മുസ്ലീം ലീഗിനെ കൂടെ കൂട്ടാനായി സിപിഎം സെക്രട്ടറി എം.വി ഗോവിന്ദന്‍ അടുത്തിടെ നടത്തിയ പ്രസ്താവനകളും അതിനെ പിന്‍താങ്ങി പിണറായി വിജയന്‍ നടത്തിയ പുകഴ്ത്തലും ഒന്നും ലീഗ് വിഷയത്തില്‍ വിലപോയില്ല. ലീഗ് യുഡിഎഫില്‍ തന്നെ ഉറച്ചു നില്ക്കുമെന്ന് പ്രഖ്യാപിച്ചു. എന്നിട്ടും വീണിടത്ത് കിടന്ന ഉരുളുകയാണ്. ലീഗിനെയല്ല ലീഗിന്റെ നിലപാടുകളെയാണ് പിന്‍താങ്ങിയതെന്ന് മുഖ്യമന്ത്രിയും പറഞ്ഞതോടെ സിപിഎം ന്റെ ലീഗ് പ്രണയത്തിന്റെ അര്‍ത്ഥം പുറത്തായി. ബിജെപിയെ പ്രസംശിച്ച ലീഗ് എംപിയ്‌ക്കെതിരെ നടപടി വരുമെന്നും അങ്ങനെ ലീഗിനെ പൊളിക്കാമെന്നുമുള്ളത് വ്യാമോഹങ്ങളായി മാറി.

അബ്ദുല്‍ വഹാബ് വിഷയത്തില്‍ ലീഗ് കടുത്ത നടപടിയിലേയ്ക്ക് കടന്നില്ല. ബി.ജെ.പിയുടെ കേന്ദ്രമന്ത്രിമാരെ പ്രശംസിച്ച പി.വി. അബ്ദുല്‍ വഹാബ് എം.പി തെറ്റ് ഏറ്റുപറഞ്ഞുവെന്ന് മുസ് ലിം ലീഗ് സംസ്ഥാന ജനറല്‍ സെക്രട്ടറി പി.എം.എ സലാം. തെറ്റ് ആവര്‍ത്തിക്കില്ലെന്ന് ഉറപ്പു നല്‍കിയിട്ടുണ്ട്. വഹാബിന്റേത് ലീഗിന്റെ അഭിപ്രായമല്ല. ഇതോടെ വിഷയം അവസാനിച്ചെന്നും പി.എം.എ സലാം മാധ്യമങ്ങളോട് പറഞ്ഞു.

ചൊവ്വാഴ്ച രാജ്യസഭയില്‍ ചര്‍ച്ചക്കിടെയാണ് മന്ത്രിമാരായ വി. മുരളീധരനെയും രാജീവ് ചന്ദ്രശേഖരനെയും വഹാബ് പ്രശംസിച്ചത്. കേരളത്തിന് കേന്ദ്രസഹായം തടയുന്നതിനെതിരെ ജോണ്‍ ബ്രിട്ടാസ് എം.പി മന്ത്രി വി. മുരളീധരനെതിരെ ആഞ്ഞടിച്ച ശേഷമായിരുന്നു വഹാബിന്റെ പ്രസംഗം. വി. മുരളീധരന്‍ ഡല്‍ഹിയിലെ കേരള അംബാസഡറാണെന്നായിരുന്നു വഹാബിന്റെ പ്രശംസ. മന്ത്രി രാജീവ് ചന്ദ്രശേഖരന്‍ വൈദഗ്ധ്യ വികസനത്തില്‍ ചെയ്യുന്നത് പ്രശംസനീയമാണെന്നും പുകഴ്ത്തി.

വഹാബിന്റെ പ്രസ്താവനയുടെ ഗൗരവം ഉള്‍ക്കൊണ്ടാണ് ലീഗ് സംസ്ഥാന അധ്യക്ഷന്‍ പാണക്കാട് സാദിഖലി തങ്ങള്‍ പത്രക്കുറിപ്പിലൂടെ അതൃപ്തി പരസ്യമാക്കിയിരുന്നു. ബി.ജെ.പിയുടെ കേന്ദ്രമന്ത്രിമാരെ പ്രശംസിച്ച അബ്ദുല്‍ വഹാബിന്റെ നടപടിയോട് ലീഗിന് യോജിപ്പില്ലെന്നാണ് സാദിഖലി തങ്ങള്‍ വ്യക്തമാക്കിയത്. ഏതു സാഹചര്യത്തിലാണ് വഹാബ് പരാമര്‍ശം നടത്തിയത് എന്നതിനെക്കുറിച്ച് വിശദീകരണം ചോദിക്കുമെന്നും തങ്ങള്‍ വ്യക്തമാക്കി. കോണ്‍ഗ്രസും കടുത്ത ഭാഷയില്‍ ലീഗിനോട് അതൃപ്തി അറിയിച്ചിരുന്നു.

