വിട പറഞ്ഞത് ഗ്രാമീണ സൗന്ദര്യം തുടിക്കുന്ന പാട്ടുകളിലൂടെ ആസ്വാദക ഹൃദയം കീഴടക്കിയ പ്രശസ്ത ഗാനരചയിതാവ്.... ഇന്ന് പൊതുദര്‍ശനത്തിന് ശേഷം നാളെ വീട്ടുവളപ്പില്‍ സംസ്‌കാരചടങ്ങുകള്‍ നടക്കും

പ്രശസ്ത ഗാനരചയിതാവ് ബീയാര്‍ പ്രസാദ് (62) വിടവാങ്ങി. മസ്തിഷ്‌കാഘാതത്തിന് രണ്ടു മാസമായി ചികിത്സയിലായിരുന്നു. ഇന്നലെ മൂന്നു മണിയോടെ ചങ്ങനാശേരിയിലെ സ്വകാര്യ ആശുപത്രിയിലായിരുന്നു അന്ത്യം. കവി, നാടക രചയിതാവ്, സംവിധായകന്‍, അവതാരകന്‍ എന്നീ നിലകളിലും ശ്രദ്ധേയനായിരുന്നു.ഭൗതിക ദേഹം ഇന്ന് വൈകിട്ട് നാലിന് മങ്കൊമ്പ് കോട്ടഭാഗം എന്‍.എസ്.എസ് കരയോഗം ഹാളില്‍ പൊതുദര്‍ശനത്തിന് വയ്ക്കും. വൈകിട്ട് 6ന് വീട്ടിലെത്തിക്കും. വെള്ളിയാഴ്ച ഉച്ചയ്ക്ക് ഒരു മണിക്ക് വീട്ടുവളപ്പില്‍ സംസ്‌കരിക്കും.


പ്രശസ്ത സോപാനഗായകന്‍ മങ്കൊമ്പ് മായാസദനത്തില്‍ പരേതനായ ബാലകൃഷ്ണപ്പണിക്കരുടെയും കല്യാണിക്കുട്ടി അമ്മയുടെയും മകനാണ്. ഭാര്യ: വിധു പ്രസാദ് (പുളിങ്കുന്ന് ഗ്രാമ പഞ്ചായത്തംഗം). മക്കള്‍: ഇള പ്രസാദ്, കവി പ്രസാദ്.

25ലേറെ സിനിമകള്‍ക്ക് ഉള്‍പ്പെടെ 200ലേറെ ഗാനങ്ങളെഴുതി. 'ഒന്നാംകിളി പൊന്നാണ്‍കിളി...., കേരനിരകളാടും ഒരു ഹരിത ചാരുതീരം.... എന്നിവ ബീയാറിന്റെ പ്രശസ്ത ഗാനങ്ങളാണ്. 50 വര്‍ഷത്തിനിടെ രചിക്കപ്പെട്ട മികച്ച പത്ത് കേരള തീം പാട്ടുകളിലൊന്നാണ് കുട്ടനാടിന്റെ സൗന്ദര്യം വിളിച്ചോതുന്ന 'കേരനിരകളാടും...' (ചിത്രം ജലോത്സവം). 2003ല്‍ പ്രിയദര്‍ശന്റെ 'കിളിച്ചുണ്ടന്‍ മാമ്പഴം' എന്ന ചിത്രത്തിലെ 'ഒന്നാം കിളി പൊന്നാണ്‍ കിളിയെന്ന' ഗാനത്തിലൂടെയാണ് ഗാനരചയിതാവായി അറിയപ്പെട്ടത്.


അതേസമയം ചലച്ചിത്ര ഗാനരചയിതാവ് ബീയാര്‍ പ്രസാദിന്റെ നിര്യാണത്തില്‍ മുഖ്യമന്ത്രി പിണറായി വിജയന്‍ അനുശോചിച്ചു. കേരളീയത നിറഞ്ഞുനിന്ന കവിതകളും ഗാനങ്ങളും കൊണ്ട് ശ്രദ്ധേയനായ എഴുത്തുകാരനായിരുന്നു ബീയാര്‍ പ്രസാദ്. മയയാളികള്‍ നെഞ്ചേറ്റിയ ധാരാളം സിനിമാ ഗാനങ്ങള്‍ അദ്ദേഹത്തിന്റേതായുണ്ട്. ഗാനരചയിതാവ്, നാടക രചയിതാവ്, സംവിധായകന്‍, പ്രഭാഷകന്‍, അവതാരകന്‍ എന്നീ നിലകളിലും ശ്രദ്ധേയനായിരുന്നു.

അദ്ദേഹത്തിന്റെ വിയോഗം സാംസ്‌കാരിക രംഗത്തിന് വലിയ നഷ്ടമാണെന്നും കുടുംബാംഗങ്ങളുടെയും സുഹൃത്തുക്കളുടെയും ദുഃഖത്തില്‍ പങ്ക് ചേരുന്നുവെന്നും അനുശോചന സന്ദേശത്തില്‍ മുഖ്യമന്ത്രി പറഞ്ഞു.