കൊച്ചിയില്‍ കാനയില്‍ മൂന്ന് വയസുകാരന്‍ വീണ സംഭവത്തില്‍ യൂത്ത് കോണ്‍ഗ്രസ് നടത്തിയ പ്രതിഷേധം അതിരു വിട്ടതായി ആക്ഷേപം. യൂത്ത് കോണ്‍ഗ്രസ് ഏഴുവയസുകാരന്റെ വസ്ത്രമഴിച്ച് നിലത്തു കിടത്തിയാണ് പ്രതിഷേധിച്ചത്. പനമ്പിള്ളി നഗറില്‍ മൂന്നുവയസുകാരന്‍ കാനയില്‍ വീണതില്‍ കൊച്ചി കോര്‍പ്പറേഷന്‍ ഓഫീസിനുമുന്നില്‍ യൂത്ത് കോണ്‍ഗ്രസ് സംഘടിപ്പിച്ച സമര വേദിയിലായിരുന്നു കുട്ടിയും പങ്കെടുത്തത്.

വസ്ത്രമഴിപ്പിച്ച് കുട്ടിയെ സമരത്തില്‍ പങ്കെടുപ്പിച്ചതിനെതിരെ വിമര്‍ശനം ഉയര്‍ന്നിട്ടുണ്ട്. കുട്ടിയുടെ ദേഹത്ത് ചുള്ളിക്കമ്പുകളും പ്രതിഷേധത്തിന്റെ ഭാഗമായി വിതറിയിരുന്നു. ഈ പ്രതിഷേധ രീതികണ്ടിട്ടെങ്കിലും മേയറുടെ കണ്ണു തുറക്കട്ടെ എന്നുകരുതിയാണ് സമരത്തില്‍ ഏഴുവയസുകാരനെയും പങ്കെടുപ്പിച്ചത് എന്നാണ് യൂത്ത് കോണ്‍ഗ്രസിന്റെ വിശദീകരണം.

അതേ സമയം കാനയില്‍ വീണ കുട്ടിക്ക് എന്തെങ്കിലും സംഭവിച്ചിരുന്നെങ്കില്‍ ആര് സമാധാനം പറയുമായിരുന്നു എന്ന് ഹൈക്കോടതി വിഷയം പരിഗണിക്കവേ ആരാഞ്ഞു. എത്രയും വേഗം നടപടി സ്വീകരിക്കണമെന്ന് ബന്ധപ്പെട്ട ഉദ്യോഗസ്ഥരോട് കോടതി നിര്‍ദേശിക്കുകയും ചെയ്തു. സംഭവത്തില്‍ ക്ഷമചോദിച്ച കോര്‍പ്പറേഷന്‍ സെക്രട്ടറി രണ്ടാഴ്ച്ചക്കുള്ളില്‍ ഓവുചാലുകള്‍ക്ക് സ്ലാബുകള്‍ ഇടുമെന്നും ഹൈക്കോടതിയെ അറിയിച്ചു. അഭിഭാഷകര്‍ ഇന്ന് രാവിലെയാണ് സംഭവം ജസ്റ്റിസ് ദേവന്‍ രാമചന്ദ്രന്റെ ശ്രദ്ധയില്‍പ്പെടുത്തിയത്.

ഇന്നലെ രാത്രി ഏഴ് മണിയോടെയാണ് സംഭവമുണ്ടായത്. മെട്രോയില്‍ നിന്നിറങ്ങി മാതാവിനൊപ്പം നടന്ന് വീട്ടിലേയ്ക്ക് പോവുകയായിരുന്നു കുട്ടി. ഇതിനിടെയാണ് അപകടമുണ്ടായത്. ഒപ്പമുണ്ടായിരുന്ന അമ്മ കുട്ടിയെ ഉടന്‍ പിടിച്ചുകയറ്റിയതിനാല്‍ വലിയ അപകടം ഒഴിവായി.

ആശുപത്രിയില്‍ ചികിത്സയില്‍ കഴിയുന്ന കുട്ടിയുടെ ആരോഗ്യനില തൃപ്തികരമാണെന്ന് ആശുപത്രി അധികൃതര്‍ അറിയിച്ചു. ഈ കാന മൂടണമെന്ന് പരിസരവാസികളും കൗണ്‍സിലറും ഉള്‍പ്പെടെയുള്ളവര്‍ നിരവധി തവണ ആവശ്യപ്പെട്ടിരുന്നു. എന്നാല്‍ അധികൃതര്‍ വേണ്ട നടപടി സ്വീകരിക്കാത്തതാണ് അപകടത്തിന് കാരണം.