രണ്ടും കല്പ്പിച്ച് ഗവര്ണര്... ക്രിസ്തുമസിന് മുഖ്യമന്ത്രിയേയും മന്ത്രിമാരേയും ഗവര്ണര് ക്ഷണിച്ചത് വെറുതേ; ആരും വരില്ല; ചാന്സലര് സ്ഥാനത്ത് നിന്നും ഗവര്ണറെ മാറ്റാനുള്ള ബില് ഇന്ന് നിയമസഭ പാസാക്കും; എതിര്ക്കാന് പ്രതിപക്ഷം; നിര്ണായകമായി മുസ്ലീംലീഗ്; ഗവര്ണര് ഒപ്പിടില്ല
ക്രിസ്തുമസിന് മുഖ്യമന്ത്രിയേയും മന്ത്രിമാരേയും ഗവര്ണര് ക്ഷണിച്ചു എന്നുകരുതി മഞ്ഞുരുകിയില്ല. പകരം ചാന്സലര് സ്ഥാനത്ത് നിന്ന് ഗവര്ണറെ മാറ്റാനുള്ള ബില് നിയമസഭ ഇന്ന് പാസ്സാക്കും. സബ്ജക്ട് കമ്മിറ്റിക്ക് വിട്ട ബില്ലാണ് ഇന്ന് ചര്ച്ച ചെയ്ത് പാസ്സാക്കുന്നത്. എന്നാല് നിര്ണായകമായി മുസ്ലീംലീഗ് മാറുകയാണ്.
ചാന്സലര് സ്ഥാനത്തു നിന്നും ഗവര്ണറെ മാറ്റുന്നതിനോട് യോജിപ്പാണെന്ന് പറഞ്ഞെങ്കിലും ബദല് സംവിധാനത്തോടുള്ള എതിര്പ്പുള്ളതിനാല് ബില്ലിനെ പ്രതിപക്ഷം എതിര്ക്കും. ഗവര്ണര്ക്ക് പകരം പ്രമുഖരായ വിദ്യാഭ്യാസ വിദഗ്ധരെ ചാന്സലറാക്കണം എന്നാണ് ബില്ലിലെ നിര്ദ്ദേശം. വിസി ഇല്ലെങ്കില് പകരം ചുമതല പ്രോ വിസിക്കോ മറ്റ് സര്വകലാശാല വിസിമാര്ക്കോ നല്കും എന്നായിരുന്നു കരട് ബില്ലിലെ വ്യവസ്ഥ. ഇത് യുജിസി മാര്ഗ നിര്ദേശത്തിന് വിരുദ്ധമാണെന്നാണ് പ്രതിപക്ഷ നിലപാട്.
അതേസമയം ബില് നിയമസഭ പാസ്സാക്കിയാലും ഗവര്ണര് ഒപ്പിടില്ല. സബ്ജക്ട് കമ്മിറ്റി പരിഗണനയ്ക്കു ശേഷമാണ് ബില് ഇന്ന് വീണ്ടും സഭയില് എത്തുന്നത്. ബില്ലിനെ പ്രതിപക്ഷം എതിര്ക്കും. സര്വകലാശാല ഭേദഗതി ബില് പാസാക്കി സഭ ഇന്ന് അനിശ്ചിതകാലത്തേക്ക് പിരിയും.
സംസ്ഥാനത്തെ 14 സര്വകലാശാലകളുടെയും ചാന്സലര് സ്ഥാനത്തുനിന്ന് ഗവര്ണറെ മാറ്റുകയാണ് ബില്ലിലൂടെ സര്ക്കാര് ലക്ഷ്യമിടുന്നത്. ഭരണഘടനയില് പറയാത്ത ഉത്തരവാദിത്തത്തില് നിന്ന് ഗവര്ണറെ ഒഴിവാക്കാനാണ് നിയമനിര്മാണം എന്ന് സര്ക്കാര് വിശദീകരിക്കുന്നു. ഗവര്ണര്ക്ക് പകരം വിദ്യാഭ്യാസരംഗത്തെ പ്രഗല്ഭരെ സര്വകലാശാലകളുടെ ചാന്സലര് പദവിയില് നിയമിക്കാനാണ് പദ്ധതി.
ഒരേ സ്വഭാവമുള്ള സര്വകലാശാലകള്ക്ക് ഒരു ചാന്സലറാകും ഉണ്ടാവുക. ഭരണഘടനാ പദവിയുള്ള ഗവര്ണര്ക്ക് കൂടുതല് ചുമതല വഹിക്കുന്നതിലെ ബുദ്ധിമുട്ട് ഒഴിവാക്കാനാണ് മാറ്റമെന്നും ബില്ലില് വിശദീകരിക്കുന്നുണ്ട്. സമാന സ്വഭാവമുള്ള സര്വകലാശാലകള്ക്ക് ഒരു ചാന്സലര് ആകും ഉണ്ടാവുക.
