ഭക്ഷ്യ വിഷബാധയേറ്റ് നഴ്സ് മരിച്ച സംഭവം... ഹോട്ടലിലെ പാചകക്കാരനെ പോലീസ് അറസ്റ്റ് ചെയ്തു
കോട്ടയം മെഡിക്കല് കോളേജിലെ നഴ്സ് ഭക്ഷ്യ വിഷബാധയേറ്റ് മരിച്ച സംഭവത്തില് ഹോട്ടലിലെ പാചകക്കാരനെ പോലീസ് അറസ്റ്റ് ചെയ്തു. നഴ്സ് ഭക്ഷണം വാങ്ങിക്കഴിച്ച ഹോട്ടലിലെ മുഖ്യപാചകക്കാരനെയാണ് പോലീസ് അറസ്റ്റ് ചെയ്തത്. ഒളിവിലായിരുന്ന മലപ്പുറം സ്വദേശി മുഹമ്മദ് സിറാജുദ്ദീനാണ് പിടിയിലായത്. സിറാജുദീനെ മലപ്പുറം കാടാമ്പുഴയില് നിന്നാണ് പൊലീസ് അറസ്റ്റ് ചെയ്തത്. ഭക്ഷ്യവിഷബാധയേറ്റുള്ള രശ്മിയുടെ മരണത്തില് പൊലീസ് നരഹത്യക്ക് കേസ് രജിസ്റ്റര് ചെയ്തതാണ് അന്വേഷണം നടത്തിയത്. ഏറ്റുമാനൂര് കോടതിയില് ഹാജരാക്കിയ പ്രതിയെ രണ്ടാഴ്ചത്തേക്ക് റിമാന്ഡ് ചെയ്തു.
കോട്ടയം സംക്രാന്തിയിലുള്ള പാര്ക്ക് ഹോട്ടലിന്റെ അടുക്കള ഹോട്ടല് നിലനില്ക്കുന്ന സ്ഥലത്ത് നിന്നും ഒരു കിലോമീറ്റര് അകലെയാണ് ഒരുക്കിയിട്ടുള്ളത്. അടുക്കള കെട്ടിടത്തിന് നഗരസഭയുടെ ലൈസന്സില്ല. ഒരു മാസം മുമ്പും ഈ ഹോട്ടലില് നിന്ന് ഭക്ഷണം കഴിച്ചവര്ക്ക് ഭക്ഷ്യവിഷബാധയേറ്റിരുന്നു. അന്ന് നഗരസഭ ഹോട്ടലിന് നോട്ടീസ് നല്കിയെങ്കിലും തുടര്ന്ന് പ്രവര്ത്തിക്കുകയായിരുന്നു.
കോട്ടയം മെഡിക്കല് കോളേജിലെ നഴ്സായിരുന്ന രശ്മി കഴിഞ്ഞ മാസം 29 നാണ് സംക്രാന്തിയിലെ പാര്ക്ക് ഹോട്ടലില് നിന്ന് ഭക്ഷണം കഴിച്ചത്. പിന്നാലെ രശ്മിക്ക് ശാരീരിക അസ്വാസ്ഥ്യമനുഭവപ്പെട്ടു. ഒരു മണിക്കൂറിനുള്ളില് അവശയായ രശ്മിയെ ഉടന് ആശുപത്രിയില് പ്രവേശിപ്പിച്ചെങ്കിലും ജീവന് രക്ഷിക്കാനായില്ല. ഭക്ഷ്യവിഷബാധയെ തുടര്ന്ന് ആന്തരികാവയവങ്ങള്ക്ക് അണുബാധയുണ്ടായതാണ് രശ്മിയുടെ മരണത്തിലേക്ക് നയിച്ചതെന്ന് പിന്നീട് വ്യക്തമായി.
അതേസമയം, കഴിഞ്ഞ ദിവസം കാസര്കോട് ഭക്ഷ്യവിഷ ബാധയേറ്റ് പത്തൊന്പതുകാരിയായ പെണ്കുട്ടി മരിച്ച സംഭവത്തില് പെണ്കുട്ടിയുടെ മരണകാരണം ഭക്ഷ്യവിഷബാധയല്ലെന്ന് വ്യക്തമാക്കുന്ന റിപ്പോര്ട്ട് പുറത്തു വന്നു. പെണ്കുട്ടിയെ ചികിത്സിച്ച മംഗലാപുരം മെഡിക്കല് കോളേജിലെ ഡോക്ടര്മാരും പോസ്റ്റ്മോര്ട്ടം നടന്ന പരിയാരം മെഡിക്കല് കോളേജില ഡോക്ടര്മാരും രണ്ട് മെഡിക്കല് കോളേജില് നിന്നുമുള്ള വിവരങ്ങള് ശേഖരിച്ച കാസര്കോട്ടെ ഭക്ഷ്യസുരക്ഷാ ഉദ്യോഗസ്ഥരും ഭക്ഷ്യസുരക്ഷാ കമ്മീഷണര്ക്ക് നല്കിയ പ്രാഥമിക റിപ്പോര്ട്ടിലാണ് വിവരങ്ങള് വ്യക്തമാക്കുന്നത്.
ആന്തരികാവയവങ്ങളുടെ പ്രവര്ത്തനം തകരാറിലായതാണ് അഞ്ജുശ്രീയുടെ മരണത്തിന് കാരണമായതെന്നാണ് പോസ്റ്റ്മോര്ട്ടം റിപ്പോര്ട്ടില് പറയുന്നത്. വിഷം ഉള്ളിലെത്തിയാണ് മരണം സംഭവിച്ചതെന്നും എന്നാല് ഭക്ഷണത്തിലൂടെയല്ലെന്നും റിപ്പോര്ട്ടില് ചൂണ്ടിക്കാട്ടുകയാണ്. എന്നാല് ഏത് തരം വിഷമാണ് ഉള്ളില് ചെന്നതെന്ന് തിരിച്ചറിയാന് വിശദമായ രാസപരിശോധനാഫലം ലഭിക്കേണ്ടതായിട്ടുണ്ടെന്നും പ്രാഥമിക പോസ്റ്റ്മോര്ട്ടം റിപ്പോര്ട്ടില് വ്യക്തമാക്കുന്നുണ്ട്.
കൂടാതെ കോട്ടയം സംക്രാന്തിയിലുള്ള ഹോട്ടല് പാര്ക്കില് നിന്നും അല്ഫാം കഴിച്ചതിനെ തുടര്ന്ന് ഭക്ഷ്യവിഷബാധയേറ്റ് കോട്ടയം മെഡിക്കല് കോളജ് നെഫ്രോളജി തീവ്ര പരിചരണ വിഭാഗത്തില് ചികിത്സയില് കഴിയുന്ന യുവാവിന്റെ ആരോഗ്യ നില മെച്ചപ്പെട്ടു. ഇതിനെ തുടര്ന്ന് ഇദ്ദേഹത്തെ വാര്ഡിലേക്ക് മാറ്റുകയും ഗാന്ധിനഗര് പോലീസെത്തി യുവാവിന്റെ മൊഴി രേഖപ്പെടുത്തുകയും ചെയ്തു.
https://www.facebook.com/Malayalivartha