ലോകക്കപ്പില്‍ ഒന്നും അസാധ്യമല്ല എന്ന് തെളിയിക്കുന്നതാണ് കാമറൂണിന്റെ വിജയം. ഫിഫ ലോകകപ്പില്‍ ബ്രസീലിനെ ഏകപക്ഷീയമായ ഒരു ഗോളിന് തോല്‍പിച്ചു. എങ്കിലും കാമറൂണിന്റെ പ്രീക്വാര്‍ട്ടര്‍ പ്രതീക്ഷകള്‍ അവസാനിച്ചു. ജി ഗ്രൂപ്പില്‍ നാലു പോയിന്റുമായി മൂന്നാം സ്ഥാനത്താണ് കാമറൂണ്‍. സ്വിറ്റ്‌സര്‍ലന്‍ഡ് രണ്ടിനെതിരെ മൂന്നു ഗോളുകള്‍ക്കു സെര്‍ബിയയെ കീഴടക്കിയതോടെ രണ്ടാം സ്ഥാനക്കാരായി സ്വിസ് പട പ്രീക്വാര്‍ട്ടര്‍ ഉറപ്പിച്ചു. രണ്ടു വിജയവും ഒരു തോല്‍വിയുമായി സ്വിറ്റ്‌സര്‍ലന്‍ഡിന് ആറു പോയിന്റുണ്ട്.

ഗ്രൂപ്പ് ജിയിലെ അവസാന പോരാട്ടങ്ങളില്‍ ബ്രസീലിന്റെ വിജയ സ്വപ്നങ്ങളെ കരിച്ച് കാമറൂണ്‍ എതിരില്ലാത്ത ഒരു ഗോളിന്റെ വിജയമാണ് സ്വന്തമാക്കിയത്. ബ്രസീല്‍ നേരത്തെ തന്നെ പ്രീ ക്വാര്‍ട്ടര്‍ ഉറപ്പിച്ചിരുന്നു. സെര്‍ബിയക്കെതിരെ രണ്ടിനെതിരെ മൂന്ന് ഗോളുകള്‍ക്ക് വിജയം നേടി സ്വിറ്റ്‌സര്‍ലാന്‍ഡും അവസാന 16ലേക്ക് കുതിച്ചു.

വിന്‍സെന്റ് അബൂബക്കര്‍ നേടിയ മിന്നും ഗോളിലാണ് കാമറൂണ്‍ എക്കാലവും ഓര്‍ത്തിരിക്കാനാവുന്ന വിജയം പേരിലെഴുതിയത്. രണ്ടാം നിരയാണ് കളത്തില്‍ എന്ന് കടലാസില്‍ പറയുമെങ്കിലും ഒന്നിനൊന്ന് മെച്ചപ്പെട്ട താരങ്ങളാണ് ബ്രസീലിന് വേണ്ടി എല്ലാ പൊസിഷനിലും ഉണ്ടായിരുന്നത്. പ്രീക്വാര്‍ട്ടര്‍ ഉറപ്പിച്ചെങ്കിലും മിന്നും വിജയം ലക്ഷ്യമിട്ട് തന്നെയാണ് ഇറങ്ങിയതെന്ന് കാനറികളുടെ ആദ്യ കുതിപ്പുകള്‍ വ്യക്തമാക്കി. ആദ്യ നിമിഷങ്ങളില്‍ ആന്റണി, പിന്നീട് മാര്‍ട്ടിനെല്ലി, അതു കഴിഞ്ഞ് റോഡ്രിഗോ എന്നിവരുടെ അതിവേഗ നീക്കങ്ങള്‍ക്ക് തടയിടാന്‍ കാമറൂണ്‍ നന്നേ പണിപ്പെട്ടു.

പലപ്പോഴും ഫൗളുകളിലൂടെയാണ് കാമറൂണ്‍ അപകടം ഒഴിവാക്കിയത്. മൂന്ന് മഞ്ഞ കാര്‍ഡുകള്‍ ആദ്യ പകുതിയില്‍ തന്നെ ആഫ്രിക്കന്‍ സംഘത്തിന് ലഭിച്ചു. 14-ാം മിനിറ്റിലാണ് മത്സരത്തിലെ ഏറ്റവും മികച്ച അവസരം ബ്രസീലിന് ലഭിക്കുന്നത്. ഫ്രെഡിന്റെ ഒരു അളന്നു മുറിച്ച ക്രോസില്‍ മാര്‍ട്ടിനെല്ലി കൃത്യമായി ചാടി തലവെച്ചെങ്കിലും കാമറൂണ്‍ ഗോള്‍കീപ്പര്‍ എപ്പാസി തട്ടിയകറ്റി. ജീവന്മരണ പോരാട്ടത്തിനിറങ്ങിയ കാമറൂണും ചില മികച്ച നീക്കങ്ങള്‍ നടത്തി. 20-ാം മിനിറ്റില്‍ ചുപ്പോ മോട്ടിംഗ് ബ്രസീലിയന്‍ പ്രതിരോധ നിരയെ വെട്ടിയൊഴിഞ്ഞ് മുന്നേറിയെങ്കിലും മിലിറ്റാവോ രക്ഷക്കെത്തി. തൊട്ട് പിന്നാലെ ചുപ്പോ മോട്ടിംഗിന്റെ പാസില്‍ ടോളോയുടെ ക്രോസിലെ അപകടം എഡേഴ്‌സണ്‍ കുത്തിയറ്റി.

