ശശി തരൂരിന്റെ വളര്‍ച്ചയെ തടഞ്ഞ കേരള നേതാക്കള്‍ക്ക് മുട്ടന്‍ പണി. ഗുജറാത്തില്‍ പോയി തരൂരിനെതിരെ വോട്ട് പിടിച്ച രമേഷ് ചെന്നിത്തലയെ പ്രത്യേകിച്ചും മറക്കില്ല. കേരളത്തില്‍ ചുവടു വയ്ക്കാനിരിക്കുന്ന കെസി വേണുഗോപാല്‍ ഉള്‍പ്പെടെയുള്ള നേതാക്കള്‍ക്ക് തടസമാണ് ശശി തരൂര്‍.

കോണ്‍ഗ്രസ് അധ്യക്ഷ സ്ഥാനത്തേക്കുള്ള മത്സരത്തില്‍ പരാജയപ്പെട്ടെങ്കിലും പ്രവര്‍ത്തകര്‍ക്കിടയില്‍ നേടാനായ സ്വീകാര്യതയുടെ ബലത്തില്‍ ശശി തരൂര്‍ സംസ്ഥാനരാഷ്ട്രീയത്തില്‍ സജീവമാകാനൊരുങ്ങുന്നു. ആദ്യഘട്ടത്തില്‍ എല്ലാ ജില്ലകളിലും സംവാദങ്ങളും പ്രഭാഷണങ്ങളുമൊരുക്കിയാണ് തരൂര്‍ ക്യാമ്പ് അവസരമൊരുക്കുന്നത്. മലബാര്‍ ജില്ലകളിലാണ് അദ്ദേഹം ആദ്യമെത്തുന്നത്. മുസ്ലിംലീഗ് നേതാക്കളുമായുള്ള കൂടിക്കാഴ്ചയാണ് ഇതില്‍ ശ്രദ്ധേയം. 20-ന് കോഴിക്കോട്ടുനിന്നാണ് തരൂര്‍ പര്യടനം തുടങ്ങുക.

എന്‍എസ്എസുമായും ഒപ്പം ചേരുന്നു. പെരുന്നയില്‍ എന്‍എസ്എസ് ആസ്ഥാനത്ത് ജനുവരി 2ന് നടക്കുന്ന മന്നം ജയന്തി സമ്മേളനം ശശി തരൂര്‍ എംപി ഉദ്ഘാടനം ചെയ്യുമെന്ന് എന്‍എസ്എസ് നേതൃത്വം സ്ഥിരീകരിച്ചു. നായര്‍ സര്‍വീസ് സൊസൈറ്റിയുടെ ഏറ്റവും പ്രധാന ചടങ്ങാണ് സമുദായാചാര്യന്‍ മന്നത്തു പത്മനാഭന്റെ ജയന്തി ആഘോഷം. 146ാം മന്നം ജയന്തി ആഘോഷമാണ് ഇത്തവണത്തേത്. എന്‍എസ്എസിന്റെ സുപ്രധാന സമ്മേളനത്തില്‍ ഇത് ആദ്യമായാണു തരൂരിനു ക്ഷണം.

20 മുതല്‍ മലബാറിലെ 3 ജില്ലകളില്‍ വിവിധ പരിപാടികളില്‍ പങ്കെടുക്കുന്ന തരൂരിന്റെ തെക്കന്‍ ജില്ലകളിലെ പ്രധാന പരിപാടിയാണ് എന്‍എസ്എസ് ആസ്ഥാനത്തേത്. പാലായില്‍ കെ.എം.ചാണ്ടി അനുസ്മരണത്തിനും തരൂരാണ് മുഖ്യാതിഥി.

അതേസമയം നാളെയാണു വടക്കന്‍ ജില്ലകളിലെ തരൂരിന്റെ പരിപാടികള്‍ ആരംഭിക്കുന്നത്. ഇന്ത്യന്‍ ലോയേഴ്‌സ് കോണ്‍ഗ്രസും കാലിക്കറ്റ് ചേംബര്‍ ഓഫ് കൊമേഴ്‌സും സംഘടിപ്പിക്കുന്ന പരിപാടികള്‍ കൂടാതെ 'സംഘപരിവാറും മതനിരപേക്ഷത നേരിടുന്ന വെല്ലുവിളികളും' എന്ന വിഷയത്തില്‍ കോഴിക്കോട്ട് നാളെ അദ്ദേഹം പ്രഭാഷണവും നടത്തുന്നുണ്ട്.

