സ്ഥിര നിക്ഷേപകരുടെ പേരില്‍ വ്യാജ ലോണ്‍ അപേക്ഷ തയ്യാറാക്കി അവരുടെ സ്ഥിര നിക്ഷേപത്തില്‍ നിന്നും 3.8 ലക്ഷം രൂപയുടെ പണാപഹരണം നടത്തിയെന്ന കേസില്‍ പ്രതി കല്ലിയൂര്‍ സര്‍വ്വീസ് സഹകരണ ബാങ്ക് സീനിയര്‍ ക്ലര്‍ക്കിന് തലസ്ഥാന ജില്ലാ കോടതി മുന്‍കൂര്‍ ജാമ്യം നിഷേധിച്ചു.

തിരുവനന്തപുരം അഡീ. ജില്ലാ സെഷന്‍സ് കോടതിയാണ് പ്രതി കല്ലിയൂര്‍ സ്വദേശി വി. പി. പ്രവീണിന് ജാമ്യം നിരസിച്ചത്. പ്രതിക്കെതിരായ ആരോപണം അതീവ ഗൗരവമേറിയതാണ്.



പണാപഹരണം , വഞ്ചന ചെയ്ത് ചതിക്കല്‍ , ചതിക്കലിന് വേണ്ടിയുള്ള വ്യാജ നിര്‍മ്മാണം , വ്യാജ നിര്‍മ്മിത രേഖ അസ്സല്‍ പോലെ ഉപയോഗിക്കല്‍ , കണക്കുകളുടെ വ്യാജീകരണം എന്നീ കുറ്റ കൃത്യങ്ങളാണ് മൊത്തത്തില്‍ നടന്നിട്ടുള്ളത്. പ്രതി സിനിയര്‍ ക്ലര്‍ക്ക് എന്ന നിലയില്‍ 3,08,000 രൂപ അപഹരിച്ചുവെന്നാണ് ആരോപിക്കപ്പെട്ടിട്ടുള്ളത്. നേമം പോലീസ് അന്വേഷണം നടന്നു വരുന്നതും ടേം ഡെപ്പോസിറ്റ് അപേക്ഷകള്‍ , ഡേ ബുക്ക് തുടങ്ങിയവ പോലീസ് ശേഖരിക്കുകയും സഹകരണ സംഘം ജോയിന്റ് ഡയറക്ടര്‍ പണാപഹരണം നടന്നതായി കണ്ടെത്തിയ ആഡിറ്റ് സര്‍ട്ടിഫിക്കറ്റ് തയ്യാറാക്കുകയും ചെയ്തു. നിക്ഷേപകരുടെ പേരില്‍ വ്യാജരേഖകള്‍ ചമച്ച്
സഹകരണ സംഘത്തില്‍ നിന്നും വന്‍ തുക അപഹരിച്ചുവെന്നത് നിസ്സാരമായി കാണാനാവില്ല.

ഒരാള്‍ക്ക് മാത്രമായി ഇത്രയും കൃത്യങ്ങള്‍ ചെയ്യാനാവില്ലെന്നും സമഗ്രമായ അന്വേഷണം ആവശ്യമായിട്ടുണ്ടെന്നുമുള്ള പ്രോസിക്യൂഷന്‍ വാദത്തില്‍ കഴമ്പുണ്ട്. യഥാര്‍ത്ഥ പ്രതികളെ കണ്ടെത്താന്‍ ബാങ്കിന്റെ അധീനതയും നിയന്ത്രണവുമുള്ള എല്ലാ വ്യക്തികളെയും അന്വേഷണ പരിധിയില്‍ കൊണ്ടു വരേണ്ടതുണ്ട്. ആരോപണങ്ങളുടെ സത്യാവസ്ഥ കണ്ടെത്താന്‍ ശരിയായ അന്വേഷണം നടത്തേണ്ടതായുണ്ട്. ഗൗരവമേറിയ കൃത്യത്തിന്റെ സ്വഭാവവും കാഠിന്യവും പ്രതിക്കെതിരെ ആരോപിക്കുന്നതിനാല്‍ യാതൊരന്വേഷണവും നേരിടാതെ പ്രതിയെ വിട്ടയക്കാനാവില്ല. കൂടാതെ ജമ്യത്തില്‍ വിട്ടയച്ചാല്‍ പ്രതി ഒളിവില്‍ പോകാനുള്ള സാധ്യത തള്ളിക്കളയാനാവില്ലെന്നും ചൂണ്ടിക്കാട്ടിയാണ് കോടതി മുന്‍കൂര്‍ ജാമ്യം നിഷേധിച്ചത്.


സ്ഥിര നിക്ഷേപം ഇട്ട നിക്ഷേപകരുടെ സ്ഥിര നിക്ഷേപത്തില്‍ നിന്നും അവരറിയാതെ വ്യാജരേഖകള്‍ ചമച്ചു ലോണ്‍ എടുത്ത് കണക്കുകളുടെ വ്യാജീകരണം നടത്തിയും വഞ്ചന നടത്തിയെന്നാണ് കേസ്. 2020 നവംബര്‍ 9 ന് 1,08,000 ' രൂപ , 202ഹജനുവരി 16 ന് 2,00,000 എന്നിങ്ങനെ 3, 08,000 രൂപ അപഹരിച്ചെടുത്തെന്നാണ് കേസ്.