ആശ്രിതനിയമനം പരിമിതപ്പെടുത്താന്‍ ഒരുങ്ങി സര്‍ക്കാര്‍.... സര്‍ക്കാരുദ്യോഗസ്ഥര്‍ മരിച്ചാല്‍ ഒരു വര്‍ഷത്തിനകം ലഭിക്കുന്ന നിയമനങ്ങള്‍ സ്വീകരിക്കാന്‍ സമ്മതമുള്ള അപേക്ഷകര്‍ക്കു മാത്രമായി ആശ്രിത നിയമനം പരിമിതപ്പെടുത്താന്‍ സര്‍ക്കാര്‍ ഒരുങ്ങുകയാണ്. അതിന് കഴിയാത്തവര്‍ക്ക് 10 ലക്ഷം രൂപ ഒറ്റത്തവണ നഷ്ടപരിഹാരമായി നല്‍കണമെന്നാണ് ചീഫ് സെക്രട്ടറി തല സമിതിയുടെ ശുപാര്‍ശയിലുളളത്.

ആശ്രിത നിയമനം അതതു വകുപ്പിലുള്ള പി.എസ്.സി റാങ്കു ലിസ്റ്റിന്റെ അഞ്ചു ശതമാനത്തില്‍ കൂടരുതെന്നാണ് ഹൈക്കോടതിയുടെ ഉത്തരവ്. മുഖ്യമന്ത്രിയുടെ നിര്‍ദ്ദേശ പ്രകാരം, ഇക്കാര്യം ചര്‍ച്ച ചെയ്യാനായി ചീഫ് സെക്രട്ടറി ഡോ.വി.പി. ജോയി ഈ മാസം 10ന് ജീവനക്കാരുടെ സംഘടനകളുടെ യോഗം വിളിച്ചിട്ടുണ്ട്. ഓണ്‍ലൈനായിട്ടാകും യോഗം.


നിലവിലെ രണ്ടാം ശനിക്കു പുറമെ,എല്ലാ മാസത്തെയും നാലാം ശനിയും സര്‍ക്കാര്‍ ഓഫീസുകള്‍ക്ക് അവധിയാക്കണമെന്ന സമിതിയുടെ ശുപാര്‍ശയും സര്‍ക്കാരിന്റെ പരിഗണനയിലുണ്ട്. എന്നാല്‍ ഇതിന് പ്രവൃത്തി ദിനങ്ങളിലെ ജോലി സമയം വര്‍ദ്ധിപ്പിക്കേണ്ടതായി വരും.


5 ശതമാനമായി രേഖകളില്‍ ആശ്രിത നിയമനത്തിന്റെ തോത് പരിമിതപ്പെടുത്തിയെങ്കിലും അതില്‍ക്കൂടുതല്‍ നടക്കുന്നുണ്ടെന്നാണ് പതിനൊന്നാം ശമ്പളകമ്മിഷന്‍ വിലയിരുത്തുന്നത്. വര്‍ഷങ്ങള്‍ കഴിഞ്ഞാലും പലര്‍ക്കും ജോലി ലഭിക്കുന്നുമില്ല. ഇങ്ങനെ ജോലി ലഭിക്കുന്നവരെ സ്ഥാനക്കയറ്റത്തിന് പരിഗണിക്കുമ്പോള്‍ സ്‌ക്രീനിംഗ് ടെസ്റ്റ് നടത്തണമെന്നും കമ്മിഷന്‍ നിര്‍ദ്ദേശിച്ചു.

അതേസമയം ആശ്രിത നിയമനം പരിമിതപ്പെടുത്തുന്ന ഏത് നിര്‍ദ്ദേശത്തെയും എതിര്‍ക്കുമെന്ന് ഭരണ, പ്രതിപക്ഷ സംഘടനകള്‍ വ്യക്തമാക്കിയിട്ടുണ്ട്.