സർക്കാരും ഗവർണറുമായുള്ള പരസ്പരമുള്ള കൊമ്പു കോർക്കൽ നാം കണ്ടു കൊണ്ടിരിക്കുകയാണ്. എന്നാൽ ഇവർക്ക് ഇടയിലെ പ്രശ്നങ്ങളുടെ ഒരു പ്രധാന കാരണം കലാമണ്ഡലം വിസിയുമായുള്ള തർക്കമായിരുന്നു. ഈ തർക്കമായിരുന്നു വിസി ചാൻസിലർ പ്രശ്നങ്ങൾക്ക് തുടക്കമിട്ടത്. പിആർഒയെ തിരിച്ചെടുക്കുന്നതിനെ കുറിച്ചുള്ള തർക്കങ്ങളിലൂടെയാണ് കലാമണ്ഡലം വിസിയായിരുന്ന ഡോ. ടികെ നാരായണനും ചാൻസിലറായ ഗവർണറും തമ്മിൽ അന്ന് ഉടക്ക് തുടങ്ങിയത്.

പിരിച്ചുവിട്ട പിആർഒയെ വീണ്ടും നിയമിക്കണമെന്ന് ഗവർണർ ആവശ്യപ്പെട്ടു. പക്ഷേ വിസിയാകട്ടെ ആ കാര്യം അനുസരിച്ചില്ല.ഈ വിഷയത്തിൽ ഗവർണർക്കെതിരെ വിസി കോടതിയിൽ പോകുകയും ചെയ്തു. സർക്കാർ ഈ വിഷയത്തിൽ ഇടപ്പെടുകയും കേസ് പിൻവലിക്കുകയും ചെയ്തു . പക്ഷേ നേരിട്ട് ഹാജരാകണെന്ന നിർദേശം വിസി തള്ളി. ഇതൊക്കെ വലിയ വിവാദങ്ങളിലേക്ക് നയിക്കപ്പെട്ടതായിരുന്നു.

കഴിഞ്ഞ ദിവസം കേരള കലാമണ്ഡലത്തിന്റെ ചാൻസിലർ പദവിയിൽ നിന്നും ഗവർണറെ മാറ്റി യിരുന്നു.ഇപ്പോൾ ഇതാ ഈ വിഷയത്തിൽ പ്രതികരിച്ച് രംഗത്ത് വന്നിരിക്കുകയാണ് കലാമണ്ഡലം സർവകലാശാല മുൻ വിസി ഡോ. ടികെ നാരായണൻ. കേരള കലാമണ്ഡലത്തിൽ ഗവർണർ ഉപയോഗിച്ചത് ഇല്ലാത്ത അധികാരമെന്നാണ് ഡോ. ടികെ നാരായണൻ വിമർശിച്ചിരിക്കുന്നത്.

ഗവർണർ , ഡീൻ നിയമനത്തിൽ പോലും ഇടപെട്ടിരുന്നുവെന്നും അദ്ദേഹം വിമർശിക്കുകയും ചെയ്തു .ഇല്ലാത്ത അധികാരം ഗവർണർ പലതവണ ഉപയോഗിച്ചുവെന്നും അദ്ദേഹം വിമർശിക്കുകയുണ്ടായി. ഗവർണർ അമിതാധികാരം ഉപയോഗിക്കുകയും അധികാരങ്ങൾ ദുരുപയോഗിക്കുകയും ചെയ്യുന്നുണ്ട്. ഇതേ കുറിച്ച് സംസ്കാരിക വകുപ്പ് സെക്രട്ടറിക്ക് കത്തയച്ചു . എന്നാൽ അന്നത്തെ സെക്രട്ടറി റാണി ജോർജ്ജ് ഒരു നടപടിയും സ്വീകരിച്ചിട്ടില്ലെന്നും ഡോ. ടികെ നാരായണൻ പ്രതികരിച്ചു.

സർക്കാർ ആവശ്യപ്പെട്ടതനുസരിച്ചാണ് ഗവർണക്കെതിരെയുള്ള കേസ് പിൻവലിച്ചത് എന്നും അദ്ദേഹം ചൂണ്ടിക്കാണിച്ചിരിക്കുകയാണ്. ഗവർണറെ കലാമണ്ഡലം ചാൻസിലർ പദവിയിൽ നിന്ന് നീക്കിയ നടപടി ശരിയാണെന്നും ഡോ. ടികെ നാരായണൻ പറഞ്ഞിരിക്കുകയാണ് . ഗവർണറെ തന്നെ ചാൻസിലർ ആക്കാൻ തീരുമാനിച്ചത് ശരിയല്ല. ചാൻസിലർമാർ കേന്ദ്ര സർക്കാരിന്റെ അടിമകളെ പോലെയാണ് പെരുമാറുന്നതെന്ന വിമർശനവും അദ്ദേഹം ഉന്നയിച്ചിരിക്കുകയാണ്.