പ്രതീക്ഷയോടെ കേരളം..... ബഫര്‍ സോണ്‍ വിഷയത്തില്‍ ഇളവ് ആവശ്യപ്പെട്ട് കേന്ദ്ര സര്‍ക്കാര്‍ സമര്‍പ്പിച്ച ഹര്‍ജി ഇന്ന് സുപ്രീംകോടതി പരിഗണനയില്‍..... ഹര്‍ജിയില്‍ കക്ഷി ചേര്‍ന്ന കേരളം പ്രതീക്ഷയില്‍. സുപ്രീം കോടതിയുടെ കഴിഞ്ഞ വര്‍ഷം ജൂണ്‍ മൂന്നിലെ വിധിയില്‍ ഇളവു തേടിയാണ് ഹര്‍ജി.

വന്യജീവി സങ്കേതങ്ങള്‍ക്കും ദേശീയോദ്യാനങ്ങള്‍ക്കും ചുറ്റും ഒരു കിലോമീറ്റര്‍ വീതിയില്‍ ബഫര്‍ സോണ്‍ വേണമെന്ന വിധിയിലാണ് കേന്ദ്രവും കേരളവും ഇളവ് ആവശ്യപ്പെടുന്നത്.

ജനസംഖ്യയുടെ ആധിക്യവും സ്ഥലലഭ്യതയുടെ കുറവും കാരണം ആളുകളെ മാറ്റിപ്പാര്‍പ്പിക്കാനായി കഴിയില്ലെന്നാണ് സംസ്ഥാന സര്‍ക്കാര്‍ അപേക്ഷയില്‍ വ്യക്തമാക്കിയത്. മുതിര്‍ന്ന അഭിഭാഷകരുടെ നിയമോപദേശത്തിന്റെ അടിസ്ഥാനത്തിലാണ് കേന്ദ്രത്തിന്റെ ഹര്‍ജിയില്‍ കക്ഷി ചേരാന്‍ കേരളം അപേക്ഷ നല്‍കിയിട്ടുള്ളത്.


സ്റ്റാന്‍ഡിംഗ് കോണ്‍സല്‍ നിഷെരാജന്‍ ശങ്കര്‍ വഴിയാണിത്. സംസ്ഥാനത്തെ 17 വന്യജീവി സങ്കേതങ്ങള്‍, 6 ദേശീയോദ്യാനങ്ങള്‍ എന്നിവയ്ക്കുള്ള ബഫര്‍ സോണ്‍ സംബന്ധിച്ച രൂപരേഖ കേന്ദ്രസര്‍ക്കാരിനു നല്‍കിക്കഴിഞ്ഞതായും, വിധി നടപ്പാക്കിയാല്‍ മംഗളവനം പക്ഷിസങ്കേതത്തിന്റെ 200 മീറ്റര്‍ മാത്രം അകലെയുള്ള കേരള ഹൈക്കോടതിയെ ഉള്‍പ്പെടെ ബാധിക്കുമെന്നും ചൂണ്ടിക്കാട്ടിയിട്ടുണ്ട്.

അതേസമയം ബഫര്‍ ലോണ്‍ സംബന്ധിച്ച് ഇന്നലെ വരെ ലഭിച്ചത് 76,378 പരാതികളാണ്. ഇതില്‍ 40,444 പരാതികള്‍ പരിഹരിച്ചു. ഏറ്റവും കൂടുതല്‍ പരാതികള്‍ പരിഹരിച്ചത് മലബാര്‍ വന്യ ജീവി സങ്കേതത്തിലാണ്. ഇവിടെ ലഭിച്ച 5,526 പരാതികളില്‍ 5,466 ഉം പരിഹരിച്ചു. എന്നാല്‍ ഇന്നലെയും , സൈലന്റ് വാലി വന്യ ജീവ സങ്കേതത്തിന്റെ ഭാഗമായ പഞ്ചായത്തുകളില്‍ ലഭിച്ച പരാതികളില്‍ ഏറെയും പരിഹരിക്കാത്ത സ്ഥിതിയിലാണ്.