ത്രിപുര, മേഘാലയ, നാഗാലാന്‍ഡ് സംസ്ഥാനങ്ങളില്‍ വരാനിരിക്കുന്ന തെരഞ്ഞെടപ്പില്‍ ആരൊക്കെ നേട്ടമുണ്ടാക്കും. നിലവിലെ സാഹചര്യത്തില്‍ കോണ്‍ഗ്രസിന് മൂന്നിടത്തും അധികാരത്തില്‍ തിരികെയെത്താനുള്ള സാധ്യതയില്ല. ത്രിപുരയില്‍ 2018ല്‍ സിപിഎമ്മിനെ ബിജെപി തൂത്തെറിഞ്ഞതോടെ അവിടെയും സാധ്യത ബിജെപിക്കു തന്നെ.

മേഘാലയത്തില്‍ എന്‍സിപിയെ പിന്തുണച്ച് ബിജെപി ഭരണം തുടരാനാണ് ഇനിയും സാധ്യത. നാഗാലാന്‍ഡിലും നിലവിലെ രാഷ്ട്രീയ സാഹചര്യത്തില്‍ കോണ്‍ഗ്രസിന് തിരിച്ചുവരവിനുള്ള സാധ്യത നന്നേ വിരളമാണ്. അടുത്ത ലോക്‌സഭാ തെരഞ്ഞെടുപ്പിനു മുന്നോടിയായി ഗുജറാത്തില്‍ നേടിയ അതേ വിജയം വടക്കു കിഴക്കന്‍ സംസ്ഥാനങ്ങളിലും നേടാനുള്ള ശക്തമായ പ്രചാരണമായിരിക്കും ബിജെപി നടത്തുക. താരമ്യേന ചെറിയ സംസ്ഥാനങ്ങളെങ്കിലും ലോക് സഭാ തെരഞ്ഞെടുപ്പിന് ഒരു വര്‍ഷം മാത്രം ബാക്കിനില്‍ക്കെ സംസ്ഥാനങ്ങളില്‍ നേട്ടമുണ്ടാക്കുക ബിജെപിയുടെ ലക്ഷ്യമാണ്.

സിപിഎം രണ്ടര പതിറ്റാണ്ടിലേറെ ഭരണം നടത്തിയിരുന്ന ത്രിപുര സംസ്ഥാനത്ത് ഇന്ന് സിപിഎമ്മിനെയും സിപിഎം പ്രവര്‍ത്തരെയും മഷിയിട്ടു നോക്കിയാലും കാണാനില്ല. പശ്ചിമ ബംഗാളില്‍ സംഭവിച്ചതുപോലെ ത്രിപുരയിലും സിപിഎമ്മിന് ഇനിയൊരു തിരിച്ചുവരവിന് സാധ്യതയില്ലാതായതോടെ ബിജെപി തുടര്‍ന്നും ഭരണം പിടിക്കാനാണ് സാഹചര്യങ്ങള്‍.

കോണ്‍ഗ്രസിന് അന്നും ഇന്നും ത്രിപുരയില്‍ വിലാസമില്ലാത്ത സാഹചര്യത്തില്‍ പ്രാദേശിക പാര്‍ട്ടികളുമായി സഖ്യമുണ്ടാക്കാനുള്ള സാഹചര്യം തുലോം കുറവായിരിക്കുന്നു. ഒരു മാസം മാത്രമാണ് മൂന്ന് വടക്കു കിഴക്കന്‍ സംസ്ഥാനങ്ങളിലെ തെരഞ്ഞെടുപ്പിന് ബാക്കിയുള്ളത്. ത്രിപുരയില്‍ ഫെബ്രുവരി 16ന് വോട്ടെടുപ്പ് നടക്കാനിരിക്കെ നിലവിലെ രാഷ്ട്രീയ സാഹചര്യങ്ങള്‍ക്കൊന്നും മാറ്റം വരാനുള്ള സാധ്യതയില്ല.
നാഗാലാന്‍ഡിലും മേഘാലയയിലും ഫെബ്രുവരി 27നാണ് വോട്ടെടുപ്പ് നടക്കുക.

