ശബരിമലയില്‍ ഭക്തരുടെ ഒഴുക്ക്.... മണ്ഡലകാല തീര്‍ഥാടനത്തിന് തുടക്കം കുറിച്ച വൃശ്ചിക പുലരിയില്‍ സന്നിധാനത്ത് വലിയ ഭക്തജനതിരക്ക്. ആന്ധ്ര, തെലങ്കാന, തമിഴ്നാട്, കര്‍ണാടക സംസ്ഥാനങ്ങളില്‍ നിന്നുള്ളവരായിരുന്നു തീര്‍ഥാടകരില്‍ ഏറെയും.

ആദ്യ 2 മണിക്കൂറില്‍ 12,854 തീര്‍ഥാടകര്‍ ദര്‍ശനം നടത്തിയതായാണു പൊലീസിന്റെ കണക്ക്. 43000 തീര്‍ഥാടകരാണ് ഇന്നലെ ബുക്ക് ചെയ്ത് ദര്‍ശനത്തിന് എത്തിയത്. പുലര്‍ച്ചെ 3ന് നട തുറന്നതിനാല്‍ സൂര്യനുദിക്കും മുന്‍പേ ദര്‍ശനം കഴിഞ്ഞ് നല്ലൊരു ഭാഗം തീര്‍ഥാടകരും മലയിറങ്ങി. അതിനാല്‍ പിന്നീട് വലിയ തിരക്കില്ലായിരുന്നു.

പിന്നീട് എത്തിയ അയ്യപ്പന്മാര്‍ വലിയ നടപ്പന്തലില്‍ മൂന്നു വരിയായി പതിനെട്ടാംപടി കയറാന്‍ കാത്തു നിന്നു. പരമാവധി ഒരു മണിക്കൂറിനുള്ളില്‍ അവര്‍ക്ക് പതിനെട്ടാംപടി ചവിട്ടി അയ്യപ്പ ദര്‍ശനം നടത്താന്‍ കഴിഞ്ഞു. കളഭാഭിഷേകത്തോടെയാണ് ഉച്ചപൂജ നടന്നത്. മന്ത്രി കെ.രാധാകൃഷ്ണന്‍, ദേവസ്വം ബോര്‍ഡ് പ്രസിഡന്റ് കെ.അനന്തഗോപന്‍ എന്നിവര്‍ നിര്‍മാല്യം തൊഴാന്‍ ഉണ്ടായിരുന്നു.

അതേസമയം കൊച്ചു കുട്ടികളും മാളികപ്പുറങ്ങളുമായി അയ്യപ്പന്മാര്‍ വലിയ സംഘങ്ങളായാണ് സന്നിധാനത്തേക്ക് എത്തുന്നത്. കോവിഡ് കാലത്ത് കുട്ടികളുമായി എത്താന്‍ കഴിയാതിരുന്ന ഭക്തരെല്ലാം ഇത്തവണ എത്തുന്നതു മൂലം കന്നി അയ്യപ്പന്മാരുടെ വലിയ തിരക്ക് തന്നെ ഉണ്ടാകുമെന്നാണ് കരുതുന്നത്

.

വൃശ്ചിക പുലരിയില്‍ പുതിയ മേല്‍ശാന്തി കെ. ജയരാമന്‍ നമ്പൂതിരിയാണ് ശ്രീകോവില്‍ നട തുറന്നത്. പുലര്‍ച്ച മൂന്നുമണിക്ക് നട തുറന്നപ്പോള്‍ ദര്‍ശനത്തിനായി അയ്യപ്പന്മാരുടെ വലിയനിര വലിയ നടപ്പന്തലിലും സോപാനത്തും ഇടംപിടിച്ചിരുന്നു. രാവിലെ അഭിഷേകം, ഗണപതിഹോമം, ഉഷപൂജ എന്നിവ നടന്നു. സവിശേഷമായ നെയ്യ് അഭിഷേകം നടത്തിയാണ് തീര്‍ഥാടകരുടെ മടക്കം.