പാര്‍ട്ടി നയങ്ങള്‍ക്ക് വിരുദ്ധമായി നിലപാട് സ്വീകരിക്കുന്നതിനെതിരെ മുമ്പ് സാദിഖലി തങ്ങള്‍ താക്കീത് നല്‍കിയിട്ടും വഹാബ് വ്യക്തിപരമായ നിലപാട് സ്വീകരിച്ചത് ഗുരുതര അച്ചടക്ക ലംഘനമായെന്നാണ് വിലയിരുത്തല്‍. പാര്‍ലമെന്റ് സമ്മേളനം കഴിഞ്ഞാല്‍ പാര്‍ട്ടി എം.പിമാര്‍, എം.എല്‍.എമാര്‍ എന്നിവരുടെ യോഗം വിളിച്ച് വിഷയം ചര്‍ച്ചചെയ്യും.

മുമ്പ് ഏകസിവില്‍ കോഡ് ബില്‍ അവതരിപ്പിച്ചപ്പോള്‍ കോണ്‍ഗ്രസ് അസാന്നിധ്യത്തെ വിമര്‍ശിച്ച പി.വി. അബ്ദുല്‍ വഹാബിന്റെ നടപടി ലീഗിനെ വെട്ടിലാക്കിയിരുന്നു. പ്രസ്താവന അനവസരത്തിലാണെന്ന് നേതൃത്വം വിലയിരുത്തി. കോണ്‍ഗ്രസ് നേതൃത്വവും വഹാബിന്റെ പ്രസ്താവനക്കെതിരെ രംഗത്തുവന്നു. ഇതിന്റെ ചൂടാറും മുമ്പാണ് ബി.ജെ.പിയോടും കേന്ദ്രസര്‍ക്കാറിനോടും കോണ്‍ഗ്രസിന്റെ നേതൃത്വത്തില്‍ ദേശീയ തലത്തില്‍ പ്രതിഷേധം നടക്കുമ്പോള്‍ വഹാബ് കേന്ദ്രമന്ത്രിമാരെ പുകഴ്ത്തിയത്. വഹാബിന്റെ പ്രസ്താവനയില്‍ കെ. മുരളീധരന്‍ എം.പി അതൃപ്തി പരസ്യമാക്കിയിരുന്നു.

 വഹാബിന്റെ പരാമര്‍ശത്തോട് പാര്‍ട്ടി യോജിക്കുന്നില്ലെന്നും വിശദീകരണം തേടുമെന്നും പാണക്കാട് സാദിഖലി തങ്ങള്‍ പറഞ്ഞു.
കേന്ദ്രമന്ത്രിമാരെ പ്രശംസിച്ച പി വി അബ്ദുള്‍ വഹാബ് എംപിയെ പൂര്‍ണമായും തള്ളുകയാണ് മുസ്ലീം ലീഗ് നേതൃത്വം. പി വി അബ്ദുള്‍ വഹാബ് എംപി നടത്തിയ പരാമര്‍ശത്തോട് പാര്‍ട്ടി യോജിക്കുന്നില്ലന്നും ഏത് സാഹചര്യത്തിലാണ് പരാമര്‍ശം എന്നതിനെ കുറിച്ച് അദ്ദേഹത്തോട് ചോദിക്കുമെന്നും പാര്‍ട്ടി അധ്യക്ഷന്‍ സാദിഖലി ശിഹാബ് തങ്ങള്‍ ഇറക്കിയ വാര്‍ത്താക്കുറിപ്പില്‍ പറയുന്നു.

ലീഗിലുണ്ടാകുന്ന ചെറിയ വിഷയങ്ങള്‍ പോലും വളരെ ഗൗരവത്തോടെയാണ് സിപിഎം കാണുന്നത്. ലീഗിനെ കൂടെ കൂട്ടാന്‍ കഴിയാതെ വന്നാല്‍ ലീഗിന്റെ അണികളില്‍ ആശയകുഴപ്പമുണ്ടാക്കി ചേരി തിരിക്കാനും സിപിഎം പ്ലാനിട്ടിട്ടുണ്ട്. ഈ ഭയം ലീഗിനെയും കോണ്‍ഗ്രസിനെയും അലട്ടുന്നുണ്ട്. ബിജെപിയുടെ വളര്‍ച്ച തടയാനും തുടര്‍ ഭരണത്തിനും സിപിഎം ന് ലീഗ് പോലെ മലബാര്‍ മേഖലയില്‍ സ്വാധീനമുള്ള കക്ഷിയുടെ ആവശ്യം ഏറിവരികയാണ്.