കേരളത്തിന്റെ നാനാ ഭാഗങ്ങളില്‍ നിന്നും ഒരു ലക്ഷം പേരെ രാജ്ഭവന് മുന്നില്‍ സിപിഎം അണിനിരത്തിയപ്പോള്‍ സാക്ഷാല്‍ ഗവര്‍ണര്‍ പോലും അന്താളിച്ചതാണ്. ഉന്നത വിദ്യാഭ്യാസം സംരക്ഷിക്കാന്‍ ഇത്രയും പേര്‍ എത്തിയല്ലോ. എന്നാല്‍ ഉന്നത വിദ്യാഭ്യാസം സംരക്ഷിച്ചതിന്റെ രണ്ട് ദിവസത്തിനകം തന്നെ ഹൈക്കോടതി ഉന്നത വിദ്യാഭ്യാസം സംരക്ഷിച്ചിരിക്കുകയാണ്.

സിപിഎം പറഞ്ഞതെല്ലാം പൊളിയുകയാണ്. മാത്രമല്ല ഗവര്‍ണര്‍ പറഞ്ഞതാണ് ശരിയെന്നും വന്നിരിക്കുകയാണ്. സിപിഎം നേതാക്കളുടെ ബന്ധുക്കളെ മാനദണ്ഡങ്ങള്‍ പാലിക്കാതെ സര്‍വകലാശാലകളില്‍ നിയമിക്കുന്നുവെന്ന ഗവര്‍ണര്‍ അടക്കമുള്ളവരുടെ ആരോപണങ്ങള്‍ക്കു ശക്തി പകരുന്നതാണ് ഹൈക്കോടതി വിധി.

മുഖ്യമന്ത്രിയുടെ പ്രൈവറ്റ് സെക്രട്ടറി കെ.കെ.രാഗേഷിന്റെ ഭാര്യ പ്രിയാ വര്‍ഗീസിനു അധ്യാപന പരിചയമില്ലെന്നു കോടതി പറയുമ്പോള്‍ സര്‍വകലാശാലാ വിവാദങ്ങള്‍ക്കിടെ സര്‍ക്കാരിനും തിരിച്ചടിയാണ്. പ്രിയാ വര്‍ഗീസിന്റെ നിയമന വിവാദം ഉയര്‍ന്നപ്പോള്‍, സിപിഎം നേതാക്കളുടെ ബന്ധുക്കള്‍ക്ക് യോഗ്യതയുണ്ടെങ്കില്‍ നിയമനം നടത്തുന്നതില്‍ എന്താണ് തെറ്റ് എന്ന സര്‍ക്കാരിന്റെയും പാര്‍ട്ടിയുടെയും വാദങ്ങള്‍ കോടതി വിധിയോടെ ദുര്‍ബലമായി.

പ്രിയാ വര്‍ഗീസിന്റെ നിയമനത്തെ ശക്തമായി വിമര്‍ശിച്ച ഗവര്‍ണര്‍ക്കു സര്‍ക്കാരുമായുള്ള പോരാട്ടത്തില്‍ പുതിയ ആയുധങ്ങള്‍ ലഭിച്ചു. 2021 നവംബര്‍ 18ന് ധൃതിവച്ചു നടത്തിയ ഓണ്‍ലൈന്‍ ഇന്റര്‍വ്യൂവില്‍ പ്രിയാ വര്‍ഗീസിന് ഒന്നാം റാങ്ക് നല്‍കിയതിന്റെ പാരിതോഷികമായാണ് 2021 നവംബര്‍ 23ന് വിസി കാലാവധി അവസാനിച്ച ഡോ: ഗോപിനാഥ് രവീന്ദ്രനു പുനര്‍നിയമനം നല്‍കിയതെന്നു നേരത്തെ ആക്ഷേപം ഉണ്ടായിരുന്നു. പ്രിയയ്ക്ക് ഒന്നാം റാങ്ക് നല്‍കി കൃത്യം ഒരു വര്‍ഷം കഴിഞ്ഞ ദിവസമാണ് കോടതി നിയമനം അസാധുവാക്കുന്നത്. രേഖകള്‍ പരിശോധിക്കാതെ നിയമനം നല്‍കിയതിനാല്‍ ഗോപിനാഥ് രവീന്ദ്രനെതിരെ നടപടി വേണമെന്ന് ആവശ്യമുയരാം.

അടുത്ത മാസം ആരംഭിക്കുന്ന നിയമസഭാ സമ്മേളനത്തില്‍ പ്രതിപക്ഷത്തിന് ആയുധം നല്‍കുന്നതായി കോടതി വിധി. പ്രിയാ വര്‍ഗീസിനെ കണ്ണൂര്‍ സര്‍വകലാശാലയില്‍ മലയാളം അസോഷ്യേറ്റ് പ്രൊഫസറായി ഒന്നാം റാങ്ക് നല്‍കി നിയമിച്ചതിലാണ് ഹൈക്കോടതി ഇടപെട്ടത്. പ്രിയ വര്‍ഗീസിനു മതിയായ അധ്യാപന പരിചയമില്ലാത്തതിനാല്‍ റാങ്ക് പട്ടിക പുനഃക്രമീകരിക്കാന്‍ ജസ്റ്റിസ്. ദേവന്‍ രാമചന്ദ്രന്‍ ഉത്തരവിട്ടു.