22ന് രാവിലെ തരൂര്‍ പാണക്കാട് തറവാട്ടില്‍ എത്തി മുസ്ലിം ലീഗ് സംസ്ഥാന പ്രസിഡന്റ് സാദിഖലി ശിഹാബ് തങ്ങളെയും പി.കെ.കുഞ്ഞാലിക്കുട്ടിയെയും കാണുന്നുവെന്ന വിവരം കോണ്‍ഗ്രസ്, യുഡിഎഫ് കേന്ദ്രങ്ങളില്‍ വലിയ ചര്‍ച്ചയ്ക്കു വഴി തുറന്നു. യുവസ്ത്രീ വോട്ടര്‍മാരെ ആകര്‍ഷിക്കാന്‍ കഴിയുന്ന തരൂരിനെ യുഡിഎഫ് പരമാവധി പ്രയോജനപ്പെടുത്തണമെന്ന നിലപാടാണ് ലീഗിന് ഉള്ളത്.

ലീഗ് ഈ സമീപനം എടുത്ത അതേ സമയത്താണ് എന്‍എസ്എസും തരൂരിനോടുള്ള പിന്തുണ വ്യക്തമാക്കുന്നത്. തരൂരിന്റെ ഈ നീക്കങ്ങളെ പ്രത്യക്ഷത്തില്‍ എതിര്‍ക്കുന്നില്ലെങ്കിലും സംസ്ഥാന നേതൃത്വത്തിന്റേതു തുറന്ന സമീപനമാണോ എന്നു സംശയിക്കുന്നവരുണ്ട്. എന്നാല്‍, ഒരു വിഭാഗം നേതാക്കളും പ്രവര്‍ത്തകരും അദ്ദേഹത്തിനു പിന്തുണ പ്രഖ്യാപിച്ചു രംഗത്തുണ്ട്. ഇതു ഗ്രൂപ്പിനതീതമായ പൊതുവികാരത്തിന്റെ ഭാഗമായുള്ള നീക്കവുമാണ്.

തരൂരിന്റെ ജനസ്വീകാര്യത മുന്നണിക്കായി പരമാവധി ഉപയോഗപ്പെടുത്തണമെന്നാണ് ഇവരുടെ വാദം. അധ്യക്ഷ തിരഞ്ഞെടുപ്പില്‍ തരൂരിന് പരസ്യമായി പിന്തുണ പ്രഖ്യാപിച്ച എം.കെ. രാഘവന്‍ എം.പി.യാണ് പരിപാടികള്‍ ഏകോപിപ്പിക്കുന്നത്. കോഴിക്കോട് ഡി.സി.സി. മുന്‍ പ്രസിഡന്റ് കെ.സി. അബു ഉള്‍പ്പെടെയുള്ളവരും പിന്തുണയുമായെത്തിയിരുന്നു.

ഗുജറാത്ത്, ഹിമാചല്‍ പ്രദേശ് സംസ്ഥാനങ്ങളിലെ നിയമസഭാ തിരഞ്ഞെടുപ്പുകളിലെ താരപ്രചാരകരുടെ പട്ടികയില്‍നിന്ന് തരൂരിനെ നേതൃത്വം ഒഴിവാക്കിയിരുന്നെങ്കിലും സ്ഥാനാര്‍ഥികളും നേതാക്കളും പ്രചാരണത്തിനെത്താന്‍ അദ്ദേഹത്തെ സമീപിച്ചിരുന്നു. പട്ടികയില്‍ നിന്നൊഴിവാക്കിയതിനാല്‍ അദ്ദേഹം ഈ ക്ഷണം സ്വീകരിച്ചിരുന്നില്ല. ഈ സമയത്തുതന്നെയാണ് അദ്ദേഹം അപ്രഖ്യാപിത കേരള പര്യടനം തുടങ്ങുന്നതും. പുതിയൊരു മുഖം വേണമെന്ന അണികളുടെയും നിഷ്പക്ഷ നിലപാടുള്ളവരുടെയും ചിന്ത ഗുണംചെയ്യുമെന്നാണ് തരൂര്‍ ക്യാമ്പിന്റെ വിലയിരുത്തല്‍. പ്രൊഫഷണല്‍സ്, യുവാക്കള്‍, വിദ്യാര്‍ഥികള്‍ തുടങ്ങിയവരുമായുള്ള സംവാദ പരിപാടികള്‍ക്ക് ഊന്നല്‍നല്‍കുന്നതും ഇതിന്റെ ബലത്തിലാണ്. കോഴിക്കോട് ബാര്‍ അസോസിയേഷന്‍, ഐ.എം.എ. തുടങ്ങിയ സംഘടനകളുടെ പരിപാടിയില്‍ പങ്കെടുക്കുന്നുണ്ട്.