മലയാള , തമിഴ് സിനിമാ ഗാനങ്ങള്‍ കോപ്പിയടിച്ചെന്ന പകര്‍പ്പവകാശ ലംഘന പൈറസി കേസില്‍ കേസന്വേഷണത്തില്‍ പോലീസ് ഗുരുതര കൃത്യവിലോപം വരുത്തിയെന്ന് ചൂണ്ടിക്കാട്ടി മൊബൈല്‍ ഷോപ്പുടമയെ കോടതി വെറുതെ വിട്ടു. തിരുവനന്തപുരം രണ്ടാം ജുഡീഷല്‍ ഫസ്റ്റ് ക്ലാസ് മജിസ്‌ട്രേട്ട് എ.അനീസയാണ് പ്രതി കുറ്റക്കാരനല്ലെന്ന് കണ്ട് വിട്ടയച്ചത്.

പകര്‍പ്പവകാശം ലംഘിച്ചുവെന്നത് കണ്ടു പിടിക്കാന്‍ പ്രതി കൃത്യത്തിനുപയോഗിച്ച പെന്‍ഡ്രൈവും മെമ്മറി കാര്‍ഡും കാര്‍ഡ് റീഡറും കമ്പ്യൂട്ടറും ഫോറന്‍സിക് പരിശോധനക്ക് അയക്കാന്‍ കോടതിയില്‍ റിപ്പോര്‍ട്ട് സമര്‍പ്പിക്കാതെ ഫോര്‍ട്ട് പോലീസിന്റെ കേസന്വേഷണ വീഴ്ചകള്‍ അക്കമിട്ട് നിരത്തിയാണ് മൊബൈല്‍ ഷോപ്പുടമയെ കോടതി വെറുതെ വിട്ടത്. പഴവങ്ങാടി അബാദ് ടവേഴ്‌സില്‍ അയ്മന്‍ മൊബൈല്‍ ഷോപ്പ് നടത്തുന്ന മുഹമ്മദ് ബഷീറിനെയാണ് ഫോര്‍ട്ട് പോലീസ് കുറ്റപത്രം തള്ളിക്കൊണ്ട് നിരുപാധികം വിട്ടയച്ചത്.

2011 ഡിസംബര്‍ 13 ന് ഉച്ചക്ക് 2.30 നാണ് കേസിനാസ്പദമായ സംഭവം നടന്നത്. പകര്‍പ്പുകള്‍ വില്‍ക്കാന്‍ നിയമപരമായ ലൈസന്‍സില്ലാതെ മലയാള , തമിഴ് സിനിമാചലച്ചിത്ര ഗാനങ്ങള്‍ കാര്‍ഡ് റീഡര്‍ ഉപയോഗിച്ച് കംപ്യൂട്ടറില്‍ പെന്‍ ഡ്രൈവില്‍ നിന്നും മെമ്മറി കാര്‍ഡിലേക്ക് പകര്‍ത്തിയെന്നാണ് കേസ്.

രണ്ടും നാലും ഏഴും സാക്ഷികള്‍ക്കെതിരെ കോടതി അറസ്റ്റ് വാറണ്ടും ജപ്തി വാറണ്ടും പുറപ്പെടുവിച്ചും ഹാജരാകാത്തതാണ് വിചാരണ വൈകാന്‍ കാരണമായതെന്നും അപ്രകാരം വിചാരണയിലുണ്ടായ 11 വര്‍ഷക്കാലതാമസം പ്രതിക്ക് കടുത്ത അനീതിക്ക് കാരണമായെന്നും കോടതി വിധിന്യായത്തില്‍ ചൂണ്ടിക്കാട്ടി. പ്രോസിക്യൂഷന്‍ തെളിവുകള്‍ ദുര്‍ബലവും നിലവാരമില്ലാത്തതുമാണ്. നിയമപരവും മതിയായതുമായ തെളിവുകള്‍ നിരത്തി സംശയാതീതമായി കേസ് തെളിയിക്കേണ്ട കടമ പ്രോസിക്യൂഷന്റേതാണ്. ഇവിടെ കുറ്റകൃത്യങ്ങള്‍ തെളിയിക്കുന്നതില്‍ പ്രോസിക്യൂഷന്‍ പരാജയപ്പെട്ടതായും കോടതി വിലയിരുത്തി.

പ്രതിയുടെ ഷോപ്പുടമയെ സാക്ഷിയാക്കാത്തതും , ഫോറന്‍സിക് പരിശോധനക്ക് ഫോര്‍വേഡിഗ് നോട്ടു കോടതിയില്‍ സമര്‍പ്പിക്കാത്തതും ഗുരുതര വീഴ്ചയായി കോടതി കണ്ടെത്തി. പ്രതിയുടെ ഷോപ്പു റൂമില്‍ നിന്നും പിടിച്ചെടുത്തവ വിപണിയില്‍ സര്‍വ്വസാധാരണമായി ലഭ്യമാണെന്ന് കേസന്വേഷിച്ച അന്നത്തെ ഫോര്‍ട്ട് സബ്ബ് ഇന്‍സ്‌പെക്ടര്‍ എസ്. വിജയകുമാറിന്റെ മൊഴിയെയും കോടതി വിധിന്യായത്തില്‍ പരാമര്‍ശിച്ചു.