അട്ടപ്പാടി മധു കൊലക്കേസില്‍ സാക്ഷി വിസ്താരം ഇന്ന് അവസാനിക്കും. മജിസ്റ്റീരിയല്‍ അന്വേഷണം നടത്തിയ അന്നത്തെ ഒറ്റപ്പാലം സബ് കളക്ടര്‍ ജെറോമിക് ജോര്‍ജിന്റെ വിസ്താരത്തോടെയാണ് സാക്ഷി വിസ്താരം അവസാനിക്കുക.

രണ്ട് തവണ പ്രോസിക്യൂട്ടര്‍മാര്‍ മാറിയ കേസില്‍ 101 സാക്ഷികളെയാണ് വിസ്തരിച്ചത്. സാക്ഷി വിസ്താരം, സാക്ഷികളെ സ്വാധീനിക്കല്‍, കൂറുമാറ്റം, സാക്ഷി സംരക്ഷണ നിയമം നടപ്പിലാക്കല്‍, കൂറുമാറിയവരെ വീണ്ടും വിസ്തരിക്കല്‍, പുനര്‍ വിസ്താരത്തില്‍ മൊഴി തിരുത്തല്‍.

കോടതിയെ തെറ്റിദ്ധരിപ്പിച്ച സാക്ഷിയുടെ കണ്ണ് പരിശോധിപ്പിക്കല്‍, മധുവിന്റെ കുടുംബത്തെ ഭീഷണിപ്പെടുത്തല്‍, ഭീഷണിപ്പെടുത്തിയവരുടെ അറസ്റ്റ്, മജിസ്റ്റീരിയില്‍ റിപ്പോര്‍ട്ടിന്റെ തെളിവ് മൂല്യത്തര്‍ക്കം, അത് തയ്യാറാക്കിയവരെ വിസ്തരിക്കല്‍, തുടങ്ങി അസാധാരണ നടപടികള്‍ ഏറെയുണ്ടായിരുന്നു ഈ വിചാരണയില്‍. ഇവയ്‌ക്കെല്ലാമാണ് ഇന്ന് അവസാനമാകുന്നത്.

അതേസമയം 2022 ഏപ്രിലിലാണ് വിചാരണ നടപടികള്‍ തുടങ്ങിയത്. കോടതിയില്‍ രഹസ്യമൊഴി നല്‍കിയവര്‍ ഉള്‍പ്പെടെ 24 സാക്ഷികള്‍ കൂറുമാറിയിരുന്നു. മുപ്പതിലേറെ ഹര്‍ജികള്‍ വിവിധ രേഖകള്‍ കേസ് ഫയലിന്റെ ഭാഗമാക്കാനായി പ്രോസിക്യൂഷന്‍ സമര്‍പ്പിച്ചിട്ടുണ്ട്. സാക്ഷി വിസ്താരം കഴിയുമ്പോള്‍, ഒരു ചോദ്യം അപ്പോഴും ബാക്കിയുണ്ട്. സാക്ഷികളെ സ്വാധീനിക്കാനായി ഇടനില നിന്നവര്‍ക്ക് എതിരെ എന്ത് നടപടിയാണ് ഉണ്ടാകുക എന്നത്..