രണ്ടാം റാങ്കുകാരനായ ചങ്ങനാശ്ശേരി എസ്.ബി. കോളജ് മലയാളം അധ്യാപകന്‍ ഡോ. ജോസഫ് സ്‌കറിയയാണ് ഹര്‍ജി ഫയല്‍ ചെയ്തത്. സേവ് യൂണിവേഴ്‌സിറ്റി ക്യാംപെയ്ന്‍ കമ്മിറ്റിയും നടപടിയെ ചോദ്യം ചെയ്തു. സേവ് യൂണിവേഴ്‌സിറ്റി ക്യാംപെയ്ന്‍ കമ്മിറ്റിയുടെ പരാതിയുടെ അടിസ്ഥാനത്തില്‍ ഗവര്‍ണര്‍ നേരത്തെ പ്രിയ വര്‍ഗീസിന്റെ നിയമനം സ്റ്റേ ചെയ്തിരുന്നു.

കണ്ണൂര്‍ സര്‍വകലാശാലയിലെ മലയാളം അസോഷ്യേറ്റ് പ്രൊഫസര്‍ നിയമനത്തിനുള്ള അപേക്ഷ 2021 നവംബര്‍ 12 വരെയാണ് സ്വീകരിച്ചത്. 10 പേരാണ് അപേക്ഷ സമര്‍പ്പിച്ചത്. ഡോക്ടറേറ്റ് ബിരുദവും എട്ടു വര്‍ഷത്തെ അധ്യാപന പരിചയവുമാണ് അസോഷ്യേറ്റ് പ്രഫസര്‍ക്കുള്ള യോഗ്യതയായി നിശ്ചയിച്ചിരുന്നത്. തൊട്ടടുത്ത ദിവസം പിവിസിയുടെ അധ്യക്ഷതയില്‍ സ്‌ക്രീനിങ് കമ്മിറ്റി കൂടി പ്രിയ വര്‍ഗീസ് ഉള്‍പ്പെടെ ആറുപേരെ അഭിമുഖത്തിനു ക്ഷണിച്ചു.

നവംബര്‍ 18ന് ഓണ്‍ലൈന്‍ ഇന്റര്‍വ്യൂ നടത്തി ഒന്നാം റാങ്ക് പ്രിയ വര്‍ഗീസിനും രണ്ടാം റാങ്ക് എസ്.ബി. കോളജ് അധ്യാപകനായ ജോസഫ് സ്‌കറിയയ്ക്കും മൂന്നാം റാങ്ക് മലയാളം സര്‍വകലാശാലയിലെ സി. ഗണേശനും നല്‍കി. 651 റിസര്‍ച്ച് സ്‌കോര്‍ പോയിന്റ് ഉള്ള ജോസഫ് സ്‌കറിയയെയും 645 സ്‌കോര്‍ പോയിന്റ് ഉള്ള സി. ഗണേശനെയും പിന്തള്ളിയാണ് 156 സ്‌കോര്‍ പോയിന്റ് മാത്രമുള്ള പ്രിയ വര്‍ഗീസിന് ഒന്നാം റാങ്ക് നല്‍കിയത്.

2012 മാര്‍ച്ചില്‍ തൃശൂര്‍ കേരളവര്‍മ കോളജില്‍ അസി.പ്രഫസര്‍ ആയി നിയമിതയായ പ്രിയ വര്‍ഗീസ് 2015 മുതല്‍ 18 വരെ മൂന്നു വര്‍ഷക്കാലം ഗവേഷണത്തിന് അവധിയിലായിരുന്നു. ഗവേഷണ കാലം പൂര്‍ത്തിയാക്കിയ പ്രിയ വര്‍ഗീസ് രണ്ടു വര്‍ഷം കണ്ണൂര്‍ സര്‍വകലാശാലയില്‍ സ്റ്റുഡന്‍സ് സര്‍വീസ് ഡയറക്ടറായി ഡപ്യൂട്ടേഷനില്‍ ജോലി ചെയ്തു. തുടര്‍ന്ന്, തിരുവനന്തപുരം ഭാഷ ഇന്‍സ്റ്റിറ്റ്യൂട്ടില്‍ അസിസ്റ്റന്റ് ഡയറക്ടറായി ഡപ്യൂട്ടേഷനില്‍ നിയമനം നേടി. ഗവേഷണ അവധിക്കാലവും കണ്ണൂര്‍ സര്‍വ്വകലാശാല സ്റ്റുഡന്റസ് സര്‍വീസ് ഡയറക്ടര്‍ നിയമനവും ഭാഷ ഇന്‍സ്റ്റിറ്റ്യൂട്ടിലെ അസി. ഡയറക്ടര്‍ കാലവും അംഗീകൃത അധ്യാപക പരിചയമായി കണക്കിലെടുത്താണ് പ്രിയാ വര്‍ഗീസിനെ സ്‌ക്രീനിങ് കമ്മിറ്റി അഭിമുഖ പട്ടികയില്‍ ഉള്‍പ്പെടുത്തിയത്. അനധ്യാപക തസ്തികയായ സ്റ്റുഡന്‍സ് ഡയറക്ടര്‍, ഭാഷ ഇന്‍സ്റ്റിറ്റ്യൂട്ട് ഡയറക്ടര്‍ എന്നിവിടത്തെ കാലഘട്ടവും ഗവേഷണ കാലവും അധ്യാപക പരിചയമായി കണക്കുകൂട്ടാനാവില്ലെന്നാണ് ഹൈക്കോടതി വ്യക്തമാക്കിയിരിക്കുന്നത്. എന്തായാലും പന്ത് വീണ്ടും ഗവര്‍ണറുടെ കോര്‍ട്ടിലായി. ബാക്കി കാത്തിരുന്ന് കാണാം.