കലിപ്പ് തീരുന്നില്ല... സാങ്കേതിക സര്വകലാശാലയില് സിന്ഡിക്കറ്റും ബോര്ഡ് ഓഫ് ഗവര്ണേഴ്സും എടുക്കുന്ന തീരുമാനം ചട്ടവിരുദ്ധമോ എന്ന് പരിശോധിക്കാന് ഗവര്ണറുടെ നീക്കം; സമിതികള് എടുക്കുന്ന ചട്ടവിരുദ്ധ തീരുമാനങ്ങള് മരവിപ്പിക്കാനോ മാറ്റം വരുത്താനോ ചാന്സലര്ക്ക് അധികാരം
ഗവര്ണര് ആരിഫ് മുഹമ്മദ് ഖാന് ഒരിടവേളയ്ക്ക് ശേഷം വീണ്ടും കളത്തിലിറങ്ങുകയാണ്. ഗവര്ണറെ പരോക്ഷമായി തടയാനുള്ള ശ്രമത്തിനെതിരെ ആഞ്ഞടിക്കുന്നു. സാങ്കേതിക സര്വകലാശാലയില് സിന്ഡിക്കറ്റും ബോര്ഡ് ഓഫ് ഗവര്ണേഴ്സും എടുക്കുന്ന തീരുമാനം ചട്ടവിരുദ്ധമോ എന്ന് ചാന്സലര് കൂടിയായ ഗവര്ണര് ആരിഫ് മുഹമ്മദ് ഖാന് പരിശോധിക്കും. ചട്ട വിരുദ്ധമെന്നു ബോധ്യപ്പെട്ടാല് റദ്ദാക്കും.
വൈസ് ചാന്സലര് ഡോ.സിസ തോമസിന്റെ അധികാരത്തില് ഈ രണ്ടു സമിതികളും ഇടപെട്ടോ എന്നു പരിശോധിക്കും.വിസിയുടെ പ്രവര്ത്തനങ്ങള് നിയന്ത്രിക്കാന് സിന്ഡിക്കറ്റ് ഉപസമിതിയെ നിയോഗിച്ചതിനെപ്പറ്റിയും ഗവര്ണര്ക്കു വിസി അയയ്ക്കുന്ന കത്തുകള് സിന്ഡിക്കറ്റിന്റെ അംഗീകാരത്തിനു നല്കണമെന്ന തീരുമാനത്തെപ്പറ്റിയും വിസിയുടെ റിപ്പോര്ട്ട് ഗവര്ണര് പരിശോധിക്കും. സമിതികള് എടുക്കുന്ന ചട്ടവിരുദ്ധ തീരുമാനങ്ങള് മരവിപ്പിക്കാനോ മാറ്റം വരുത്താനോ ചാന്സലര്ക്ക് അധികാരമുണ്ട്. ആ തീരുമാനം എടുക്കുന്നതിനു മുന്പ് ബന്ധപ്പെട്ട സമിതിയുടെയോ ഉദ്യോഗസ്ഥരുടെയോ വിശദീകരണം വാങ്ങണം.
അതേസമയം യുജിസി ചട്ടം ലംഘിച്ചു നിയമനമെന്ന പേരില് ഗവര്ണര് കാരണം കാണിക്കല് നോട്ടിസ് നല്കിയ കുസാറ്റ് വൈസ് ചാന്സലര് ഡോ. കെ.എന്.മധുസൂദനന് തിരക്കിട്ട് അധ്യാപക നിയമനം നടത്തുന്നുവെന്ന് ആരോപിച്ചും അതു തടയണമെന്ന് ആവശ്യപ്പെട്ടും സേവ് യൂണിവേഴ്സിറ്റി ക്യാംപെയ്ന് കമ്മിറ്റി ഗവര്ണര്ക്ക് നിവേദനം നല്കി. 2018 സെപ്റ്റംബറില് മധുസൂദനനെ മുന്കാല പ്രാബല്യത്തോടെ പ്രഫസറായി നിയമിച്ചെന്നു കാണിക്കുന്ന രേഖയും അവര് പുറത്തു വിട്ടു. രാഷ്ട്രീയ സമ്മര്ദം മൂലമാണ് അസിസ്റ്റന്റ് പ്രഫസര്മാരുടെ നിയമനം തിരക്കിട്ടു നടത്താന് വിസി തയാറായതെന്ന് കമ്മിറ്റി ആരോപിച്ചു. 20 ന് മാത്തമാറ്റിക്സ് അസിസ്റ്റന്റ് പ്രഫസര്മാരുടെ ഇന്റര്വ്യൂ നിശ്ചയിച്ചിട്ടുണ്ട്. .
