കത്ത് വിവാദത്തില് തിരുവനന്തപുരം നഗരസഭയില് പ്രതിഷേധം തുടരുന്നു.... പ്രതിഷേധ മാര്ച്ചില് സംഘര്ഷം.... പ്രവര്ത്തകര്ക്ക് നേരെ ജലപീരങ്കിയും കണ്ണീര് വാതകവും പ്രയോഗിച്ചു
കത്ത് വിവാദത്തില് തിരുവനന്തപുരം നഗരസഭയില് പ്രതിഷേധം തുടരുന്നു. രാവിലെ 9.35ഓടെ മേയര് ആര്യാ രാജേന്ദ്രന് നഗരസഭയിലെത്തിയതിന് പിന്നാലെ ബിജെപി കൗണ്സിലര്മാര് മേയറുടെ ഓഫീസിന് മുന്നിലെത്തി പ്രതിഷേധിച്ചു. പിന്നാലെ കോണ്ഗ്രസ് കൗണ്സിലര്മാരും മേയറുടെ ഓഫീസിന് മുന്നിലെത്തി പ്രതിഷേധിച്ചു. നഗരസഭാ മന്ദിരത്തിന് പുറത്ത് യുഡിഎഫ് നടത്തുന്ന നിരാഹാര സമരം അഞ്ചാം ദിനം പുരോഗമിക്കുന്നു.
അതേസമയം തിരുവനന്തപുരം നഗരസഭയിലെ നിയമന വിവാദത്തില് മേയര് ആര്യാ രാജേന്ദ്രന് രാജി വയ്ക്കണമെന്ന് ആവശ്യപ്പെട്ട് ബിജെപി നടത്തിയ പ്രതിഷേധ മാര്ച്ചില് സംഘര്ഷം.
നഗരസഭയുടെ മുന്നില് പോലീസ് സ്ഥാപിച്ച ബാരിക്കേഡ് മറികടക്കാന് ശ്രമിച്ച പ്രവര്ത്തകര്ക്ക് നേരെ ജലപീരങ്കിയും കണ്ണീര് വാതകവും പ്രയോഗിച്ചു. യുവമോര്ച്ച പ്രവര്ത്തകരും ബിജെപി കൗണ്സിലര്മാരുമാണ് പ്രതിഷേധത്തിന് നേതൃത്വം നല്കുന്നത്. പോലീസിന്റെ ജലപീരങ്കി പ്രയോഗത്തിനിടെ ദേഹാസ്വസ്ഥ്യം അനുഭവപ്പെട്ട പ്രവര്ത്തകരെ കൂടെയുണ്ടായിരുന്നവര് ആശുപത്രിയിലെത്തിച്ചു.
നഗരസഭാ മന്ദിരത്തിന്റെ മുന്നിലെ മതില് ചാടികടക്കാന് ശ്രമിച്ച പ്രവര്ത്തകരെ പോലീസ് അറസ്റ്റ് ചെയ്ത് നീക്കി. കത്ത് വിവാദത്തില് നിലവിലെ അന്വേഷണം തൃപ്തികരമല്ലെന്നും മേയര് രാജിവയ്ക്കണമെന്നുമാണ് പ്രതിഷേധക്കാരുടെ ആവശ്യം.
അതേസമയം കത്ത് വിവാദത്തിന്റെ പേരില് രാജി വയ്ക്കില്ലെന്ന് മേയര് ആര്യാ രാജേന്ദ്രന്. കൗണ്സിലര്മാരുടെ പിന്തുണ ഉള്ളിടത്തോളം കാലം ഭരണത്തില് തുടരുമെന്നു മേയര് പ്രതികരിച്ചു. ഒന്നും അറിയാതെയല്ല മുഖ്യമന്തിക്ക് പരാതി കൊടുത്തത്. വിഷയത്തില് കോടതി ആവശ്യപ്പെടുന്ന ഏതന്വേഷണത്തോടും സഹകരിക്കും. മഹിളാകോണ്ഗ്രസിന്റെ പെട്ടി പ്രതിഷേധത്തിനെതിരെയും മേയര് വിമര്ശനമുന്നയിക്കുകയും ചെയ്തു.
"
https://www.facebook.com/Malayalivartha
