കൊല്ലത്തു ചാത്തന്നൂരിൽ മീനാടി സ്വദേശി അഭിലാഷിന്റെ ഉടമസ്ഥതയിലുള്ള ആംബുലൻസ് തീയിട്ട് നശിപ്പിച്ചു.ബുധനാഴ്ച പുലർച്ചെയായിരുന്നു സംഭവം. കഴിഞ്ഞ മാസം അഭിലാഷിന്റെ ആംബുലൻസിന് നേരെ ആക്രമണം ഉണ്ടായിരുന്നു. രണ്ടംഗ സംഘം അഭിലാഷിനെ മർദ്ദിക്കുകയും ആംബുലൻസിലെ മൊബൈൽ ഫ്രീസർ നശിപ്പിക്കുകയും ചെയ്തിരുന്നു.

ഒമിനി ആംബുലൻസിൽ തീ പടരുന്നത് നാട്ടുകാരാണ് ആദ്യം കണ്ടത്. ആംബുലൻസിന് സമീപം നിർത്തിയിട്ടിരുന്ന വാനും ബൈക്കും അക്രമി സംഘം അഗ്നിക്കിരയാക്കി. ഉടനെ രക്ഷാപ്രവർത്തനം ആരംഭിച്ചെങ്കിലും ഒന്നരമണിക്കൂറോളം എടുത്താണ് തീ അണച്ചത്.

കഴിഞ്ഞ മാസമുണ്ടായ ആക്രമണത്തിന്റെ തുടർച്ചയാണ് ഇപ്പോൾ ഉണ്ടായതും എന്നാണ് സംശയിക്കുന്നത്. സംഭവത്തിൽ പോലീസ് അന്വേഷണം ആരംഭിച്ചു. പ്രതികളെക്കുറിച്ചുള്ള സൂചന ലഭിച്ചിട്ടുണ്ടെന്നാണ് പോലീസ് പറയുന്നത്.