പ്രഫസര് പ്രമോഷന് രൂപീകരിച്ച സെലക്ഷന് കമ്മിറ്റി മധുസൂദനനെ സ്ഥാനക്കയറ്റത്തിന് അയോഗ്യനാണെന്ന് കണ്ടെത്തിയെന്നും അതവഗണിച്ച സിന്ഡിക്കറ്റ് മറ്റൊരു സിലക്ഷന് കമ്മിറ്റി രൂപീകരിച്ചു 2004 മുതല് മുന്കാല പ്രാബല്യത്തോടെ പ്രഫസറായി പ്രമോഷന് നല്കിയെന്നുമാണ് ആരോപണം.
മധുസൂദനന് 2004 മുതല് നല്കിയ പ്രഫസര് പ്രമോഷന് പുനഃപരിശോധിക്കണമെന്നും പിരിച്ചുവിടല് നോട്ടിസ് കൈപ്പറ്റിയ വിസി അധ്യാപക നിയമനം നടത്തുന്നത് തടയണമെന്നും സേവ് യൂണിവേഴ്സിറ്റി ക്യാംപെയ്ന് കമ്മിറ്റി ചെയര്മാന് ആര്.എസ്.ശശികുമാര്, സെക്രട്ടറി എം.ഷാജര്ഖാന് എന്നിവര് നിവേദനത്തില് ആവശ്യപ്പെട്ടു.
ഗവര്ണര് പുറത്താക്കിയതിനെതിരെ കേരള സര്വകലാശാല സെനറ്റംഗങ്ങള് നല്കിയ ഹര്ജികള് ഹൈക്കോടതി സിംഗിള് ബെഞ്ച് വീണ്ടും പരിഗണിക്കും. ഗവര്ണരുടെ നടപടി നിയമ വിരുദ്ധമാണെന്നും റദ്ദാക്കണമെന്നുമാണ് സെനറ്റംഗങ്ങളുടെ ആവശ്യം. എന്നാല് താന് നാമനിര്ദേശം ചെയ്ത സെനറ്റംഗങ്ങള് തങ്ങളുടെ ഉത്തരവാദിത്തം നിറവേറ്റുന്നതില് പരാജയപെട്ടതിനെ തുടര്ന്നാണ് പുറത്താക്കിയതെന്ന് ഗവര്ണര് നേരത്തെ കോടതിയെ അറിയിച്ചിരുന്നു.
ഗവര്ണര് നാമനിര്ദേശം ചെയ്തവരാണെങ്കിലും സ്വതന്ത്രമായ തീരുമാനം എടുക്കാന് സെനറ്റംഗങ്ങള്ക്ക് അവകാശമുണ്ടെന്ന് വാദം നടക്കവെ സര്ക്കാര് കോടതിയില് വ്യക്തമാക്കിയിരുന്നു. നിയമപ്രകാരം നോട്ടീസ് നല്കിയാണോ അംഗങ്ങളെ പുറത്താക്കിയതെന്ന കാര്യത്തില് ചാന്സലറായ ഗവര്ണറുടെ മറുപടി കോടതി തേടിയിട്ടുണ്ട്. അതേസമയം, കെടിയുവില് വിസിയെ നിയന്ത്രിക്കാന് സിന്ഡിക്കേറ്റ് ഉപസമിതിയെ വെച്ചതിനെ ചൊല്ലി തര്ക്കം രൂക്ഷമായിരിക്കുകയാണ്.
തീരുമാനമെടുത്ത സിന്ഡിക്കേറ്റ് യോഗത്തില് പങ്കെടുത്തെങ്കിലും മിനുട്സില് വിസി സിസ തോമസ് ഒപ്പിടാനിടയില്ല. കഴിഞ്ഞ ദിവസം ചേര്ന്ന കെടിയു സിന്ഡിക്കേറ്റ് യോഗത്തില് വിസി ഒറ്റപ്പെട്ട നിലയിലായിരുന്നു. സര്വകലാശാലകളുടെ ദൈനംദിന കാര്യങ്ങള്ക്ക് വിസിയെ സഹായിക്കാനെന്ന പേരിലാണ് പി കെ ബിജു അധ്യക്ഷനായി നാലംഗ ഉപസമിതിയെ വെച്ചത്. സര്ക്കാറിനെ മറികടന്ന് ഗവര്ണര് നിയമിച്ച സിസ തോമസിനെ നിയന്ത്രിക്കല് തന്നെയാണ് യഥാര്ത്ഥലക്ഷ്യം. ഇത് മുന്നില് കണ്ടാണ് ഗവര്ണറുടെ നീക്കം.
"
https://www.facebook.com/Malayalivartha
