ജാഗ്രതയോടെ സര്ക്കാരുകള്... ചൈനയിലും മറ്റ് ലോക രാജ്യങ്ങളിലും കോവിഡ് കുതിച്ചുയരുമ്പോള് ജാഗ്രതയോടെ ഇന്ത്യ; മുന്നൊരുക്കങ്ങളുമായി ഇന്ത്യയും കേരളവും; സ്റ്റേറ്റ് റാപ്പിഡ് റെസ്പോണ്സ് ടീം യോഗം ചേര്ന്നു; കോവിഡ് മുന്കരുതല് ജില്ലകള്ക്ക് ജാഗ്രതാ നിര്ദേശം
ചൈനയിലും മറ്റ് ലോക രാജ്യങ്ങളിലും കോവിഡ് കുതിച്ചുയരുമ്പോള് ജാഗ്രതയോടെ ഇന്ത്യ. ചൈനയില് കോവിഡ് വ്യാപനത്തിനു കാരണമായെന്ന് സംശയിക്കുന്ന വകഭേദം ഇന്ത്യയിലും കണ്ടെത്തിയതോടെ വലിയ മുന്നൊരുക്ക പ്രവര്ത്തനങ്ങളാണ് നടത്തുന്നത്. അതേസമയം, ചൈനയും യുഎസും ഉള്പ്പെടെ 5 രാജ്യങ്ങളില് കോവിഡ് തിരിച്ചുവരുന്നുവെന്ന വാര്ത്തകള്ക്കിടെ, രാജ്യത്ത് വിമാനത്താവളങ്ങളില് കോവിഡ് പരിശോധന പുനരാരംഭിച്ചു. രാജ്യാന്തര യാത്രക്കാരുടെ സ്രവം ശേഖരിക്കലാണ് പുനരാരംഭിച്ചത്. വിദേശത്തുനിന്നും വരുന്നവരിലൂടെ രോഗം പകരുന്നത് തടയാനാണിത്.
വിമാനത്താവളങ്ങളില് നിരീക്ഷണം ശക്തമാക്കണമെന്നും പൊതുസ്ഥലങ്ങളില് മാസ്ക് ധരിക്കണമെന്നും കോവിഡ് വ്യാപനവും പ്രതിരോധ പ്രവര്ത്തനങ്ങളും വിലയിരുത്താന് വിളിച്ചു ചേര്ത്ത അടിയന്തര യോഗത്തില് കേന്ദ്ര ആരോഗ്യമന്ത്രി മന്സുഖ് മാണ്ഡവ്യ ആവശ്യപ്പെട്ടിരുന്നു. ചൈന അടക്കമുള്ള രാജ്യങ്ങളില് കോവിഡ് രോഗബാധിതരുടെ എണ്ണം വര്ധിക്കുകയും മരണസംഖ്യ ഉയരുകയും ചെയ്ത സാഹചര്യത്തിലാണ് കേന്ദ്ര ആരോഗ്യമന്ത്രി യോഗം വിളിച്ചത്.
കോവിഡ് പൂര്ണമായും രാജ്യത്തുനിന്ന് പോയിട്ടില്ല. അതിനാല് നിരീക്ഷണം ശക്തമാക്കേണ്ടതുണ്ട്. ആശങ്കപ്പെടേണ്ട ഒരു സാഹചര്യവും നിലവിലില്ല. ഏത് സാഹചര്യത്തെയും നേരിടാന് രാജ്യം സജ്ജമായിട്ടുണ്ടെന്നും മന്ത്രി പറഞ്ഞു. എല്ലാ സംസ്ഥാനങ്ങളിലെയും കോവിഡ് പ്രതിരോധ പ്രവര്ത്തനങ്ങളും കോവിഡ് വ്യാപനവും സംബന്ധിച്ചുള്ള അവലോകനവും യോഗത്തില് നടന്നു.
