മലപ്പുറത്ത് മക്കളെ കൊന്ന് യുവതി ആത്മഹത്യ ചെയ്ത സംഭവത്തിൽ ഭർത്താവ് അറസ്റ്റിൽ. യുവതിയുടെ ഭർത്താവ് കുറ്റിപ്പാല സ്വദേശി റാഷീദലിയാണ് കൽപകഞ്ചേരി പോലീസ് അറസ്റ്റ് ചെയ്തത്. ഇരുവരും തമ്മിലുള്ള തർക്കമാണ് യുവതിയെ ആത്മഹത്യയിലേക്ക് നയിച്ചതെന്നാണ് പോലീസിന്‍റെ അന്വേഷണത്തിനുള്ള കണ്ടെത്തൽ.

ഈ സംഭവത്തിലാണ് ഇപ്പോൾ ഭർത്താവിനെ പോലീസ് അറസ്റ്റ് ചെയ്തത്. ഇയാൾക്കെതിരെ ആത്മഹത്യ പ്രേരണ കുറ്റം ചുമത്തിയാണ് പോലീസ് കേസെടുത്തത്. ഇതിനുപുറമേ ഗാർഹിക പീഡനത്തിനും കേസെടുക്കും.

ഇക്കഴിഞ്ഞ വ്യാഴാഴ്ചയാണ് റാഷീദിന്‍റെ ഭാര്യ സഫ്‌വ ഒന്നും നാലും വയസുള്ള മക്കളെ കൊലപ്പെടുത്തിയ ശേഷം കിടപ്പുമുറിയിൽ ആത്മഹത്യ ചെയ്തത്. മരണ ദിവസം ഇരുവരും രണ്ട് മുറികളിലാണ് കിടന്നിരുന്നത്. ഇവിടെ നിന്ന് സഫ്‌വ ഭർത്താവിന്‍റെ വാട്സാപ്പിലേക്ക് സന്ദേശം അയച്ചിരുന്നു. മാനസിക സംഘർഷം താങ്ങാൻ ആകാത്തതിനാല്‍ മരിക്കുകയാണ് എന്നായിരുന്നു സന്ദേശം.

ഇതിന് പിന്നാലെയാണ് സഫ്‌ വ മക്കളെ കൊലപ്പെടുത്തി കിടപ്പുമുറിയിൽ ആത്മഹത്യ ചെയ്തത്.ഭർതൃ വീട്ടിലെ പീഡനമാണ് സഫ്‌വ ആത്മഹത്യ ചെയ്യാൻ ഇടയാക്കിയതെന്ന് നേരെത്തെ തന്നെ യുവതിയുടെ കുടുംബം ആരോപിച്ചിരുന്നു. പ്രതി യുവതിയെ വീട്ടിൽ വെച്ച് പീഡിപ്പിക്കുന്നതിനെ കുറിച്ചുള്ള വിവരങ്ങൾ സഫ്‌വ മരണത്തിന് മുമ്പ് സഹോദരൻ ഉൾപ്പെടെയുള്ള കുടുംബാംഗങ്ങൾക്ക് അയച്ചു നൽകിയതായി കുടുബാംഗങ്ങള്‍ പറയുന്നു.