തിരുവനന്തപുരം പുളിയറക്കോണത്തെ ആന്‍വി സൂപ്പര്‍ മാര്‍ക്കറ്റ് തട്ടിപ്പിന് ഇരയായ നിക്ഷേപകന്‍ ജീവനൊടുക്കി. തട്ടിപ്പിനിരയായ പാലോട് സ്വദേശി അഭിലാഷാണ് ഈ മാസം നാലിന് ആത്മഹത്യ ചെയ്തത്. ആന്‍വി സൂപ്പര്‍ മാര്‍ക്കറ്റ്, ആന്‍വിഗോ ആപ്പ് എന്നിവയുടെ പേരില് സംസ്ഥാന വ്യാപകമായി 22 കോടിയുടെ വന്‍ തട്ടിപ്പാണ് നടന്നത്. ആന്‍വിയില്‍ അഭിലാഷ് ലക്ഷങ്ങള്‍ നിക്ഷേപിച്ചിരുന്നു.

മൈക്രോഫിനാന്‍സ് സ്ഥാപനത്തിലുണ്ടായിരുന്ന ജോലി രാജിവച്ചാണ് അഭിലാഷ് സ്വന്തമായി ബിസിനസ്സ് ചെയ്യാനായി നിക്ഷേപം നടത്തിയത്. ആന്‍വിഗോ ആപ്പിലൂടെ ഭക്ഷ്യ വസ്തുക്കള് വിതരണം ചെയ്യുന്ന സര്‍വ്വീസ് നേടാനാണ് ആറ് ലക്ഷം മുടക്കിയത്.

പലയിടത്തും നിന്നും കടം വാങ്ങിയ തുകയാണ് നിക്ഷേപിച്ചത്. പക്ഷെ സ്ഥാപന ഉടമയായ വി.എസ്.വിപിന്‍ നിക്ഷേപകരെ കബളിപ്പിച്ചു മുങ്ങുകയായിരുന്നു. കടക്കാരുടെ ശല്യം ഏറെ വന്നപ്പോള്‍ ആത്മഹത്യക്കുറിപ്പെഴുതിവച്ച് അഭിലാഷ് കഴിഞ്ഞ നാലാം തീയതി ജീവനൊടുക്കുകയായിരുന്നു.

അതേസമയം രണ്ടുമാസം മുമ്പ് ബെംഗളൂരുവില്‍ പിടിയിലായ സ്ഥാപന ഉടമ വി.എസ് വിപിന്‍ റിമാന്‍ഡിലാണ്. സംസ്ഥാന വ്യാപകമായി 22 കോടി തട്ടിച്ചെന്നാണ് ഇയാള്‍ക്കെതിരെയുളള കേസ്. പരാതിപ്പെട്ടവരുടെ മാത്രം കണക്കാണിത്.പുറത്ത് ഇക്കാര്യം പറയാത്തവര്‍ ഏറെയാണ്.