തൊട്ടിരിക്കേണ്ടി വന്ന പെണ്ണിൻ്റെ ശരീരത്തിനകത്ത്‌ ഒരു മനസ്സുണ്ടെന്നും അവളൊരു വ്യക്‌തിയാണെന്നും ഇവരൊക്കെ എന്ന്‌ മനസ്സിലാക്കാനാണ്‌ ! പെണ്ണിന്റെ നോവുകൾ അസ്തമിക്കുന്ന കാലം എന്ന് വരാനാണ്...! തുറന്നടിച്ച് ഡോക്‌ടർ ഷിംന അസീസ്. ഫേസ്ബുക്ക് കുറിപ്പിന്റെ പൂർണ്ണ രൂപം ഇങ്ങനെ;

കുടുംബത്തിൽ ഒഴിച്ചു കൂടാനാവാത്ത ഒരാശുപത്രിക്കേസ്‌ കാരണം കഴിഞ്ഞ ഒരാഴ്ചയായി ക്ലാസിൽ പോയിട്ടില്ല. മോന്റെ വയ്യായ്‌ക പൂർണമായും മാറുന്നതിന്‌ മുൻപ്‌ തിരികെ കോളേജിലേക്ക് പോന്നത്‌ ഇനിയും ക്ലാസ് കളയാൻ വയ്യാഞ്ഞിട്ടാണ്‌.തുടർച്ചയായ ഉറക്കമില്ലായ്മ തന്ന തല പൊളിയുന്ന വേദനയും കൂട്ടിപ്പിടിച്ച് രാവിലെ കയറിയതാണ്‌ കെഎസ്ആർടിസിയിൽ. പതിവ് പോലെ റിസർവ്വ്‌ ചെയ്‌ത സൈഡ്‌സീറ്റിൽ ഹെഡ്‌സെറ്റ്‌ കുത്തിവെച്ചിരിക്കുന്നു.

കുറച്ച്‌ നേരം കഴിഞ്ഞപ്പോ അടുത്തിരിക്കുന്നയാൾക്ക് ഇടക്ക് അറിയാതെ തോണ്ടുന്ന അസുഖം. കോളേജ്‌ ബാഗ്‌ വച്ച്‌ തടുത്തു നോക്കി. ഒരു സീനുണ്ടാക്കാനുള്ള ഊർജ്ജം പോയിട്ട് എണീറ്റ് നിന്ന് ഒന്നു സംസാരിക്കാൻ പോലും വയ്യാത്ത അവശതയെ അവഗണിച്ച് ഒടുക്കം അയാളോട്‌ ഒച്ചയിടേണ്ടി വന്നു. കണ്ടക്‌ടറോട്‌ പറഞ്ഞപ്പോൾ സീറ്റ് മാറ്റിത്തന്നു. അയാളെ താക്കീത്‌ ചെയ്യുകയും ചെയ്‌തു.

എന്ത് കൊണ്ടാവാം പട്ടാപ്പകൽ യാത്ര ചെയ്യുന്ന ഒരുവൾ പോലും ഇക്കോലം ആക്രമിക്കപ്പെടുന്നത്‌? ഇത്രയൊക്കെ നാടും നാട്ടാരും പുരോഗമിച്ചിട്ടും അടുത്തിരിക്കുന്ന സ്‌ത്രീ ഒരു ലൈംഗികോപകരണമല്ല, ബുദ്ധിയും ബോധവുമുള്ള ഒരു മനുഷ്യനാണെന്ന്‌ ഇവർക്കൊന്നുമെന്താ മനസ്സിലാവാത്തത്? തൊട്ടിരിക്കേണ്ടി വന്ന പെണ്ണിൻ്റെ ശരീരത്തിനകത്ത്‌ ഒരു മനസ്സുണ്ടെന്നും അവളൊരു വ്യക്‌തിയാണെന്നും ഇവരൊക്കെ എന്ന്‌ മനസ്സിലാക്കാനാണ്‌ ! പെണ്ണിന്റെ നോവുകൾ അസ്തമിക്കുന്ന കാലം എന്ന് വരാനാണ്...!