പ്രത്യേക സംക്ഷിപ്ത വോട്ടര്‍ പട്ടിക പുതുക്കലിന്റെ ഭാഗമായി തയ്യാറാക്കിയ കരട് വോട്ടര്‍ പട്ടിക പ്രസിദ്ധീകരിച്ചു. പട്ടിക പ്രകാരം സംസ്ഥാനത്ത് ആകെ 2,71,62,290 വോട്ടര്‍മാരാണുള്ളത്. സംസ്ഥാന മുഖ്യ തെരഞ്ഞെടുപ്പ് ഓഫിസറുടെ വെബ്‌സൈറ്റില്‍  വിവരങ്ങള്‍ ലഭ്യമാണ്.

സൂക്ഷ്മ പരിശോധനകള്‍ക്കായി താലൂക്ക് ഓഫിസുകളിലും, വില്ലേജ് ഓഫിസുകളിലും, ബൂത്ത് ലെവല്‍ ഓഫിസറുടെ കൈവശവും വിവരങ്ങള്‍ ലഭിക്കും. പരാതികളും നിര്‍ദ്ദേശങ്ങളും സമര്‍പ്പിക്കാന്‍ ഇന്നുമുതല്‍ ഡിസംബര്‍ എട്ടുവരെ സമയമുണ്ട്.

2023 ജനുവരി ഒന്ന് യോഗ്യതാ തീയതിയായുള്ള കരട് പട്ടികയാണ് പ്രസിദ്ധീകരിച്ചത്. 2022 ജനുവരിയില്‍ പ്രസിദ്ധീകരിച്ച അന്തിമ വോട്ടര്‍ പട്ടികയില്‍ സംസ്ഥാനത്തെ 2,73,65,345 വോട്ടര്‍മാരാണ് ഉള്‍പ്പെട്ടിരുന്നത്.

കരട് വോട്ടര്‍ പട്ടികയിലെ വിവരങ്ങള്‍

ആകെ വോട്ടര്‍മാര്‍- 2,71,62,290, സ്ത്രീ വോട്ടര്‍മാര്‍- 1,40,15,361, പുരുഷ വോട്ടര്‍മാര്‍- 1,31,46,670, ആകെ ഭിന്നലിംഗ വോട്ടര്‍മാര്‍- 259,പുതിയ വോട്ടര്‍മാര്‍ - 1,10,646, പുതുക്കിയ വോട്ടര്‍ പട്ടിക പ്രകാരം സംസ്ഥാനത്തെ ലിംഗ അനുപാതം - 1066, കൂടുതല്‍ വോട്ടര്‍മാരുള്ള ജില്ല -മലപ്പുറം (32,56,814,കുറവ് വോട്ടര്‍മാരുള്ള ജില്ല- വയനാട് (6,16,980)
കൂടുതല്‍ സ്ത്രീ വോട്ടര്‍മാരുള്ള ജില്ല- മലപ്പുറം(16,32,347)
കൂടുതല്‍ ഭിന്നലിംഗ വോട്ടര്‍മാരുള്ള ജില്ല -തിരുവനന്തപുരം (57),ആകെ പ്രവാസി വോട്ടര്‍മാര്‍- 88,124
പുതിയതായി വോട്ടര്‍ പട്ടികയില്‍ ഉള്‍പ്പെട്ടവര്‍- 1,10,646,പുതുക്കിയ കണക്കുകള്‍ പ്രകാരം സംസ്ഥാനത്ത് ആകെ 25,147 പോളിംഗ് സ്റ്റേഷനുകള്‍ ഉണ്ട്.

ഇത്തവണ മുതല്‍ 17 വയസ്സ് പൂര്‍ത്തിയായവര്‍ക്ക് വോട്ടര്‍ പട്ടികയില്‍ പേര് ചേര്‍ക്കാന്‍ മുന്‍കൂറായി അപേക്ഷ സമര്‍പ്പിക്കാം. അപേക്ഷ സമര്‍പ്പിച്ച ശേഷം, ജനുവരി ഒന്ന്, ഏപ്രില്‍ ഒന്ന്, ജൂലൈ ഒന്ന്, ഒക്ടോബര്‍ ഒന്ന് എന്നീ നാല് തീയതികളില്‍ എന്നാണോ 18 വയസ് പൂര്‍ത്തിയാകുന്നത്, ആ തീയതി അനുസരിച്ച് അപേക്ഷ പരിശോധിക്കുകയും അര്‍ഹത അനുസരിച്ച് വോട്ടര്‍ പട്ടികയില്‍ ഇടം നല്‍കും.