കെ.വി തോമസിന് ക്യാബിനറ്റ് പദവി... തീരുമാനത്തെ വിമര്ശിച്ച് കെ മുരളീധരന്
കോണ്ഗ്രസില്നിന്ന് പുറത്താക്കപ്പെട്ട മുതിര്ന്ന നേതാവും മുന് കേന്ദ്രമന്ത്രിയുമായ കെ.വി തോമസിനെ ക്യാബിനറ്റ് റാങ്കോടെ ഡല്ഹിയിലെ കേരളത്തിന്റെ പ്രത്യേക പ്രതിനിധിയായി നിയമിച്ചു. എ. സമ്പത്ത് വഹിച്ചിരുന്ന അതേ പദവിയാണ് കെ.വി തോമസിന് നല്കുന്നതെന്നാണ് മുഖ്യമന്ത്രി മന്ത്രിസഭാ യോഗത്തില് പറഞ്ഞത്. എന്നാല് നക്കാപ്പിച്ച കണ്ടു മറുകണ്ടം ചാടുന്നവര്ക്ക് കോണ്ഗ്രസില് ഇടമില്ലെന്ന് കെ. മുരളീധരന്.
കെ.വി. തോമസിന് ശമ്പളവും കേരളാഹൗസില് ഒരു മുറിയും കിട്ടുമെന്നും പരമസുഖമാണെന്നും മുരളീധരന് പരിഹസിച്ചു. കെ.വി. തോമസിനെ ക്യാബിനറ്റ് റാങ്കോടെ കേരളാ ഹൗസിന്റെ പ്രത്യേക പ്രതിനിധിയായി നിയമിക്കാനുള്ള തീരുമാനത്തെയാണ് മുരളീധരന് വിമര്ശിച്ചത്. ഈ കിട്ടുന്ന പദവിയിലൊന്നും വലിയ കാര്യമില്ലെന്നും മാനസീകമായി അവര്ക്ക് സമാധാനം കിട്ടുമെങ്കില് നല്ലകാര്യമാണെന്നും പറഞ്ഞു. കെ.വി. തോമസിന് ക്യാബിനറ്റ് പദവി നല്കാനുള്ള നീക്കത്തെ ബിജെപി സംസ്ഥാന അദ്ധ്യക്ഷന് കെ. സുരേന്ദ്രനും വിമര്ശിച്ചു. തോമസിന് ക്യാബിനറ്റ് പദവി നല്കേണ്ടതില്ലെന്നും സംസ്ഥാന സര്ക്കാര് കടം വാങ്ങി ധൂര്ത്തടിക്കുകയാണെന്നുമാണ് സുരേന്ദ്രന് പറഞ്ഞത്.
നേരത്തെ കേരളത്തിന്റെ പ്രതിനിധിയായി സമ്പത്തിനെ നിയമിക്കുമ്പോള് അദ്ദേഹത്തിന് ക്യാബിനറ്റ് റാങ്കും സ്വന്തമായി ഓഫീസും സ്റ്റാഫും താമസസൗകര്യവും അടക്കം നല്കിയിരുന്നു. കേന്ദ്ര സര്ക്കാരുമായുള്ള കേരള സര്ക്കാരിന്റെ ലെയ്സണ് ജോലികളാണ് പ്രത്യേക പ്രതിനിധിയുടെ മുഖ്യ ഉത്തരവാദിത്തം. എം.പി എന്ന നിലയിലുള്ള സമ്പത്തിന്റെ പ്രവര്ത്തിപരിചയം ഉപയോഗിക്കുന്നതിന് വേണ്ടിയാണ് പദവി എന്നാണ് മുഖ്യമന്ത്രി അന്ന് വ്യക്തമാക്കിയിരുന്നത്.
നിലവില് ഇതേ ജോലികള്ക്കായി കേരളത്തിന്റെ രണ്ട് പ്രതിനിധികള് ഡല്ഹിയിലുണ്ട്. ഒരു മുതിര്ന്ന ഐ.എ.എസ് ഉദ്യോഗസ്ഥന് കേരള ഹൗസ് കേന്ദ്രീകൃതമായി പ്രവര്ത്തിക്കുന്നുണ്ട്. കൂടാതെ മുന് നയതന്ത്ര ഉദ്യോഗസ്ഥന് വേണു രാജാമണിയും ഡല്ഹിയിലെ കേരളത്തിന്റെ പ്രത്യേക പ്രതിനിധിയാണ്. ഈ രണ്ട് പേര്ക്ക് പുറമെയാണ് കെ.വി തോമസിന്റെ നിയമനം. കെ.വി തോമസിന് പദവികള് നല്കാന് സാധ്യതകള് ഉണ്ടെന്ന് നേരത്തെ വാര്ത്തകള് വന്നിരുന്നു. സര്ക്കാരിന്റെ ഔദ്യോഗികമായ ഉത്തരവ് വരുന്നതോടു കൂടി മാത്രമാണ് കൂടുതല് വിവരങ്ങള് ലഭ്യമാകുകയുള്ളു.
https://www.facebook.com/Malayalivartha