ബില് അവതരിപ്പിക്കാന് ഗവര്ണര് നേരത്തെ അനുമതി നല്കിയിരുന്നു. ഇംഗ്ലീഷ് പരിഭാഷയിലുള്ള ബില്ലിനാണ് ഗവര്ണര് അനുമതി നല്കിയത്. ഇംഗ്ലീഷ് പരിഭാഷയിലുള്ള ബില് അവതരണത്തിന് ഗവര്ണറുടെ മുന്കൂര് അനുമതി വേണമെന്നിരിക്കെയാണിത്. എന്നാല് ബില്ലിനെ പ്രതിപക്ഷം ശക്തമായി എതിര്ക്കും. ഗവര്ണറോട് കോണ്ഗ്രസില് നിന്ന് വ്യത്യസ്ത സമീപനമാണ് മുസ്ലീം ലീഗിന്. സംസ്ഥാനത്തെ വിലക്കയറ്റം അടിയന്തര പ്രമേയ നോട്ടീസായി സഭയില് കൊണ്ടുവരാനും പ്രതിപക്ഷ നീക്കമുണ്ട്.
അതേസമയം ഗവര്ണര് നടത്തുന്ന ക്രിസ്മസ് വിരുന്ന് ബഹിഷ്കരിച്ച് സര്ക്കാരും പ്രതിപക്ഷ നേതാവും. രാജ്ഭവനില് 14ന് നടക്കുന്ന ചടങ്ങിലേക്ക് മുഖ്യമന്ത്രിയെയും മന്ത്രിമാരെയും പ്രതിപക്ഷ നേതാവിനെയും ഗവര്ണര് ആരിഫ് മുഹമ്മദ് ഖാന് നേരത്തെ തന്നെ ക്ഷണിച്ചിരുന്നു. എന്നാല്, ഈ ക്ഷണം സര്ക്കാരും പ്രതിപക്ഷ നേതാവും നിരസിക്കുകയായിരുന്നു. സര്ക്കാരും രാജ്ഭവനും തമ്മില് തുടരുന്ന പോരിന്റെ ഭാഗാമായാണ് നടപടിയെന്നറിയുന്നു.
കഴിഞ്ഞ തവണ മത മേലാധ്യക്ഷന്മാര്ക്ക് മാത്രമായിരുന്നു ക്ഷണം. ചാന്സലര് സ്ഥാനത്ത് നിന്ന് ഗവര്ണറെ നീക്കാനുള്ള ബില് നിയമസഭ പാസാക്കുന്നത് ഈ മാസം 13 നാണ്. ഇതിന് തൊട്ടടുത്ത ദിവസമാണ് രാജ്ഭവനിലെ ക്രിസ്മസ് വിരുന്ന്. ഗവര്ണര് ക്ഷണിച്ചാല് എത്ര തിരക്കുണ്ടായാലും രാജ്ഭവനിലെത്തുകയാണ് മുഖ്യമന്ത്രിമാരും മന്ത്രിമാരും പുലര്ത്തുന്ന കീഴ്വഴക്കം. തിരുവനന്തപുരത്തെ ചടങ്ങിനു ശേഷം കൊച്ചിയിലും കോഴിക്കോട്ടും പരിപാടികള് സംഘടിപ്പിക്കാനും രാജ്ഭവന് അധികൃതരോട് ഗവര്ണര് നിര്ദേശിച്ചിട്ടുണ്ട്.
അതേസമയം രാജി വയ്ക്കാതിരിക്കാന് കാരണം കാണിക്കാന് നോട്ടീസ് നല്കിയ വൈസ് ചാന്സര്മാരുടെ ഹിയറിംഗ് നടത്തി ഗവര്ണര് ആരിഫ് മുഹമ്മദ് ഖാന്. നോട്ടീസ് നല്കിയ ഒന്പതുപേരില് നാലുപേര് നേരിട്ട് രാജ്ഭവനിലെത്തി ഹാജരായി. കണ്ണൂര്, എംജി സര്വകലാശാലാ വിസിമാര് എത്തിയില്ല. കേരള മുന് വി.സി. വിപി മഹാദേവന് പിള്ള, ഡിജിറ്റല് സര്വ്വകലാശാല വി.സി സജി ഗോപിനാഥ്, ഓപ്പണ് സര്വകലാശാലാ വി.സി മുബാറക് പാഷ, കുസാറ്റ് വി.സി. ഡോ.മധു എന്നിവരാണ് നേരിട്ടെത്തിയത്.
എം.ജി വിസി ഡോ.സാബു തോമസ് വിദേശ സന്ദര്ശനത്തിലായതിനാലാണ് ഹാജരാകാതിരുന്നത്. അടുത്തമാസം മൂന്നിന് എംജി വിസിയ്ക്കായി പ്രത്യേക ഹിയറിംഗ് നടത്തും. മറ്റുള്ളവരുടെ അഭിഭാഷകരാണ് എത്തിയത്. ഹിയറിംഗിന് ശേഷം വിശദമായ റിപ്പോര്ട്ട് രാജ്ഭവന് ഹൈക്കോടതിയ്ക്ക് കൈമാറും. കോടതി വിധിയ്ക്ക് ശേഷം മതി തുടര് നടപടിയെന്നാണ് ഗവര്ണറുടെ തീരുമാനം.
https://www.facebook.com/Malayalivartha
