അതും ഡിലീറ്റ് ചെയ്തോ... കെകെ രാഗേഷിന്റെ ഭാര്യ പ്രിയ വര്ഗീസിനെ കണ്ണൂര് സര്വകലാശാല മലയാളം വിഭാഗത്തില് അസോസിയേറ്റ് പ്രൊഫസര് ആയി നിയമിക്കാനുള്ള നീക്കം ചോദ്യം ചെയ്തുള്ള ഹര്ജിയില് ഹൈക്കോടതി ഇന്ന് വിധിപറയും; ഗവര്ണര് നടത്തിയ ആദ്യ ഇടപെടലിന് വിജയമോ പരാജയമോ എന്ന് ഇന്നറിയാം
ഗവര്ണര് ആരിഫ് മുഹമ്മദ് ഖാന്റെ ആദ്യ ഇടപടെലായിരുന്നു മുഖ്യമന്ത്രിയുടെ പ്രൈവറ്റ് സെക്രട്ടറി കെ കെ രാഗേഷിന്റെ ഭാര്യ പ്രിയാ വര്ഗീസിന്റെ നിയമനം തടഞ്ഞത്. പ്രിയ വര്ഗീസിനെ കണ്ണൂര് സര്വകലാശാലയില് അസോഷ്യേറ്റ് പ്രഫസറായി നിയമിച്ചത് ഗവര്ണര് ആരിഫ് മുഹമ്മദ് ഖാന് മരവിപ്പിച്ചിരുന്നു. ചാന്സലറുടെ അധികാരം ഉപയോഗിച്ചാണ് നടപടി. റിസര്ച് സ്കോറില് പിന്നിലായിരുന്ന പ്രിയ വര്ഗീസ് നിയമന അഭിമുഖത്തില് ഒന്നാമത് എത്തിയതുമായി ബന്ധപ്പെട്ട പരാതിയിലാണ് ഗവര്ണറുടെ നിര്ണായക തീരുമാനം.
ഗവര്ണറുടെ തീരുമാനം ശരിയായിരുന്നോ എന്ന് ഇന്ന് അറിയാം. പ്രിയ വര്ഗീസിനെ കണ്ണൂര് സര്വകലാശാല മലയാളം വിഭാഗത്തില് അസോസിയേറ്റ് പ്രൊഫസര് ആയി നിയമിക്കാനുള്ള നീക്കം ചോദ്യം ചെയ്തുള്ള ഹര്ജിയില് ഹൈക്കോടതി ഇന്ന് വിധിപറയും.
ഉച്ചയ്ക്ക് 1.45 ന് ജസ്റ്റിസ് ദേവന് രാമചന്ദ്രന് ആണ് വിധി പറയുക. ഇന്നലെ ഹൈക്കോടതി പ്രിയയ്ക്കെതിരെ രൂക്ഷമായ വിമര്ശനമാണ് ഉയര്ത്തിയത്. നാഷണല് സര്വീസ് സ്കീമിന്റെ ഭാഗമായി കുഴി വെട്ടിയത് അസോസിയേറ്റ് പ്രൊഫസര് നിയമനത്തിനുള്ള അദ്ധ്യാപന പരിചയമായി കണക്കാക്കാനാവില്ലെന്ന് കോടതി പരിഹസിക്കുകയും ചെയ്തു.
അദ്ധ്യാപനം ഗൗരവമുള്ള ജോലിയാണ്. എന് എസ് എസ് കോ-ഓര്ഡിനേറ്റര് പദവി അദ്ധ്യാപന പരിചയമായി കാണാനാവില്ല. അസോ. പ്രൊഫസര് നിയമനത്തിന് എട്ടു വര്ഷത്തെ അദ്ധ്യാപന പരിചയം വേണമെന്നു പറയുമ്പോള് അത്രയും വര്ഷം പഠിപ്പിച്ചിരിക്കണം. സ്പോര്ട്സ് കോച്ച് അദ്ധ്യാപക തസ്തികയാണ്. എന്നാല് ഈ കാറ്റഗറിയിലെ പ്രവര്ത്തനം അദ്ധ്യാപന പരിചയമായി കാണാനാവില്ല.
