എല്ലാം കറങ്ങിത്തിരിയുമ്പോള്... കത്ത് തന്റേതല്ലെന്ന് മേയര് ആര്യ രാജേന്ദ്രന് വ്യക്തമാക്കി പരാതി നല്കുമ്പോള് കത്ത് പുറത്ത് വിട്ടവരുടെ നെഞ്ചിടിപ്പ് കൂടുന്നു; ബിജെപി കൗണ്സിലര്മാര് ഇന്ന് ഗവര്ണറെ കാണുന്നതോടെ കത്തിന് പുതിയ മാനം വരും; ഗവര്ണര് എന്തു ചെയ്യും എന്ന് കാതോര്ത്ത് കേരളം
ഒരു കത്ത് കാരണം കേരളത്തിന്റെ പ്രത്യേകിച്ചും തിരുവനന്തപുരത്തുകാരുടെ മനസമാധാനം പോയിരിക്കുകയാണ്. കരാര് നിയമനത്തിന് പാര്ട്ടി മുന്ഗണന ലിസ്റ്റ് ആവശ്യപ്പെട്ട് സിപിഎം തിരുവനന്തപുരം ജില്ലാ സെക്രട്ടറി ആനാവൂര് നാഗപ്പന് തിരുവന്തപുരം മേയര് ആര്യാ രാജേന്ദ്രന് അയച്ചു എന്ന തരത്തിലുള്ള കത്താണ് പ്രചരിച്ചത്. മേയര്ക്ക് പണികൊടുക്കാന് ആരോ ചെയ്തതാണ് എന്നാണ് ആക്ഷേപം. മേയര് തന്നെ നേരിട്ട് മുഖ്യമന്ത്രിക്ക് പരാതി നല്കി.
ആ അന്വേഷണം നടക്കുമ്പോള് മറ്റൊരു അന്വേഷണത്തിന് കൂടി വഴി തെളിയുന്നു. മേയര് ആര്യാ രാജേന്ദ്രന്റെ കത്ത് പുറത്തുവന്നതോടെ അന്വേഷണം ആവശ്യപ്പെട്ട് ബിജെപി കൗണ്സിലര്മാര് ഇന്ന് ഗവര്ണര്ക്ക് പരാതി നല്കും. 35 ബിജെപി കൗണ്സിലര്മാരാണ് ഗവര്ണറെ കണ്ട് ഇടപെടല് തേടുന്നത്. മേയര് സത്യപ്രതിജ്ഞാലംഘനം നടത്തിയെന്നും നഗരസഭയിലെ കരാര് നിയമനങ്ങളില് അന്വേഷണം വേണമെന്നുമാണ് ബിജെപിയുടെ ആവശ്യം.
മേയറുടെ കത്ത് തന്നെയാണ് പുറത്ത് വന്നതെന്നാണ് ബിജെപിയുടെ നിലപാട്. പന്ത്രണ്ടരയ്ക്കാണ് ബിജെപി കൗണ്സിലര്മാര് ഗവര്ണറെ കാണുന്നത്. കത്ത് വിവാദത്തില് മേയര് ആര്യാ രാജേന്ദ്രനെതിരെ ഇന്നലെ കരിങ്കൊടി പ്രതിഷേധം ഉണ്ടായിരുന്നു. സെക്രട്ടറിയേറ്റില് നിന്നും മടങ്ങുമ്പോഴാണ് ബൈക്കിലെത്തിയ നാല് പേര് ആര്യാ രാജേന്ദ്രന് നേരെ കരിങ്കൊടി വീശിയത്. യൂത്ത് ലീഗ് പ്രവര്ത്തകരാണ് കരിങ്കൊടി കാണിച്ചത്.
വലിയ വിവാദമാണ് കത്ത് മൂലമുണ്ടായത്. ആരോഗ്യമേഖലയിലെ ഒഴിവുള്ള തസ്തികകളുടെ എണ്ണമടക്കം മേയറുടെ ഔഗ്യോഗിക ലെറ്റര് പാഡിലെഴുതിയ കത്താണ് പുറത്ത് വന്നത്. കോര്പറേഷന് കീഴിലെ അര്ബന് പ്രൈമറി ഹെല്ത്ത് സെന്ററുകളിലേക്ക് 295 ഒഴിവുണ്ടെന്നും ഉദ്യോഗാര്ത്ഥികളുടെ മുന്ഗണന പട്ടിക നല്കണമെന്നും അറിയിച്ചു കൊണ്ടാണ് പാര്ട്ടി ജില്ലാ സെക്രട്ടറിക്ക് കത്തയച്ചത്. മേയറുടെ ഔദ്യോഗിക ലെറ്റര്പാഡില് സഖാവേ എന്ന അഭിസംബോധന ചെയ്ത് അയച്ച കത്ത് ഒരു വാര്ഡിലെ വാട്സാപ്പ് ഗ്രൂപ്പില് നിന്നാണ് സമൂഹമാധ്യമത്തില് വൈറലായത്.
