കോര്‍പ്പറേഷനിലെ കത്തുവിവാദത്തില്‍ അന്വേഷണമാവശ്യപ്പെട്ടുള്ള ഹര്‍ജി ഇന്ന് ഹൈക്കോടതി പരിഗണനയില്‍.....തിരുവനന്തപുരം കോര്‍പ്പറേഷനിലെ മുന്‍ കൗണ്‍സിലര്‍ ജി എസ് ശ്രീകുമാറിന്റെ ഹര്‍ജിയാണ് ഇന്ന് പരിഗണിക്കുക.


സി പി എം ജില്ലാ സെക്രട്ടറിക്ക് കത്തുനല്‍കിയ വിഷയം ഗുരുതരമാണെന്നും ജുഡീഷ്യല്‍ അന്വേഷണമോ സി ബി ഐ അന്വേഷണമോ വേണമെന്നാണ് ഹര്‍ജിയിലെ ആവശ്യം. രണ്ട് വര്‍ഷത്തിനിടെ ആയിരത്തിലധികം അനധികൃത നിയമനങ്ങള്‍ കോര്‍പ്പറേഷനില്‍ നടന്നതായും ഹര്‍ജിക്കാരന്‍ ആരോപിക്കുന്നു്.


ആളെ ആവശ്യപ്പെട്ട് ജില്ലാ സെക്രട്ടറിക്ക് മേയര്‍ കത്തയച്ചത് സ്വജന പക്ഷപാതമാണ്. കരാര്‍ നിയമനങ്ങള്‍ക്കുവേണ്ടിയുള്ള പട്ടിക ആവശ്യപ്പെട്ട് സി പി എം ജില്ലാ സെക്രട്ടറി ആനാവൂര്‍ നാഗപ്പന് മേയര്‍ നല്‍കിയ കത്ത് പുറത്തുവന്നതോടെയാണ് വിവാദങ്ങള്‍തുടങ്ങിയത്.

ഒഴിവുള്ള ജോലികളുടെ എണ്ണം വ്യക്തമാക്കിയശേഷം നിയമനത്തിന് ലിസ്റ്റ് തരണമെന്നാണ് മേയറുടെ ഔദ്യോഗിക ലെറ്റര്‍പാഡിലുളള കത്തില്‍ ആവശ്യപ്പെട്ടിരുന്നത്. ഇതിന് തൊട്ടുപിന്നാലെ എസ് എ ടി ആശുപത്രി പരിസരത്തെ വിശ്രമകേന്ദ്രത്തിലേക്ക് ജീവനക്കാരെ നിയമിക്കണമെന്നാവശ്യപ്പെട്ട് പാര്‍ലമെന്ററി പാര്‍ട്ടി നേതാവ് ഡി ആര്‍ അനില്‍ ജില്ലാ സെക്രട്ടറിക്ക് അയച്ച കത്തും പുറത്തു വന്നു.
താന്‍ നിയമനവുമായി ബന്ധപ്പെട്ട് ഒരു കത്തും നല്‍കിയിട്ടില്ലെന്ന് മേയറും അങ്ങനെയൊരു കത്ത് കിട്ടിയിട്ടില്ലെന്ന് ജില്ലാ സെക്രട്ടറി ആനാവൂര്‍നാഗപ്പനും ആവര്‍ത്തിച്ച് വ്യക്തമാക്കുന്നുണ്ട്. വിഷയത്തില്‍ ക്രൈംബ്രാഞ്ച് അന്വേഷണം നടക്കുന്നു. മേയറുടെ മൊഴി അന്വേഷണ സംഘം രേഖപ്പെടുത്തി.