ആനാട് വേങ്കവിള വേട്ടമ്പള്ളി തവലോട്ടുകോണം നാല്‌സെന്റ് കോളനിയില്‍ ജീനാ ഭവനില്‍ സുനിതയെ (35) ചുട്ടെരിച്ചു കൊന്ന കേസിന്റെ വിചാരണയും അന്തിമവാദവും പൂര്‍ത്തിയായി. ജനുവരി 13ന് കേസിന്റെ വിധി പറയും. ആറാം അഡീഷണല്‍ സെഷന്‍സ് ജഡ്ജ് കെ.വിഷ്ണു മുമ്പാകെയാണ് വിചാരണ നടന്നത്. സുനിതയുടെ ഭര്‍ത്താവ് ജോയ് (43) എന്ന് വിളിക്കുന്ന ജോയി ആന്റണിയാണ് കേസ്സിലെ പ്രതി.

2013 ആഗസ്റ്റ് 3 നായിരുന്നു കേസിനാസ്പദമായ സംഭവം. ഒന്നാംപ്രതിയായ ഭര്‍ത്താവ് ജോയി ഭാര്യ സുനിതയെ ഒഴിവാക്കി മറ്റൊരു സ്ത്രീയെ വിവാഹം കഴിക്കുന്നതിനുവേണ്ടി മനപ്പൂര്‍വം സുനിതയുടെ മേല്‍ ആരോപണങ്ങള്‍ ഉന്നയിച്ച് ദേഹോപദ്രവം ഏല്‍പ്പിക്കുമായായിരുന്നു. കൃത്യദിവസം വൈകിട്ട് അഞ്ചുമണിയോടെ സുനിതയ്ക്ക് വന്ന ഫോണ്‍കോളില്‍ കുറ്റമാരോപിച്ച് മണ്‍വെട്ടിക്കൈ കൊണ്ട് സുനിതയുടെ ശരീരത്തിന്റെ പല ഭാഗത്തും അടിച്ച്,സുനിത ബോധരഹിതയായി വീടിനകത്ത് വീണപ്പോള്‍ വീട്ടില്‍ കരുതിയിരുന്ന മണ്ണെണ്ണ സുനിതയുടെ പുറത്തുകൂടെ ഒഴിച്ച് തീ പിടിപ്പിച്ച് കൊലപ്പെടുത്തി,തുടര്‍ന്ന് സുനിതയുടെ മൃതശരീരം 2013 ആഗസ്റ്റ് 6 വരെ ടി വീട്ടിലെ മുറിയില്‍ ഒളിപ്പിച്ച് വസ്ത്രങ്ങളും മറ്റും വാരിയിട്ട് കത്തിച്ച് മൃതശരീരത്തിന്റെ ഭാഗങ്ങള്‍ വീട്ടിലെ കക്കൂസിന്റെ സെപ്റ്റിക് ടാങ്കില്‍ വാരിയിട്ടും തെളിവ് നശിപ്പിച്ചു എന്നുള്ളതാണ് പ്രോസിക്യൂഷന്‍ കേസ്.

സംഭവത്തിനുശേഷം 2013 ആഗസ്റ്റ് 18ന് പ്രതിയെ നെടുമങ്ങാട് പോലീസ് അറസ്റ്റ് ചെയ്തിരുന്നു. നെടുമങ്ങാട് റവന്യൂ റിക്കവറി തഹദില്‍ദാര്‍ ബൈജുവിന്റെ സാന്നിധ്യത്തില്‍ സെപ്റ്റിക് ടാങ്ക് തുറന്നു പോലീസ് പരിശോധന നടത്തി. നാട്ടുകാരുടെ സാന്നിധ്യത്തില്‍ ടാങ്കിന്റെ മൂട് ഇളക്കി കുഴിയില്‍ ഇറങ്ങി തലയുടെ ഭാഗമാണ് ആദ്യം പുറത്തെടുത്തത്. തലയും ശരീരഭാഗങ്ങളും അഴുകി വേര്‍പെട്ട നിലയിലായിരുന്നു. കുഴിയിലുണ്ടായിരുന്ന സകല ശരീരഭാഗങ്ങളും പുറത്തെടുത്ത് ഫോറന്‍സിക് വിദഗ്ധരുടെ സാന്നിധ്യത്തില്‍ പരിശോധിച്ചു. ഒരു ചാക്കില്‍ കെട്ടാവുന്ന അവശിഷ്ടങ്ങള്‍ മാത്രമാണ് കുഴിയിലുണ്ടായിരുന്നത് പോസ്റ്റ്‌മോര്‍ട്ടത്തിനുശേഷം അവശിഷ്ടങ്ങള്‍ കോളനിയില്‍ മറവ് ചെയ്യുകയായിരുന്നു.