പ്രിയ വര്ഗീസ് എന് എസ് എസ് കോ-ഓര്ഡിനേറ്റര് കൂടിയായിരുന്നെന്ന് ഇപ്പോഴാണ് പറയുന്നത്. സ്ക്രൂട്ടിനി കമ്മിറ്റിക്കു മുന്നില് പറയാത്ത യോഗ്യതകളൊന്നും കോടതിയില് ഉന്നയിക്കാനാവില്ലെന്നും സിംഗിള്ബെഞ്ച് പറഞ്ഞു. പ്രിയയെ നിയമിക്കുന്നതിനെതിരെ റാങ്ക് ലിസ്റ്റിലെ രണ്ടാം സ്ഥാനക്കാരന് ചങ്ങനാശേരി എസ്.ബി കോളേജിലെ മലയാളം വിഭാഗം മേധാവി ജോസഫ് സ്കറിയയാണ് ഹര്ജി നല്കിയിട്ടുള്ളത്.
ഹര്ജിക്കാരന്റെ വാദം ഇങ്ങനെയായിരുന്നു. പ്രിയയ്ക്ക് അഞ്ചു വര്ഷവും അഞ്ചു ദിവസവും മാത്രമാണ് പരിചയം. പ്രിയ പിഎച്ച് ഡി പഠനത്തിനു പോയതും സ്റ്റുഡന്റ്സ് ഡയറക്ടറായി ഡെപ്യൂട്ടേഷനില് പോയതുമൊക്കെ അദ്ധ്യാപന പരിചയമായി കണക്കാക്കിയാണ് നിയമനം നല്കാനൊരുങ്ങുന്നത്.
അതേസമയം പ്രിയ വര്ഗീസിന്റെ വാദം മറിച്ചായിരുന്നു. പി.എച്ച് ഡി പഠനവും ഡെപ്യൂട്ടേഷന് കാലാവധിയുമൊക്കെ അദ്ധ്യാപന പരിചയമായി കണക്കാക്കാം. സ്റ്റുഡന്റ്സ് ഡയറക്ടര് പദവിയിലിരിക്കെ എന് എസ് എസ് കോ -ഓര്ഡിനേറ്ററായിരുന്നു.
അതേസമയം യു.ജി.സിയുടെ വാദിച്ചത് അദ്ധ്യാപനത്തോടൊപ്പം ഗവേഷണം നടത്തിയാലേ അക്കാലയളവ് അദ്ധ്യാപന പരിചയമായി കണക്കാക്കാന് കഴിയൂ. പ്രിയയുടെ ഗവേഷണകാലം അദ്ധ്യാപന പരിചയത്തില്പ്പെടുന്നില്ല. പിഎച്ച് ഡി ഹാജര് സംബന്ധിച്ചും സംശയമുണ്ട്.
അതേസമയം ഹൈക്കോടതിയുടെ ചോദ്യങ്ങള് ഇതായിരുന്നു. ഡെപ്യൂട്ടേഷന് കാലയളവില് പഠിപ്പിക്കാന് നിര്ദ്ദേശിച്ചിരുന്നോ? സ്റ്റുഡന്റ്സ് ഡയറക്ടര് പദവി വഹിക്കുന്നത് എങ്ങനെ അദ്ധ്യാപന പരിചയമാവും? എന് എസ് എസ് കോ-ഓര്ഡിനേറ്ററായിരുന്നത് ഇപ്പോഴല്ലേ പറയുന്നത് ? മതിയായ യോഗ്യതയുടെ വിവരങ്ങള് അപേക്ഷയോടൊപ്പം നല്കിയിരുന്നോ? സ്ക്രൂട്ടിനി കമ്മിറ്റിക്കു നല്കാത്ത വിവരങ്ങള് കോടതിയില് പറഞ്ഞിട്ടെന്തുകാര്യം?
എല്ലാ ചോദ്യങ്ങള്ക്കും ഉത്തരമായി ഇന്ന് വിധിയുണ്ടാകും. അതേസമയം കണ്ണൂര് സര്വകലാശാല അസോഷ്യേറ്റ് പ്രഫസര് നിയമനത്തില് ഹൈക്കോടതിയുടെ വിമര്ശനം വന്നതിനു പിന്നാലെ പരിഹസിച്ച് ഫെയിസ്ബുക്കില് പോസ്റ്റിട്ട് പ്രിയ വര്ഗീസ്. നാഷനല് സര്വീസ് സ്കീമിനു വേണ്ടി കുഴിയല്ല കക്കൂസ് വെട്ടിയെങ്കിലും അഭിമാനം മാത്രം എന്നാണു പ്രിയ പോസ്റ്റിട്ടത്. എന്നാല് പോസ്റ്റ് വിവാദമായതോടെ പ്രിയ വര്ഗീസ് അത് ഡിലീറ്റ് ചെയ്തു.
"
https://www.facebook.com/Malayalivartha
