നരബലിക്കേസിലെ പ്രതികള്‍ക്കെതിരെ ഇരട്ടക്കൊലപാതകത്തിനു പുറമേ പീഡനക്കുറ്റം കൂടി ചുമത്താന്‍ നിയമോപദേശം തേടി പ്രത്യേക അന്വേഷണ സംഘം....
പീഡിപ്പിച്ചു കൊലപ്പെടുത്തി സ്വര്‍ണാഭരണങ്ങള്‍ കവര്‍ന്നെന്ന അതീവഗുരുതര സ്വഭാവമുള്ള കുറ്റം ചുമത്തി കുറ്റപത്രം സമര്‍പ്പിക്കാനാണു നീക്കം. ഇതിന്റെ ഭാഗമായി കേസിലെ ഒന്നും രണ്ടും പ്രതികളായ ഷാഫി (റഷീദ്), ഭഗവല്‍ സിങ് എന്നിവരുടെ ശേഷി പരിശോധന ഇന്നലെ പൊലീസ് നടത്തി.പൊലീസ് കസ്റ്റഡിയില്‍ വാങ്ങിയ പ്രതികളുടെ ആരോഗ്യ സ്ഥിതി മൂന്നു ദിവസം കൂടുമ്പോള്‍ പരിശോധിച്ചു വിലയിരുത്തണമെന്നു കോടതി നിര്‍ദേശമുണ്ട്.

ഷാഫി, ഭഗവല്‍ സിങ് എന്നിവരുടെ ദേഹ പരിശോധനയില്‍ സംശയകരമായ ചില മുറിവുകള്‍ കണ്ടെത്തി. പ്രതികള്‍ കൊലപ്പെടുത്തിയ പത്മയുടെ സ്വര്‍ണാഭരണങ്ങള്‍ സഹോദരിയും മകനും തിരിച്ചറിഞ്ഞു. സ്വര്‍ണാഭരണങ്ങള്‍ പണയപ്പെടുത്തിയ എറണാകുളം ഗാന്ധിനഗറിലെ സ്വകാര്യ ധനകാര്യ സ്ഥാപനത്തില്‍ ഇന്നലെ ഷാഫിയെ എത്തിച്ചു തെളിവെടുക്കുകയും ചെയ്തു.

സ്ഥാപനത്തിലെ ജീവനക്കാരും പ്രതിയെ തിരിച്ചറിഞ്ഞു. പത്മയുടെ മൃതദേഹത്തില്‍ നിന്ന് ഊരിയെടുത്ത 39 ഗ്രാം സ്വര്‍ണാഭരണങ്ങള്‍ പണയം വച്ചു 1.10 ലക്ഷം രൂപയാണു ഷാഫി വാങ്ങിയത്.

കൂടാതെ കൂട്ടുപ്രതികളായ ദമ്പതികളെ ഭീഷണിപ്പെടുത്തി അവരുടെ സ്വത്ത് തട്ടിയെടുക്കാനും മുഖ്യപ്രതി ഷാഫി പദ്ധതിയിട്ടിരുന്നതായി പൊലീസ്. ശ്രീദേവിയെന്ന പേരില്‍ സമൂഹമാധ്യമത്തിലൂടെ ഇവരെ വീഴ്ത്തിയ അതേ തന്ത്രം പ്രയോഗിച്ചു പുതിയ വ്യാജ പ്രൊഫൈലിലൂടെ പിന്നീട് ഇവരെ ബ്ലാക്ക്‌മെയില്‍ ചെയ്യാനായിരുന്നു ഷാഫിയുടെ പദ്ധതി.


ആരോഗ്യവും ഓജസ്സും ലഭിക്കാനായി മനുഷ്യമാംസം ഭക്ഷിക്കുന്ന ചിലരെ അറിയാമെന്നും ആഭിചാര കൊലയ്ക്കു ശേഷം ഇരകളുടെ മാംസത്തിന് 20 ലക്ഷം രൂപ വരെ വില ലഭിക്കാമെന്നും ഷാഫി കൂട്ടുപ്രതികളെ തെറ്റിദ്ധരിപ്പിക്കുകയും ചെയ്തിരുന്നു. ഇതിനുവേണ്ടിയാണു 10 കിലോഗ്രാം മാംസം ഇവര്‍ റഫ്രിജറേറ്ററില്‍ സൂക്ഷിച്ചത്.

അതേസമയം കൊല്ലപ്പെട്ടവരുടെ മൃതദേഹ അവശിഷ്ടങ്ങള്‍ കോട്ടയം മെഡിക്കല്‍ കോളജില്‍ വീണ്ടും പരിശോധനയ്‌ക്കെടുക്കും. റോസ്‌ലിയുടെ ശരീരാവശിഷ്ടങ്ങളുടെ ശാസ്ത്രീയ പരിശോധനയാണ് ആദ്യം നടത്തുക. പോസ്റ്റ്‌മോര്‍ട്ടത്തിന്റെ പ്രാഥമിക നടപടികള്‍ മാത്രമാണു പൂര്‍ത്തിയായതെന്നും കൂടുതല്‍ പരിശോധന ആവശ്യമായതിനാലാണു മൃതദേഹങ്ങള്‍ ബന്ധുക്കള്‍ക്കു വിട്ടുകൊടുക്കാനായി വൈകുന്നത്.