മെട്രോ തൂൺ തകർന്നുവീണ് അമ്മയ്ക്കും മൂന്ന് വയസുള്ള മകനും ദാരുണാന്ത്യം. ബംഗളൂരുവിലെ നഗവാരയിൽ ഔട്ടർ റിംഗ് റോഡിൽ എച്ച് ആർ ബി ആർ ലേ ഔട്ടിൽ നിർമാണത്തിലിരുന്ന ബംഗളൂരു മെട്രോയുടെ തൂൺ തകർന്നുവീണതാണ് അപകടത്തിന് കാരണമായത്. ഈ സമയം റോഡിലൂടെ പോവുകയായിരുന്ന കുടുംബത്തിന് മേലേയ്ക്ക് തൂൺ തകർന്നുവീഴുകയായിരുന്നു. ഇന്ന് രാവിലെയായിരുന്നു സംഭവം.

തേജസ്വിനി (28), മകൻ വിഹാൻ എന്നിവരാണ് കൊല്ലപ്പെട്ടതെന്നാണ് പ്രാഥമിക വിവരം. അപകടത്തിന് പിന്നാലെ ഇവരെ ആശുപത്രിയിൽ പ്രവേശിപ്പിച്ചെങ്കിലും മരണപ്പെടുകയായിരുന്നു. സ്കൂട്ടർ ഓടിക്കുകയായിരുന്ന ഭർത്താവ് ലോഹിത് ഒപ്പമുണ്ടായിരുന്ന മകൾ എന്നിവർ ഗുരുതരമായി പരിക്കേറ്റ് ആശുപത്രിയിലാണ്. തേജസ്വിനിയും ലോഹിത്തും ഹെൽമറ്റ് ധരിച്ചിരുന്നുവെന്ന് ദൃക്‌സാക്ഷികൾ പറയുന്നു.

ബംഗളൂരു മെട്രോയുടെ ഫേസ് 2 ബിയുടെ നിർമാണം പുരോഗമിക്കുന്നതിനിടെയാണ് അപകടമുണ്ടായത്. വലിയ ഭാരമുള്ള ഇരുമ്പ് കമ്പികൾ നിലംപൊത്തി വീഴുകയായിരുന്നു. അപകടത്തെത്തുടർന്ന് പ്രദേശത്ത് വലിയ ഗതാഗതക്കുരുക്ക് അനുഭവപ്പെട്ടു. സംഭവത്തിൽ കേസ് രജിസ്റ്റർ ചെയ്ത് അന്വേഷണം ആരംഭിച്ചതായി അധികാരികൾ അറിയിച്ചു.