ഓണ്‍ലൈന്‍ ഭക്ഷണവിതരണം തടസ്സപ്പെടുന്നു ..... സ്വിഗി ജീവനക്കാരുടെ അനിശ്ചിതകാല സമരം മൂന്നാം ദിവസത്തിലേക്ക് ...
ഓണ്‍ലൈന്‍ ഭക്ഷണവിതരണം തടസ്സപ്പെടുന്നു ..... സ്വിഗി ജീവനക്കാരുടെ അനിശ്ചിതകാല സമരം മൂന്നാം ദിവസത്തിലേക്ക് ...എറണാകുളം ജില്ലയില്‍ ഓണ്‍ലൈന്‍ ഭക്ഷണവിതരണം തടസപ്പെട്ടു. സ്വിഗ്ഗി മാനേജ്‌മെന്റിനെതിരേ ഫുഡ് ഓണ്‍ലൈന്‍ ഡെലിവറി വര്‍ക്കേഴ്‌സ് യൂണിയന്റെ (എഐടിയുസി) നേൃത്വത്തിലാണ് സമരം നടത്തുന്നത്.
വൈറ്റില സ്വിഗ്ഗി ഡെസ് പാച്ച് സോണ്‍ ഓഫീസിനു മുന്നിലും ഹോട്ടലുകള്‍ക്കു മുന്നിലും ഓര്‍ഡര്‍ സ്വീകരിക്കാതെയാണ് തൊഴിലാളികളുടെ പ്രതിഷേധം.
ജില്ലയില്‍ 80 ശതമാനം തൊഴിലാളികളും സമരത്തില്‍ പങ്കെടുക്കുന്നുണ്ട്. കഴിഞ്ഞ ദിവസം നടന്ന ചര്‍ച്ചയില്‍ നാല് കിലോമീറ്ററിന് 20 രൂപയില്‍ നിന്ന് 30 ആക്കണമെന്നായിരുന്നു തൊഴിലാളികള്‍ ആവശ്യപ്പെട്ടത്. അതിന് ശേഷമുള്ള ഓരോ കിലോമീറ്ററിനും എട്ട് രൂപ വീതം നല്‍കണമെന്നും ജീവനക്കാരും ട്രേഡ് യൂണിയന്‍ നേതാക്കളും ആവശ്യപ്പെട്ടു. എന്നാല്‍ നിരക്ക് വര്‍ധനയൊഴികെയുള്ള മറ്റ് ചര്‍ച്ചകള്‍ ആകാമെന്നും അവ പരിഹരിക്കാമെന്നുമാണ് സ്വിഗ്ഗി അധികൃതര്‍ നിലപാടെടുത്തതോടെ ചര്‍ച്ച പരാജയപ്പെട്ടു.
ഓര്‍ഡറുകള്‍ പുറത്തുള്ള ഏജന്‍സികള്‍ക്ക് നല്‍കരുത്, തൊഴിലാളിക്ക് നല്‍കുന്ന ടിപ് കൃത്യമായി കൈമാറണം തുടങ്ങിയ ആവശ്യങ്ങളും തൊഴിലാളികള്‍ മുന്നോട്ട് വച്ചു. കഴിഞ്ഞ ഒക്ടോബറിലും ജീവനക്കാര്‍ സമരം നടത്തിയിരുന്നു. എന്നാല്‍ രണ്ടാഴ്ചക്കുള്ളില്‍ പരിഹരിക്കാമെന്ന അധികൃതരുടെ ഉറപ്പില്‍ ജീവനക്കാര്‍ ഈ സമരം പിന്‍വലിക്കുകയായിരുന്നു.
അതേസമയം വിതരണക്കാര്‍ക്കുള്ള വിഹിതം കുറയുന്നതില്‍ സൊമാറ്റോ വിതരണക്കാരും സമരത്തിലേക്ക് കടക്കാനൊരുങ്ങുകയാണ്. സമരപരിപാടികളുടെ ഭാഗമായി ഇന്ന് കൊച്ചിയില്‍ യോഗം ചേര്‍ന്നേക്കും.
"
https://www.facebook.com/Malayalivartha