മറ്റ് രാജ്യങ്ങളില് കോവിഡ് വര്ധിച്ചു വരുന്ന സാഹചര്യത്തില് എല്ലാ ജില്ലകള്ക്കും ജാഗ്രതാ നിര്ദേശം നല്കിയതായി ആരോഗ്യ വകുപ്പ് മന്ത്രി വീണാ ജോര്ജ് പറഞ്ഞു. സംസ്ഥാനത്ത് കോവിഡ് കേസുകള് വളരെ കുറവാണ്. ഡിസംബര് മാസത്തില് ആകെ 1431 കേസുകള് മാത്രമാണ് ഉണ്ടായിട്ടുള്ളത്. ആശുപത്രികളില് ചികിത്സയിലുള്ള രോഗികളും വളരെ കുറവാണ്. പുതിയ കോവിഡ് വകഭേദത്തിന് വ്യാപന ശേഷി കൂടുതലാണ്. അതിനാല് തന്നെ ജാഗ്രത വേണം. എല്ലാ ജില്ലകളും പ്രതിരോധ പ്രവര്ത്തനങ്ങളും നിരീക്ഷണവും ശക്തമാക്കാനും മന്ത്രി നിര്ദേശം നല്കി. മന്ത്രിയുടെ നേതൃത്വത്തില് നടന്ന സ്റ്റേറ്റ് റാപ്പിഡ് റെസ്പോണ്സ് ടീം യോഗത്തിലാണ് നിര്ദേശം നല്കിയത്.
ആശങ്ക വേണ്ട എങ്കിലും കോവിഡ് ബാധിക്കാതിരിക്കാന് എല്ലാവരും ശ്രദ്ധിക്കേണ്ടതാണ്. അവധിക്കാലം കൂടുതല് ശ്രദ്ധിക്കണം. എല്ലാവരും വായും മൂക്കും മൂടത്തക്ക വിധം മാസ്ക് ധരിക്കണം. പ്രായമായവര്ക്കും അനുബന്ധ രോഗമുള്ളവര്ക്കും കുട്ടികള്ക്കും പ്രത്യേക കരുതല് വേണം. ഇടയ്ക്കിടയ്ക്ക് സോപ്പും വെള്ളവുമുപയോഗിച്ച് കൈ കഴുകണം. പുറത്ത് പോയി വന്നതിന് ശേഷം കൈ കഴുകേണ്ടതാണ്. കരുതല് ഡോസ് ഉള്പ്പെടെ വാക്സിന് എടുക്കാത്തവര് എല്ലാവരും വാക്സിന് എടുക്കണം. രോഗലക്ഷണമുള്ളവരെ കൂടുതലായി കോവിഡ് പരിശോധന നടത്താന് നിര്ദേശം നല്കി. പുതിയ വകഭേദങ്ങളെ നിരീക്ഷിക്കാനായി ജനിതക ശ്രേണീകരണം ശക്തിപ്പെടുത്തും.
പനി, ജലദോഷം, തൊണ്ടവേദന എന്നിവ ബാധിച്ചാല് അവഗണിക്കരുത്. ചികിത്സ തേടണം. കോവിഡ് രോഗലക്ഷണങ്ങളുള്ളവരുമായി അടുത്തിടപഴകരുത്. കോവിഡ് രോഗലക്ഷണമുണ്ടെങ്കില് പുറത്തിറങ്ങാതെ വിശ്രമിക്കേണ്ടതും ചികിത്സ തേടേണ്ടതുമാണ്. അവബോധ പ്രവര്ത്തനങ്ങള് ശക്തമാക്കാനും നിര്ദേശം നല്കി. ആശുപത്രി അഡ്മിഷന് നിരന്തരം നിരീക്ഷിക്കണം. രോഗികളുടെ എണ്ണം വര്ധിക്കുന്നത് മുന്നില് കണ്ട് കോവിഡിനായി ആശുപത്രി സൗകര്യങ്ങള് കൂട്ടാനും നിര്ദേശം നല്കി.
എന്എച്ച്എം സ്റ്റേറ്റ് മിഷന് ഡയറക്ടര്, ആരോഗ്യ വകുപ്പ് ഡയറക്ടര്, മെഡിക്കല് വിദ്യാഭ്യാസ ഡയറക്ടര്, അഡീഷണല് ഡയറക്ടര്മാര്, ഡെപ്യൂട്ടി ഡയറക്ടര്മാര്, ആര്.ആര്.ടി. അംഗങ്ങള് എന്നിവര് യോഗത്തില് പങ്കെടുത്തു.
"
https://www.facebook.com/Malayalivartha
