കോഴിക്കോട് ഹോട്ടലിൽ മുറിയെടുത്ത് പണം വെച്ച് ചീട്ടുകളിച്ച സംഘത്തെ പോലീസ് പിടികൂടി. പോലീസിന് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് പിടികൂടിയത്. കസബ സബ് ഇൻസ്പെക്ടർ എസ്. അഭിഷേകിന്റെ നേതൃത്വത്തിൽ നടത്തിയ പരിശോധനയിലാണ് സംഘം പിടിയിലായത്. മാത്രമല്ല പരിശോധനയില്‍ ഇവരില്‍ നിന്നും 89,720 രൂപ പോലീസ് പിടിച്ചെടുത്തു.

അതേസമയം വിവിധ ഹോട്ടലുകളിൽ വാടകകൂടിയ മുറികൾ ബുക്ക് ചെയ്താണ് സംഘം ചീട്ടുകളിക്കാറുള്ളതെന്ന് തെളിഞ്ഞു. ഇത് കൂടാതെ പോലീസിന് സംശയം തോന്നാതിരിക്കാനായി നഗരത്തിലെ പ്രമുഖ ഹോട്ടലുകൾ ആണ് ഇവർ ചീട്ടുകളിക്കായി തിരഞ്ഞെടുക്കുക. അധിക ദിവസങ്ങളും ഒന്നിൽ കൂടുതൽ റൂമുകളും ബുക്ക് ചെയ്യാറുണ്ടെന്ന് പ്രതികൾ പോലീസിനോട് സമ്മതിച്ചു.

എന്നാൽ ദിവസവും ചീട്ടുകളിയിൽ ആകൃഷ്ടരായി പലർക്കും വാഹനങ്ങളും വീടും വരെ വിൽക്കേണ്ടിവന്നവരുണ്ടെന്ന് പോലീസ് വ്യക്തമാക്കി. ഈ സാഹചര്യത്തിൽ വരും ദിവസങ്ങളിലും പോലീസ് പരിശോധന തുടരുമെന്ന് കസബ സബ് ഇൻസ്പെക്ടർ എസ്. അഭിഷേക് പറഞ്ഞു. കസബ പോലീസ് സീനിയർ സി.പി.ഒമാരായ സുധർമ്മൻ, അരുൺ എന്നിവരും പരിശോധനയില്‍ പങ്കെടുത്തു. അറസ്റ്റിലായ പ്രതികളെ കോടതിയില്‍ ഹാജരാക്കി.