ഓരോ വകുപ്പിലെയും പദ്ധതി പ്രഖ്യാപനങ്ങള്‍ വിശദീകരിക്കുന്നതിനു പകരം വിവിധ മേഖലകളിലെ നയങ്ങള്‍ മാത്രം ചുരുക്കി അവതരിപ്പിക്കുന്നതാകും ഇത്തവണ ഗവര്‍ണറുടെ നയപ്രഖ്യാപനം. കാര്‍ഷികം, സേവനം, വ്യാവസായികം എന്നിങ്ങനെ മേഖലകള്‍ തിരിക്കും. ആരോഗ്യവും വിദ്യാഭ്യാസവും സേവനമേഖലകളിലുള്‍പ്പെടുത്തുകയും ചെയ്യും.

ആവര്‍ത്തനം ഒഴിവാക്കാന്‍ പ്രഖ്യാപനങ്ങള്‍ വിശദമായി ബഡ്ജറ്റില്‍ ഉള്‍പ്പെടുത്തിയാല്‍ മതിയെന്നാണ് ധാരണയായിട്ടുളളത്. പല വിഷയങ്ങളിലും സര്‍ക്കാരിനോട് ഇടഞ്ഞ ഗവര്‍ണര്‍ ആരിഫ് മുഹമ്മദ് ഖാനെ പ്രകോപിപ്പിക്കാതിരിക്കാനുള്ള കരുതലും നയപ്രഖ്യാപനത്തില്‍ നടത്തിയേക്കും.

കേന്ദ്രവിരുദ്ധ പരാമര്‍ശങ്ങള്‍ കഴിയുന്നത്ര ഒഴിവാക്കുമെങ്കിലും വായ്പാ പരിധി ഉയര്‍ത്താനായി അനുമതി നല്‍കാത്ത കേന്ദ്രസര്‍ക്കാര്‍ സമീപനങ്ങള്‍ക്കെതിരെ ലഘുവായ വിമര്‍ശനം ഉള്‍പ്പെടുത്തിയേക്കും.

സര്‍വകലാശാലാ വിഷയത്തിലാണ് ഗവര്‍ണര്‍ക്ക് പ്രധാനമായും എതിര്‍പ്പുള്ളത് എന്നിരിക്കെ, ഉന്നതവിദ്യാഭ്യാസമേഖലയിലെ വികസനത്തെ ആഗോളസാഹചര്യത്തിനനുസരിച്ചുള്ള പരിഷ്‌കാരമെന്ന നിലയിലാകും അവതരിപ്പിക്കുക. നയപ്രഖ്യാപനത്തിന്റെ കരട് ഇന്നലെ ചേര്‍ന്ന മന്ത്രിസഭായോഗം അംഗീകരിച്ചു.

കഴിഞ്ഞ വര്‍ഷം വകുപ്പുകള്‍ തിരിച്ച് 212 ഖണ്ഡികകളുണ്ടായിരുന്നത് ഇത്തവണ 192 ഖണ്ഡികകളാണുള്ളത്. പരമാവധി ഒന്നര മണിക്കൂര്‍ കൊണ്ട് ഗവര്‍ണര്‍ക്ക് വായിച്ച് തീര്‍ക്കാന്‍ കഴിയും.ഈ വര്‍ഷത്തെ സഭാസമ്മേളനം 23ന് ഗവര്‍ണറുടെ നയപ്രഖ്യാപനത്തോടെയാണ് ആരംഭിക്കുക.

തമിഴ്‌നാട്ടിലെ പോലെ ഗവര്‍ണറുമായുള്ള ഏറ്റുമുട്ടല്‍ വേണ്ടെന്ന മുഖ്യമന്ത്രി പിണറായി വിജയന്റെ തമാശരൂപത്തിലുള്ള ആമുഖത്തോടെയാണ് നയപ്രഖ്യാപനത്തിന്റെ കരട് ഇന്നലെ മന്ത്രിസഭായോഗം ചര്‍ച്ചയ്‌ക്കെടുത്തത്. ഗവര്‍ണറെ പ്രകോപിപ്പിക്കുന്ന പരാമര്‍ശങ്ങള്‍ ഒഴിവാക്കാമെന്നും അദ്ദേഹം പറഞ്ഞു. മന്ത്രിസഭായോഗം അംഗീകരിച്ച കരട് നയപ്രഖ്യാപനം അഞ്ചംഗ മന്ത്രിസഭാ ഉപസമിതി ഒരിക്കല്‍കൂടി ചര്‍ച്ച ചെയ്തശേഷമാകും അന്തിമരൂപത്തിലാക്കുക.