മാര്‍ച്ച് രണ്ടിനായിരിക്കും മൂന്നു സംസ്ഥാനങ്ങളിലേയും വോട്ടെണ്ണല്‍. മൂന്നു സംസ്ഥാനങ്ങളിലെയും നിയസഭയുടെ കാലാവധി മാര്‍ച്ചിലാണ് അവസാനിക്കുന്നത്. മേഘാലയ, നാഗാലാന്‍ഡ് സംസ്ഥാനങ്ങളില്‍ നിലവിലുള്ള ബിജെപി സഖ്യസര്‍ക്കാരുകള്‍ ഗണ്യമായ നേട്ടമുണ്ടാക്കുമെന്നാണ് സൂചനകള്‍. മേഘാലയത്തിലും നാഗാലാന്‍ഡിലും കോണ്‍ഗ്രസിനുണ്ടായിരുന്ന സാധ്യതകളെല്ലാം അസ്തമിച്ചുകഴിഞ്ഞു. മാത്രവുമല്ല കോണ്‍ഗ്രസ് എന്ന പ്രസ്ഥാനത്തിന് പ്രവര്‍ത്തനമോ പ്രവര്‍ത്തകരോ ഇന്ന് ഇല്ലെന്നതാണ് വസ്തുത.
ഇടതുപക്ഷത്തിന്റെ രണ്ടര പതിറ്റാണ്ട് നീണ്ട ഭരണത്തിന് അന്ത്യം കുറിച്ചാണ് 2018ല്‍ ബിജെപി ത്രിപുര പിടിച്ചെടുത്തത്. ഇത്തവണയും ബിജെപിക്ക് ത്രിപുര സംസ്ഥാത്ത് കാര്യമായ പ്രതീക്ഷകളുണ്ട്. ത്രിപുരയില്‍ ഇടതുപക്ഷവും കോണ്‍ഗ്രസും തിരഞ്ഞെടുപ്പില്‍ സഖ്യമുണ്ടാക്കാനുള്ള സാധ്യത നിലനില്‍ക്കുന്നുണ്ടെങ്കിലും ബിജെപി ഭരണം തൂത്തെറിയാനുള്ള രാഷ്ട്രീയ സാഹചര്യങ്ങള്‍ നിലവിലില്ല.

2018ലെ തെരഞ്ഞെടുപ്പില്‍ 60 അംഗ ത്രിപുര നിയമസഭയില്‍ 36 സീറ്റുകളാണ് ബിജെപി നേടിയെടുത്തത്. കാലങ്ങളോളം ത്രിപുരയില്‍ ഭരണം നടത്തിയ സിപിഎമ്മിന് ലഭിച്ചതാവട്ടെ 16 സീറ്റുകള്‍ മാത്രം. കാല്‍ നൂറ്റാണ്ട് കോണ്‍ഗ്രസ് ഭരിച്ച സംസ്ഥാനമാണ് മേഘാലയ. 60 അംഗ നിയമസഭയില്‍ കോണ്‍ഗ്രസിന്റെ നില പരിങ്ങലിലാണ്. എന്‍സിപിയെ തരിപ്പണമാക്കി ഇനിയൊരു തിരിച്ചുവരവ് ഉടനെയൊന്നും കോണ്‍ഗ്രസ് പ്രതീക്ഷിക്കുന്നുമില്ല.

മേഘാലയില്‍ 2018ല്‍ കേവലം രണ്ടു സീറ്റില്‍ മാത്രമാണ് ബിജെപി ജയിച്ചതെങ്കിലും എന്‍പിപിയുമായി ചേര്‍ന്ന് ബിജെപി സര്‍ക്കാര്‍ രൂപീകരിക്കുകയായിരുന്നു. മുന്‍ ലോക്‌സഭാ സ്പീക്കറും മുന്‍ മുഖ്യമന്ത്രിയും പാര്‍ട്ടി സ്ഥാപകനുമായ പി.എ സാങ്മയുടെ മകന്‍ കൊണ്‍റാഡ് സാങ്മ മേഘാലയ്ത്തില്‍ മുഖ്യമന്ത്രിയായി. 2018ലെ തെരഞ്ഞെടുപ്പില്‍ നാഗാലാന്‍ഡിലെ 60 അംഗ നിയമസഭയില്‍ കോണ്‍ഗ്രസ് 21 സീറ്റുകള്‍ നേടിയെങ്കിലും അന്നു ഭരണമുറപ്പിക്കാനായില്ല.

2018ലെ തിരഞ്ഞെടുപ്പിനു മുന്‍പു രൂപീകരിച്ച നാഷണലിസ്റ്റ് ഡമോക്രാറ്റിക് പ്രോഗ്രസീവ് പാര്‍ട്ടി യും ബിജെപിയും ചേര്‍ന്ന സഖ്യമാണ് നാഗാലന്‍ഡില്‍ ഭരണം പിടിച്ചത്. അന്നു നടന്ന തെരഞ്ഞെടുപ്പില്‍ 12 സീറ്റുകള്‍ നേടി ബിജെപി ശക്തി തെളിയിച്ചിരുന്നു. വടക്കു കിഴക്കന്‍ സംസ്ഥാനങ്ങളിലെ പ്രചാരണത്തിന് നരേന്ദ്ര മോദിയും അമിത് ഷായും നദ്ദയും അടുത്തയാഴ്ച മുതല്‍ വിവിധ സംസ്ഥാനങ്ങളില്‍ പര്യടനം ആരംഭിക്കുകയാണ്. കോണ്‍ഗ്രസാവട്ടെ മൂന്നിടങ്ങളിലും പ്രാചാരണത്തിന് അനുയോജ്യരായ നേതാക്കളില്ലാതെ ആശങ്കയിലുമാണ്.