കൂടുതല്‍ സ്ത്രീധനം അവശ്യപ്പെട്ട് ഭാര്യയെ കൊലപ്പെടുത്താന്‍ ശ്രമിച്ച കേസില്‍ ഭര്‍ത്താവിന് ജില്ലാ കോടതി ജാമ്യം നിഷേധിച്ചു. തിരുവനന്തപുരം അഡീ. ജില്ലാ സെഷന്‍സ് കോടതിയാണ് ആഗസ്റ്റ് 7 മുതല്‍ റിമാന്റില്‍ കഴിയുന്ന പ്രതിക്ക് ജാമ്യം നിരസിച്ചത്. കീഴാറൂര്‍ കുറ്റിയാണിക്കാട് മണക്കാല സ്വദേശി ജയരാജ് (34) എന്നയാളിന്റെ ജാമ്യഹര്‍ജിയാണ് തള്ളിയത്.


2022 ആഗസ്റ്റ് 6 ന് വൈകിട്ട് 6.30 നാണ് വധശ്രമം നടന്നത്. വീട്ടിനുള്ളില്‍ പ്രവേശിച്ച പ്രതി ഭാര്യയെ ആക്രമിക്കുകയും കൊലപ്പെടുത്തണമെന്ന ഉദ്ദേശത്തോടെയും അറിവോടെയും ഭാര്യയെ തടഞ്ഞു നിര്‍ത്തി അസഭ്യ വാക്കുകള്‍ വിളിക്കുകയും കൈയ്യില്‍ കരുതിയിരുന്ന സ്റ്റീല്‍ കത്തി കൊണ്ട് കൊലപ്പെടുത്തണമെന്ന രീതിയില്‍ മുതുകില്‍ കുത്തുകയും സ്‌ക്രൂ ഡ്രൈവര്‍ പോലുള്ള ആയുധമുപയോഗിച്ച് നെഞ്ചില്‍ കുത്തുകയും ചെയ്ത് കഠിന ദേഹോപദ്രവം ഏല്‍പ്പിച്ചുവെന്നുമാണ് കേസ്.


ആരോപണം ഗൗരവമേറിയതാണ്. വാസ ഗൃഹത്തിനുള്ളില്‍ വെച്ച് കൃത്യം ചെയ്തുതുവെന്നാണ് ആരോപണം. പോലീസ് റിപ്പോര്‍ട്ടും കേസ് ഡയറിയും പരിശോധിച്ചതില്‍ അന്വേഷണം പൂര്‍ത്തിയായിട്ടില്ലെന്നാണ്. ഈ ഘട്ടത്തില്‍ പ്രതിയെ ജാമ്യത്തില്‍ വിട്ടയച്ചാല്‍ ആവലാതിക്കെതിരെ സമാന കുറ്റകൃത്യം ആവര്‍ത്തിക്കാന്‍ സാധ്യതയുണ്ട്.

കൂടാതെ സാക്ഷികളെ സ്വാധീനിക്കാനോ ഭീഷണിപ്പെടുത്താനോ സാധ്യതയുണ്ട്. അപ്രകാരം തെളിവുകള്‍ നശിപ്പിക്കാനും സാധ്യതയുള്ളതിനാല്‍ അന്വേഷണ കാലയളവില്‍ അവ തടയേണ്ടതായുണ്ടെന്നും ഉത്തരവില്‍ ചൂണ്ടിക്കാട്ടിയാണ് കോടതി ജാമ്യ ഹര്‍ജി തള്ളിയത്.