കോഴിക്കോട് പ്ലസ് ടു വിദ്യാര്‍ത്ഥിനി മെഡിക്കല്‍ കോളേജിലെ എംബിബിഎസ് ക്ലാസില്‍ ഇരുന്ന സംഭവത്തില്‍ വൻ ട്വിസ്റ്റ്. സംഭവത്തെ തുടർന്ന് പോലീസ് അന്വേഷണം അവസാനിപ്പിച്ചു. മാത്രമല്ല വിദ്യാര്‍ത്ഥിനി കുറ്റകൃത്യമൊന്നും ചെയ്തിട്ടില്ലെന്ന കണ്ടെത്തലിന്റെ അടിസ്ഥാനത്തിലാണ് തീരുമാനം എടുത്തിരിക്കുന്നത്.

അതേസമയം മെഡിക്കല്‍ പ്രവേശനം ലഭിക്കാത്തതിന്റെ മനോവിഷമത്തിലാണ് കുട്ടി ക്ലാസിലെത്തിയത് എന്ന് പോലീസ് വ്യക്തമാക്കി. മാത്രമല്ല നീറ്റ് പരീക്ഷ എളുപ്പമായിരുന്നതിനാല്‍ പെണ്‍കുട്ടിയും കുടുംബവും ഗോവയിലേക്ക് വിനോദ യാത്ര പോകുകയായിരുന്നു. തുടർന്ന് ഇവിടെ വച്ചാണ് പരീക്ഷാ ഫലം അറിഞ്ഞത്. പിന്നാലെ ഫലം പരിശോധിച്ചപ്പോള്‍ ഉയര്‍ന്ന റാങ്ക് ലഭിച്ചതായി കാണുകയും, ഇക്കാര്യം പെണ്‍കുട്ടി വീട്ടുകാരോടും സുഹൃത്തുക്കളോടും പറയുകയും ചെയ്തു.

ഇതിന് പിന്നാലെ പെണ്‍കുട്ടിയെ അനുമോദിച്ചുകൊണ്ട് നാട്ടില്‍ ഫ്‌ളക്‌സ് ബോര്‍ഡുകളും ഉയര്‍ന്നു. പക്ഷെ നാട്ടിലെത്തി നീറ്റ് പരീക്ഷാഫലം വീണ്ടും നോക്കിയപ്പോഴാണ് തനിക്ക് പിഴവ് പറ്റിയതായി കുട്ടിക്ക് ബോധ്യപ്പെടുന്നത്. തുടർന്ന് ഇതിൽ നാണക്കേട് ഭയന്ന് പെണ്‍കുട്ടി ക്ലാസിലെത്തുകയായിരുന്നു. പിന്നാലെ സഹപാഠികള്‍ക്കൊപ്പം സെല്‍ഫിയെടുത്ത് സുഹൃത്തുക്കള്‍ക്ക് അയച്ചുകൊടുത്തുവെന്നും പോലീസ് പറയുന്നു. ഇതോടെ സംഭവത്തില്‍ മെഡിക്കല്‍ കോളേജ് അധികൃതര്‍ ആഭ്യന്തര അന്വേഷണം നടത്തുന്നുണ്ട്.