പൊട്ടിച്ചിരിച്ച് ഗവര്ണര്... ലക്ഷം പേരെ അണിനിരത്തി രാജ്ഭവന് മാര്ച്ച് നടത്തിയിട്ടും ബില് പാസാക്കിയിട്ടും കാര്യമില്ല; യു.ജി.സി ഭേദഗതിക്ക് കേന്ദ്രം, ഗവര്ണര് തന്നെ ചാന്സലറാവണം, എല്ലാ സംസ്ഥാനങ്ങള്ക്കും ബാധകം; വീണ്ടും ഗവര്ണര്; വെറ്ററിനറി സര്വകലാശാല വിസിക്കും കാരണം കാണിക്കല് നോട്ടീസ് നല്കും
ഗവര്ണറില് നിന്നും ചാന്സലര് എടുത്തുകളയാന് പഠിച്ച പണി പതിനെട്ടും നോക്കുകയാണ് പാര്ട്ടിയും സര്ക്കാരും. ഒരു ലക്ഷം പേരെ അണിനിരത്തി കാണിച്ചു. ഓര്ഡിനന്സ് ഇറക്കി. കൂടാതെ അത് റദ്ദാക്കി ബില്ലാക്കാന് നിയമസഭ വിളിച്ചു. പക്ഷെ ഒരു കാര്യവുമില്ല. അതിനപ്പുറം കളിക്കുകയാണ് ഗവര്ണര്.
ചാന്സലര് പദവിയില് നിന്ന് ഗവര്ണറെ മാറ്റാന് സംസ്ഥാനം നിയമ നിര്മ്മാണവുമായി മുന്നോട്ടു പോകുന്നതിനിടെ, യു.ജി.സി ചട്ടം ഭേദഗതി ചെയ്ത് എല്ലാ സര്വകലാശാലകളുടെയും ചാന്സലര് ഗവര്ണര് തന്നെയെന്ന് ഉറപ്പിക്കാന് ഒരുങ്ങി കേന്ദ്രം. യു.ജി.സി ചട്ടങ്ങളില് ഭേദഗതി വരുത്തി എക്സിക്യുട്ടീവ് ഉത്തരവിലൂടെ പ്രാബല്യത്തിലാക്കാനാണ് നീക്കം. ഇതോടെ സംസ്ഥാന നിയമങ്ങള്ക്ക് നിലനില്പ്പില്ലാതാവും.
കേന്ദ്ര സര്വകലാശാലകളില് രാഷ്ട്രപതി വിസിറ്ററായിരിക്കുന്ന മാതൃകയിലാവും സംസ്ഥാന സര്വകലാശാലകളില് ഗവര്ണര് തന്നെ ചാന്സലറെന്ന ഭേദഗതിക്ക് ശ്രമിക്കുന്നത്. ഇതിലൂടെ സര്വകലാശാലകളില് സംസ്ഥാനങ്ങളുടെ രാഷ്ട്രീയ ഇടപെടല് തടയാനും സ്വയംഭരണം ഉറപ്പാക്കാനും കഴിയുമെന്നാണ് വിലയിരുത്തല്. യു.ജി.സി ചട്ടം ഭേദഗതി ചെയ്താല് എല്ലാ സംസ്ഥാനങ്ങളും അത് നടപ്പാക്കിയേ പറ്റൂ.
പാര്ലമെന്റ് പാസാക്കിയ നിയമപ്രകാരം കേന്ദ്ര നിയമത്തിന് തുല്യമാണ് യു.ജി.സി റഗുലേഷന്. അത് പ്രകാരമുള്ള ഭേദഗതി സര്വകലാശാലാ നിയമങ്ങളിലും ചട്ടങ്ങളിലും വരുത്തേണ്ടിവരും. സര്ക്കാര് കൊണ്ടുവരുന്ന നിയമഭേദഗതികളൊന്നും പിന്നീട് നിലനില്ക്കില്ല. വി.സി നിയമനത്തില് യു.ജി.സി ചട്ടം പാലിക്കാത്തതിനാണ് സാങ്കേതിക സര്വകലാശാല വി.സിയായിരുന്ന ഡോ.എം.എസ്. രാജശ്രീയെ സുപ്രീംകോടതിയും ഫിഷറീസ് സര്വകലാശാല വി.സി റിജി ജോണിനെ ഹൈക്കോടതിയും പുറത്താക്കിയത്.