പിന്നീട് ബ്രസീലിന്റെ മികച്ച നീക്കങ്ങള്‍ നിരവധി കണ്ടെങ്കിലും കാണികളെ ഒന്നാകെ ത്രസിപ്പിച്ചത് ഇഞ്ചുറി ടൈമിലെ മാര്‍ട്ടിനെല്ലിയുടെ ഷോട്ടാണ്. എപ്പാസി തന്റെ കഴിവ് മുഴുവന്‍ പുറത്തെടുത്താണ് അത് ഗോളാകാതെ സംരക്ഷിച്ചത്. ഇഞ്ചുറി സമയത്ത് തന്നെ മഞ്ഞപ്പടയുടെ ബോക്‌സിലും കാമറൂണിന്റെ വക അതിഗംഭീര കടന്നാക്രമണം നടന്നു. ഗമേലുവിന്റെ ക്രോസില്‍ മാര്‍ക്ക് ചെയ്യപ്പെടാതെ നിന്ന് എംബുമോ ഹെഡ് ചെയ്‌തെങ്കിലും ഒരു ഫുള്‍ ലെംഗ്ത് ഡൈവിലൂടെ എഡേഴ്‌സണ്‍ പന്ത് വലയില്‍ കയറാതെ സംരക്ഷിച്ചു.

ഈ ലോകകപ്പില്‍ ബ്രസീലിനെതിരെ ഓണ്‍ ടാര്‍ഗറ്റ് വന്ന ആദ്യ ഷോട്ട് കൂടി ആയിരുന്നു ഇത്. കാമറൂണിന്റെ മുന്നേറ്റങ്ങളോടെയാണ് രണ്ടാം പകുതി തുടങ്ങിയത്. അബൂബക്കറിന്റെ ഷോട്ട് നേരിയ വ്യത്യാസത്തിലാണ് പുറത്ത് പോയത്. ഇതിനിടെ പരിക്കേറ്റ് അലക്‌സ് ടെല്ലസ് പുറത്ത് പോയത് ബ്രസീലിന് വന്‍ തിരിച്ചടിയുണ്ടാക്കി. 56-ാം മിനിറ്റില്‍ സൂപ്പര്‍ സ്‌ട്രൈക്കുമായി മാര്‍ട്ടിനെല്ലി വീണ്ടും എപ്പാസിയെ പരീക്ഷിച്ചെങ്കിലും കാമറൂണ്‍ ഗോളി കാനറികളുടെ വിജയ സ്വപ്നങ്ങളെ തടുത്തുക്കൊണ്ടേയിരുന്നു.

മികച്ച മുന്നേറ്റങ്ങള്‍ ഏവേ ജേഴ്‌സിയായ നീലയിലും വെള്ളയിലും ഇറങ്ങിയ ബ്രസീലില്‍ നിന്ന് ഉണ്ടായെങ്കിലും ഫിനിഷിംഗിലെ പിഴവുകള്‍ കാരണം ഗോളുകള്‍ മാത്രം പിറന്നില്ല. ജയിച്ചില്ലെങ്കില്‍ ലോകകപ്പ് സ്വപ്നങ്ങള്‍ തന്നെ അവസാനിക്കുമെന്നതിനാല്‍ കാമറൂണ്‍ ആകുന്ന വിധം ഒക്കെ ആക്രമണം നടത്തി. ബ്രൂണോയെയും റിബെറോയുമെല്ലാം വരിഞ്ഞുള്ള കാമറൂണ്‍ പ്രതിരോധ നിരയുടെ പരിശ്രമങ്ങള്‍ കാനറികള്‍ക്ക് ചെറിയ തലവേദനയൊന്നുമല്ല ഉണ്ടാക്കിയത്. ഇഞ്ചുറി ടൈമിലാണ് കാമറൂണ്‍ കാനറികളുടെ ചിറകരിഞ്ഞ ഗോള്‍ സ്വന്തമാക്കിയത്. നായകന്‍ വിന്‍സെന്റ് അബൂബക്കറിന്റെ തലപ്പാകത്തിനാണ് എംബെക്കലിയുടെ ക്രോസ് എത്തിയത്. എഡേഴ്‌സണെ വെറും നോക്കുകുത്തിയാക്കി അബൂബക്കര്‍ പന്ത് ഗോള്‍ വര കടത്തി.