ഓട്ടോയില്‍ തുപ്പിയ അഞ്ച് വയസുകാരന്റ വസ്ത്രം അഴിച്ച് ഓട്ടോ തുടപ്പിച്ച സംഭവത്തില്‍ പരാതിയില്ലെന്ന് കുട്ടിയുടെ അമ്മ. പരാതിയില്ലെന്നും ഓട്ടോ ഡ്രൈവര്‍ മാപ്പ് പറഞ്ഞെന്നും കുട്ടിയുടെ മാതാവ് വ്യക്തമാക്കി. എന്നാല്‍ വിഷയത്തില്‍ ഇടപെട്ട ബാലവകാശ കമ്മീഷന്‍ ചോമ്ബാല പൊലീസില്‍ നിന്നും റിപ്പോര്‍ട്ട് തേടി.

കുട്ടിയെ സ്‌കൂളിലേക്ക് കൊണ്ടുപോകുമ്പോഴായിരുന്നു സംഭവം. സ്‌കൂളിലേക്ക് പോകും വഴി കുട്ടി വണ്ടിയില്‍നിന്ന് പുറത്തേക്ക് തുപ്പുന്നതിനിടെ അബദ്ധത്തില്‍ തുപ്പല്‍ ഓട്ടോറിക്ഷയിലും ഡ്രൈവറുടെ ദേഹത്തേക്കും തെറിക്കുകയായിരുന്നു. ഇതുകണ്ട് കുഞ്ഞിപ്പള്ളി ഓട്ടോ സ്റ്റാന്‍ഡിലെ ഡ്രൈവറായ വിചിത്രന്‍ കോറോത്ത് കുട്ടിയെ വണ്ടിയില്‍ നിന്ന് പിടിച്ചിറക്കുകയും കുട്ടിയുടെ ഷര്‍ട്ട് അഴിപ്പിച്ച് തുപ്പല്‍ തുടപ്പിക്കുകയായിരുന്നു. മറ്റു കുട്ടികളുടെ മുന്നില്‍ വച്ചായിരുന്നു സംഭവം.

ഇതു കണ്ട കുട്ടിയുടെ മാതാവാണ് ദൃശ്യം മൊബൈല്‍ ഫോണില്‍ പകര്‍ത്തിയത്. സംഭവം സമൂഹ മാധ്യമങ്ങളില്‍ വൈറലായതോടെയാണ് ബാലാവകാശ കമ്മീഷന്‍ ചെയര്‍മാര്‍ കെ.വി മനോജ് കുമാര്‍ വിഷയത്തില്‍ ഇടപെട്ടത്.