അതേസമയം ഗവര്ണര്മാര്ക്കെതിരെ ദക്ഷിണേന്ത്യന് സംസ്ഥാനങ്ങളുടെ കൂട്ടായ്മ രൂപപ്പെടുന്നുണ്ട്. ഇതാണ് തിടുക്കത്തിലുള്ള യു.ജി.സി നിയമ ഭേദഗതി നീക്കത്തിന് കേന്ദ്രത്തെ പ്രേരിപ്പിക്കുന്നതെന്നാണ് സൂചന. ഛത്തീസ്ഗഡ്, രാജസ്ഥാന് സംസ്ഥാനങ്ങളില് ഗവര്ണറെ നീക്കാനുള്ള നിയമം അണിയറയിലാണ്. രാജസ്ഥാനില് ചാന്സലര് പദവിയില് നിന്ന് നീക്കുന്ന ഗവര്ണര്ക്ക് വിസിറ്റര് പദവി നല്കാനാണ് നിയമ നിര്മ്മാണം.
തമിഴ്നാടും ബംഗാളും ചാന്സലര് പദവിയില് നിന്ന് നീക്കാന് ബില് പാസാക്കിയെങ്കിലും ഗവര്ണര്മാര് ഒപ്പിട്ടിട്ടില്ല. മഹാരാഷ്ട്രയില് ഉദ്ധവ് സര്ക്കാര് പാസാക്കിയ ബില് ഷിന്ഡെ സര്ക്കാര് പിന്വലിച്ചു ഭേദഗതി നടപ്പാക്കുന്നതിന് യു.ജി.സിക്ക് നിയമ തടസമില്ല. സംസ്ഥാനത്തിന് സ്വീകരിച്ചേ മതിയാകൂ. അല്ലെങ്കില് സര്വകലാശാലകള്ക്കുള്ള അംഗീകാരവും ധനസഹായവും വേണ്ടെന്നുവയ്ക്കണം.
അതേസമയം ഗവര്ണര് ആരിഫ് മുഹമ്മദ് ഖാന് കളി തുടരുകയാണ്. പുറത്താക്കാതിരിക്കാന് വിശദീകരണം ചോദിച്ച് വെറ്ററിനറി സര്വകലാശാല വി സിക്കും ഗവര്ണര് കാരണം കാണിക്കല് നോട്ടീസ് നല്കും. യുജിസി മാര്ഗ നിര്ദേശ പ്രകാരം അല്ല വി സി ഡോ.ശശീന്ദ്രനാഥിന്റെ നിയമനമെന്ന പരാതി ഉയര്ന്നിരുന്നു.സേര്ച്ച് കമ്മിറ്റിയില് യുജിസി പ്രതിനിധി ഉണ്ടായിരുന്നില്ല എന്നതടക്കം പരാതിയാണ് സേവ് യൂണിവേഴ്സിറ്റി ക്യാമ്പയിന് കമ്മിറ്റി നല്കിയത്.
വെറ്ററിനറി വിസി കൂടി ചേര്ത്താല് ഗവര്ണ്ണറുടെ നോട്ടീസ് ലഭിച്ച വിസിമാരുടെ എണ്ണം 12 ആകും. അതിനിടെ പുറത്താക്കിയ ഹൈക്കോടതി വിധിക്കെതിരെ അപ്പീല് നല്കാന് സ്ഥാനത്തു 15 ദിവസം കൂടി തുടരാന് അനുവദിക്കണം എന്ന് കുഫോസ് വിസി റിജി ജോണ് ആവശ്യപ്പെട്ടു. ഇക്കാര്യ ഉന്നയിച്ചു ഗവര്ണര്ക്ക് കത്ത് നല്കി.
ഇതിനിടെ ഗവര്ണറുടെ കാരണം കാണിക്കല് നോട്ടീസ് ചോദ്യം ചെയ്ത് വിസിമാര് നല്കിയ ഹര്ജി ഹൈക്കോടതി ഇന്ന് പരിഗണിക്കും. വൈസ് ചാന്സലര് നിയമനത്തില് തെറ്റ് ഉണ്ടെങ്കില് അത് തിരുത്താന് ചാന്സലര്ക്ക് അധികാരമില്ലെന്നാണ് വിസിമാരുടെ വാദം. റിട്ട.ജഡ്ജിയുടെ അധ്യക്ഷതയിലുള്ള സമിതിയാണ് പരിശോധനകള് നടത്തി വിസിയെ പുറത്താക്കേണ്ടതെന്നാണ് യുജിസി ചട്ടം പറയുന്നത്. ഈ ചട്ടം ചാന്സലര് ലംഘിച്ചെന്നും ഹര്ജിക്കാര് പറയുന്നു. എന്നാല് സുപ്രീം കോടതി വിധി പ്രകാരം ചാന്സലര്ക്കു ഇടപെടാമെന്നായിരുന്നു ഗവര്ണര് വാദിച്ചത്.
"
https://www.facebook.com/Malayalivartha
