മാസ്ക് ധരിച്ച് ഒന്നുമറിയാത്തതു പോലെ .... സ്വര്ണം ഒളിപ്പിച്ചത് വായ്ക്കുള്ളില് ... വായില് ഒളിപ്പിച്ചു കടത്തിയ എട്ടു കഷണം സ്വര്ണവുമായി യാത്രക്കാരന് പിടിയില്
സ്വര്ണം ഒളിപ്പിച്ചത് വായ്ക്കുള്ളില് ... വായില് ഒളിപ്പിച്ചു കടത്തിയ എട്ടു കഷണം സ്വര്ണവുമായി യാത്രക്കാരന് പിടിയില്. കാസര്കോട് പെരുമ്പള വലിയമൂല സ്വദേശി അബ്ദുല് അഫ്സല് (24) ആണ് വായില് 8 സ്വര്ണ കഷണങ്ങളുമായി എത്തിയത്.
ഷാര്ജയില് നിന്ന് കോഴിക്കോട് വിമാനത്താവളത്തില് എത്തിയ അഫ്സല് വിമാനത്താവളത്തിനുള്ളിലെ പരിശോധന കഴിഞ്ഞു പുറത്തിറങ്ങിയപ്പോള് കരിപ്പൂര് പൊലീസ് പിടികൂടി. 233 ഗ്രാം (29 പവന്) സ്വര്ണമാണ് നാവിനടിയിലും മറ്റും ഒളിപ്പിച്ച നിലയിലാണ് കണ്ടെത്തിയത്.
മാസ്ക് ധരിച്ച് ഒന്നുമറിയാത്ത പോലെ കസ്റ്റംസ് പരിശോധന പൂര്ത്തിയാക്കി പുറത്തിറങ്ങിയ അഫ്സലിനെ ജില്ലാ പൊലീസ് മേധാവി എസ്.സുജിത് ദാസിന് ലഭിച്ച രഹസ്യവിവരത്തെ തുടര്ന്ന് കസ്റ്റഡിയില് എടുത്ത് പരിശോധിച്ചപ്പോഴാണ് സ്വര്ണം കണ്ടെത്തിയത്.
അതേസമയം കോഴിക്കോട് വിമാനത്താവളത്തിലെത്തിയ മറ്റു രണ്ടു യാത്രക്കാരില് നിന്നും സ്വര്ണം പിടികൂടി. ഇവരില് ഒരാളെ വിമാനത്താവളത്തിനു പുറത്തിറങ്ങിയപ്പോള് പൊലീസും ഒരു യാത്രക്കാരനെ കസ്റ്റംസും ആണു പിടികൂടിയത്.
ഷാര്ജയില് നിന്നെത്തിയ കോഴികോട് മാങ്കാവ് സ്വദേശി ഇബ്രാഹിം ബാദുഷയെ ആണ് ഷൂസിനുള്ളില് ഒളിപ്പിച്ച 214 ഗ്രാം സ്വര്ണ മിശ്രിതവുമായി പൊലീസ് വിമാനത്താവളത്തിനു പുറത്തുനിന്നു പിടികൂടിയത്. സോക്സുകള്ക്കകത്ത് 215 ഗ്രാം സ്വര്ണം മിശ്രിത രൂപത്തില് രണ്ട് പാക്കറ്റുകളിലാക്കി ഒളിപ്പിച്ച് കടത്തുകയായിരുന്നു.
വിമാനത്താവളത്തിനു പുറത്തിറങ്ങിയ ബാദുഷയെ നിരീക്ഷിച്ചുകൊണ്ട് പുറത്ത് പൊലീസ് നിലയുറപ്പിച്ചിരുന്നു. പുറത്തെത്തിയ ബാദുഷ തന്നെ കൊണ്ട് പോവാന് വന്ന സുഹൃത്തുക്കളോടൊപ്പം കാറില് കയറി പുറത്തേക്ക് പോകും വഴിയാണ് പൊലീസ് കസ്റ്റഡിയിലെടുത്തത്. ആദ്യഘട്ട ചോദ്യം ചെയ്യലില് കുറ്റം സമ്മതിക്കാനായി ബാദുഷ വിസമ്മതിച്ചിരുന്നു. തുടര്ന്ന് നടത്തിയ വിശദമായ ദേഹപരിശോധനയിലൊടുവില് സ്വര്ണം കണ്ടെത്തി.
" f
https://www.facebook.com/Malayalivartha
