ഇടുക്കിയിലെ ഏലപ്പാറ സ്കൂളിൽ നിന്ന് കാണാതായ രണ്ട് പെൺകുട്ടികളെയും പോലീസ് കണ്ടെത്തി. കട്ടപ്പനയിൽ നിന്നാണ് പെൺകുട്ടികളെ കണ്ടെത്തിയത്. ഇടുക്കി ചപ്പാത്ത് ആറാം മൈൽ സ്വദേശി ജെയിംസിൻറെ മകൾ അർച്ചന, ചീന്തലാർ സ്വദേശി രാമചന്ദ്രന്റെ മകൾ അഹല്യ എന്നിവരെയാണ് കാണാതായത്.

അതേസമയം ഏലപ്പാറ പഞ്ചായത്ത് ഹൈസ്കുളിൽ പഠിക്കുന്ന ഇരുവരേയും തിങ്കളാഴ്ച മുതൽ കാണാനില്ലായിരുന്നു. പത്തിലും ഒമ്പതിലും പഠിക്കുന്നവരാണ് പെൺകുട്ടികൾ. തിങ്കളാഴ്ച രാവിലെ സ്കൂളിലേക്ക് പോയതായിരുന്നു ഇരുവരും. പക്ഷേ ഇവർ സ്‌കൂളിൽ എത്തിയിരുന്നില്ല. സ്കൂളിൽ രാവിലെ ഹാജരെടുത്ത ശേഷം വരാത്ത കുട്ടികളുടെ വിവരം രക്ഷിതാക്കളെ അറിയിക്കും.

ഇതേതുടർന്ന് ഇവർ വന്നില്ലെന്ന കാര്യം ടീച്ചർ വീട്ടുകാരെ വിളിച്ചറിയിച്ചു. സ്‌കൂളിൽ എത്തിയില്ലെന്ന് കണ്ടതോടെ പീരുമേട് പൊലീസിലും വിവരം അറിയിക്കുകയും ചെയ്തു. പിന്നാലെ പൊലീസ് സ്കൂളിലെത്തി വിവരങ്ങൾ തിരക്കുകകയായിരുന്നു. കാണാതായ കുട്ടികൾ രാവിലെ എട്ടരയോടെ ഏലപ്പാറയിലെത്തിയത് കണ്ടതായി സഹപാഠികൾ സ്കൂളധികൃതരോട് പറഞ്ഞു.

എന്നാൽ ഒരാൾ യൂണിഫോമും മറ്റെയാൾ സാധാരണ വസ്ത്രവുമാണ് അണിഞ്ഞിരുന്നതെന്നും കുട്ടികൾ പറഞ്ഞു. ഇതിനു പിന്നാലെ കുട്ടികൾ പോകാൻ സാധ്യതയുള്ള സ്ഥലങ്ങളും പരിചയക്കാരുടെ വീടുകളും കേന്ദ്രീകരിച്ചുള്ള അന്വേഷണത്തിന് ഒടുവിലാണ് ഇരുവരെയും കട്ടപ്പനയിൽ നിന്ന് കണ്ടെത്തുകയായിരുന്നു.