കത്ത് സംബന്ധിച്ച് ആര്യാ രാജേന്ദ്രന് മുഖ്യമന്ത്രി പിണറായി വിജയന് പരാതി നല്കി. ക്ലിഫ് ഹൗസിലെത്തി മുഖ്യമന്ത്രിയെ കാണുന്നതിന് മുന്പ് സിപിഎം ജില്ലാ കമ്മിറ്റി ഓഫീസിലെത്തി നേതാക്കളെ കണ്ടും മേയര് നിലപാട് വിശദീകരിച്ചു. കത്ത് ആര് എന്തിന് തയ്യാറാക്കിയെന്നും എങ്ങനെ പുറത്തായെന്നും അന്വേഷിച്ച് നടപടി വേണമെന്നാണ് ആര്യ രാജേന്ദ്രന് ആവശ്യപ്പെടുന്നത്.
അന്വേഷണം നടക്കട്ടെ എന്നും കുറ്റക്കാരെ സംരക്ഷിക്കില്ലെന്നുമാണ് സിപിഎം നിലപാട്. പിന്വാതില് നിയമനം പാര്ട്ടി നയം അല്ലെന്ന് സിപിഎം സംസ്ഥാന സെക്രട്ടറി എം വി ഗോവിന്ദന് പ്രതികരിച്ചു.
കരാര് നിയമനങ്ങള്ക്ക് പാര്ട്ടി ലിസ്റ്റ് ആവശ്യപ്പെട്ടുള്ള കത്ത് തന്റേതല്ലെന്ന് മേയര് ആര്യ രാജേന്ദ്രന് വ്യക്തമാക്കി. കത്തിന്റെ ഉറവിടം അന്വേഷിക്കണം. കത്ത് വ്യാജമാണോ എന്ന് കണ്ടെത്തേണ്ടത് അന്വേഷണത്തിലൂടെ ആണെന്നും മേയര് പ്രതികരിച്ചു. കത്ത് തയ്യാറാക്കുകയോ താന് ഒപ്പിടുകയോ ചെയ്തിട്ടില്ല. കത്ത് ആരാണുണ്ടാക്കിയതെന്നും ഷെയര് ചെയ്തതെന്നും അന്വേഷിക്കണം. കത്തിന്റെ ഉറവിടം അന്വേഷിക്കണം. ലെറ്റര് പാഡ് വ്യാജമാണോയെന്നും അന്വേഷിക്കണം. നിയമനത്തിന് കത്ത് നല്കുന്ന രീതി സിപിഎമ്മിനില്ല. ഓഫീസ് ജീവനക്കാരെ സംശയിക്കുന്നില്ലെന്നും മേയര് പറഞ്ഞു.
കത്ത് ആര് ഷെയര് ചെയ്തു എന്നതടക്കം വിവാദത്തില് സമഗ്ര അന്വേഷണം ആവശ്യപ്പെട്ട് മേയര് ആര്യാ രാജേന്ദ്രന് മുഖ്യമന്ത്രിക്ക് പരാതി നല്കി. ലെറ്റര് ഹെഡിലും ഒപ്പിലും വ്യക്തത കുറവുണ്ട്. സമൂഹ മാധ്യമത്തില് കത്ത് എങ്ങനെ എത്തി എന്നതിലടക്കം അന്വേഷണം വേണം. പ്രശ്നത്തിന്റെ ഗൗരവം കണക്കിലെടുത്താണ് ക്ലിഫ് ഹൗസില് നേരിട്ടെത്തി മുഖ്യമന്ത്രിയെ കണ്ട് കാര്യങ്ങള് ധരിപ്പിച്ചതും ഓഫീസിലെത്തി പരാതി നല്കിയതും. അന്വേഷണം നടത്താമെന്ന് മുഖ്യമന്ത്രി ഉറപ്പും നല്കിയെന്നും ആര്യ പറഞ്ഞു.
മുഖ്യമന്ത്രിയെ കാണുന്നതിന് മുന്പ് സിപിഎം ജില്ലാ കമ്മിറ്റി ഓഫീസിലെത്തി നേതാക്കളെ കണ്ടും മേയര് നിലപാട് വിശദീകരിച്ചു. പിന്വാതില് നിയമനം നയമല്ലെന്ന് വ്യക്തമാക്കിയ സിപിഎം നല്കുന്നത് പൂര്ണ്ണ പിന്തുണയാണ്. കോര്പറേഷന് ഭരണസമിതിയേയും സിപിഎമ്മിനേയും ഒരു പോലെ പ്രതിരോധത്തിലാക്കിയ കത്ത് വിവാദത്തില് പൊലീസ് അന്വേഷണം നടക്കുന്നതിന് പുറമെ പാര്ട്ടി തലത്തിലും അന്വേഷണമുണ്ടാകും. നടപടിയും വരും.
https://www.facebook.com/Malayalivartha
