ്യം പറഞ്ഞതിന് കടവന്ത്ര പോലീസ് ഇയാളെ താക്കീത് ചെയ്തിരുന്നു. അവരൊക്കെ, ഷാഫിയുടെ സ്വഭാവമറിയാവുന്നതിനാല്‍ പോലീസില്‍ പരാതി നല്‍കുകയാണ് ചെയ്തത്.

ഷാഫിയുടെ ദുരൂഹ പ്രവര്‍ത്തനങ്ങള്‍ക്കു മറ്റാരുടെയെങ്കിലും സഹായം ലഭിച്ചിട്ടുണ്ടോ എന്നും പോലീസ് അന്വേഷിച്ചു വരുന്നു. കേരളത്തിന്റെ പല ഭാഗങ്ങളിലും റിപ്പോര്‍ട്ട് ചെയ്തിട്ടുള്ള സ്ത്രീകളെ കാണാതായ കേസുകളുമായി നരബലി കേസിന് ബന്ധമുണ്ടോയെന്നും പോലീസ് പരിശോധിക്കുകയാണ്.