പരീക്ഷ എഴുതാന് അനുമതി നിഷേധിച്ചതിനെ തുടര്ന്ന് മലയാളി വിദ്യാര്ത്ഥി ജീവനൊടുക്കി
ചെന്നൈയില് പരീക്ഷ എഴുതാന് അനുമതി നിഷേധിച്ചതിനെ തുടര്ന്ന് മലയാളി വിദ്യാര്ത്ഥി ജീവനൊടുക്കിയ സംഭവം പുറത്തു വന്നിരിക്കുകയാണ്. കോഴിക്കോട് നടക്കാവ് സ്വദേശിയായ പത്തൊമ്പത് വയസ്സുള്ള മുഹമ്മദ് ആനിഖ് ആണ് മരിച്ചത്. ചെന്നൈ എസ്ആര്എം കോളജിലെ റെസ്പിറേറ്ററി തെറാപ്പി ഒന്നാം വര്ഷ വിദ്യാര്ത്ഥിയായിരുന്നു ആനിഖ്.
ഹാജര് കുറവെന്ന് പറഞ്ഞാണ് വിദ്യാര്ത്ഥിയെ കോളേജ് അധികൃതര് പരീക്ഷ എഴുതാന് അനുവദിക്കാതിരുന്നത്. രോഗബാധിതനായ ആനിഖിന് പലപ്പോഴും കോളേജില് പോകാന് സാധിച്ചിരുന്നില്ല. എന്നാല് ആനിഖ് പരീക്ഷയ്ക്ക് വേണ്ട എല്ലാ തയ്യാറെടുപ്പുകളും നടത്തിയിരുന്നു. പരീക്ഷയ്ക്കായി ഫീസും അടച്ചിരുന്നു. ഒന്നാം സെമസ്റ്റര് പരീക്ഷ തുടങ്ങാനിരിക്കെയാണ് സംഭവമുണ്ടായത്. പരീക്ഷാഫീസ് വാങ്ങിയിട്ടും പരീക്ഷയെഴുതാന് അനുവദിച്ചില്ലെന്നും ബന്ധുക്കള് ആരോപിക്കുന്നുണ്ട്.
ഇന്നലെ ഉച്ച തിരിഞ്ഞ് കോഴിക്കോട് നടക്കാവിലെ വീട്ടിലായിരുന്നു ആനിഖ് ജീവനൊടുക്കിയത്. പരീക്ഷയ്ക്കായുള്ള ഫീസ് അടച്ചിരിക്കുന്നതിനാല് ആനിഖ് പരീക്ഷ എഴുതാനുളള തയ്യാറെടുപ്പിലായിരുന്നു. എന്നാല് ഹാജര് കുറവെന്ന പേരില് പരീക്ഷ എഴുതാന് കഴിയില്ലെന്ന് അവസാന നിമിഷമാണ് കോളേജില് നിന്നും അറിയിപ്പ് വന്നത്.
ഇതിന് ശേഷം അനീഖ് കടുത്ത നിരാശയിലായിരുന്നെന്ന് ബന്ധുക്കള് പറയുന്നു. വീട്ടുകാര് ഒരു വിവാഹ ചടങ്ങിന് പോയ സമയത്തായിരുന്നു ആനിഖ് ജീവനൊടുക്കിയത്. വീട്ടിനുളളില് തൂങ്ങിയ നിലയില് കണ്ടെത്തിയ ആനിഖിനെ ബന്ധുക്കള് കോഴിക്കോട് സഹകരണ ആശുപത്രിയില് എത്തിച്ചപ്പോഴേക്കും മരണം സംഭവിച്ചിരുന്നു.
ശ്വാസം മുട്ടലിനെത്തുടര്ന്ന് ആനിഖിന് പലപ്പോഴും ക്ളാസില് പോകാന് കഴിഞ്ഞിരുന്നില്ലെന്ന് ബന്ധുക്കള് പറയുന്നു. ഇക്കാര്യം കോളജ് അധികൃതരെ അറിയിച്ചിരുന്നു. എന്നാല് പരീക്ഷ ഫീസ് വാങ്ങിയ ശേഷമാണ് 69 ശതമാനം ഹാജര് മാത്രമെ ഉളളൂ എന്നും പരീക്ഷ എഴുതാന് കഴിയില്ലെന്നും കോളജില് നിന്ന് അറിയിച്ചത്. ഇതോടെയാണ് ആനിഖ് കടുത്ത വിഷമത്തിലായത്. പരീക്ഷ എഴുതാന് കഴിഞ്ഞില്ലെങ്കില് ഈ സെമസ്റ്റര് നഷ്ടപ്പെടുമെന്ന് ഓര്ത്ത് വിദ്യാര്ത്ഥി വല്ലാതെ അസ്വസ്ഥനായിരുന്നുവെന്നും പറയുന്നു.
ഡിസംബര് പകുതിയോടെയാണ് ആനിഖ് കോളജില് നിന്ന് കോഴിക്കോട്ടെ വീട്ടില് അവധിക്കെത്തിയത്. ആസ്മ ഉള്പ്പെടെയുള്ള രോഗങ്ങള് ഉണ്ടായിരുന്നതിനാലാണ് ആനിഖിന് പലപ്പോഴും ക്ലാസില് കയറാന് കഴിയാതിരുന്നതെന്നും നാട്ടുകാരും മറ്റ് വിദ്യാര്ത്ഥികളും പറയുന്നു. എന്നാല് ഇന്ന് പരീക്ഷ തുടങ്ങാനിരിക്കുന്നതിനാല് ആനിഖ് ഇന്നലെ ചെന്നൈയിലേക്ക് മടങ്ങുമെന്നായിരുന്നു ആദ്യം വീട്ടുകാരോട് പറഞ്ഞിരുന്നത്.
എന്നാല് കൂട്ടുകാരെല്ലാവരും ചെന്നൈയിലേക്ക് പുറപ്പെടാനിരിക്കെ താന് പോകുന്നില്ലെന്ന് ആനിഖ് എല്ലാവരേയും അറിയിക്കുകയായിരുന്നു.
ബന്ധുക്കളുടെ പരാതിയില് നടക്കാവ് പൊലീസ് അസ്വഭാവിക മരണത്തിന് കേസെടുത്തു. ആനിഖിന്റെ മൃതദേഹം പോസ്റ്റുമോര്ട്ടത്തിനായി കോഴിക്കോട് മെഡിക്കല് ആശുപത്രി മോര്ച്ചറിയിലേക്ക് മാറ്റി.
https://www.facebook.com/Malayalivartha