കുണ്ടറയില്‍ പൊലീസിനു നേരെ വടിവാള്‍ വീശി രക്ഷപ്പെട്ട പ്രതികളെ രണ്ടാം ദിവസവും പിടികൂടാനായില്ല. വടിവാള്‍ വീശി രക്ഷപ്പെട്ട പ്രതികളെ കണ്ടെത്താന്‍ വ്യാപക തെരച്ചിലാണ് രണ്ടാം ദിവസവും പൊലീസ് നടത്തിയത്. കുണ്ടറ, ശാസ്താംകോട്ട, ശൂരനാട്, പുത്തൂര്‍, ഈസ്റ്റ് കല്ലട എന്നീ സ്‌റ്റേഷനുകളിലെ 30 ഉദ്യോഗസ്ഥരാണ് തെരച്ചില്‍ സംഘത്തിലുള്ളത്.

പ്രതികള്‍ ഒളിവില്‍ കഴിഞ്ഞ കരിക്കുഴിയിലെ തുരുത്തുകളില്‍ പൊലീസ് ഇന്നും പരിശോധന നടത്തി. രണ്ടു സുഹൃത്തുക്കളെ പൊലീസ് കസ്റ്റഡിയിലെടുത്തു ചോദ്യം ചെയ്യുകയാണ്. പടപ്പക്കരയിലെ ആള്‍താമസം ഇല്ലാത്ത വീടുകള്‍ പൊലീസ് പരിശോധിച്ചു. കരിക്കുഴിയില്‍ പ്രതികള്‍ ഒളിവില്‍ കഴിഞ്ഞ വീടിന് സമീപമുള്ള കായലിലെ തുരുത്തുകളും ചതുപ്പ് നിറഞ്ഞ പ്രദേശങ്ങളിലും തെരച്ചില്‍ നടത്തി. വെള്ളിമണ് വഴി ഇവര്‍ രക്ഷപെട്ടിട്ടുണ്ടോ എന്നും പൊലീസ് സംശയിക്കുന്നുണ്ട്. പ്രതികള്‍ക്ക് സഹായം നല്‍കിയെന്ന് കരുതുന്ന രണ്ടു സുഹൃത്തുക്കളെ പൊലീസ് കസ്റ്റഡിയിലെടുത്ത് ചോദ്യം ചെയ്യുകയാണ്.

ഇന്നലെ പുലര്‍ച്ചയായിരുന്നു അടൂര്‍ റസ്റ്റ് ഹൗസ് മര്‍ദ്ദനക്കേസ് പ്രതികളായ ലൂയി പ്ലാസിഡിനെയും ആന്റണി ദാസിനെയും പിടികൂടാന്‍ ഇന്‍ഫോപാര്‍ക്ക് പൊലീസ് കുണ്ടറ കരിക്കുഴിയിലെത്തിയത്. എന്നാല്‍ പ്രതികള്‍ വടിവാള്‍ വീശി ഭീകരാന്തരീക്ഷം സൃഷ്ടിച്ച് രക്ഷപ്പെടുകയായിരുന്നു.

ഇന്‍ഫോപാര്‍ക്ക് സി ഐ 4 റൗണ്ട് വെടിവെച്ചാണ് പ്രതികളുടെ ആക്രമണത്തില്‍ നിന്നും രക്ഷപ്പെട്ടത്. വടിവാള്‍ വീശിയ പ്രതികളില്‍ നിന്നും രക്ഷപ്പെടാന്‍ ജീവഭയം കൊണ്ട് വെടിയുതിര്‍ക്കുകയായിരുന്നുവെന്നാണ് പൊലീസ് വാദം. ഇവരുടെ സുഹൃത്തായ ലിബിന്‍ വര്‍ഗീസിനെ ഇന്നലെ കുണ്ടറയില്‍ നിന്നും ഇന്‍ഫോപാര്‍ക്ക് പൊലീസ് പിടികൂടിയിരുന്നു. ഇക്കഴിഞ്ഞ 25 നാണ് ചെങ്ങന്നൂര്‍ സ്വദേശിയായ ലിബിന്‍ വര്‍ഗീസിനെ ഗുണ്ടാസംഘങ്ങള്‍ തമ്മിലുള്ള വൈരാഗ്യത്തില്‍ അടൂരിലെത്തിച്ച് ക്രൂരമായി മര്‍ദ്ദിച്ചത്.