നിമിഷനേരത്തില്‍ തകര്‍ന്നടിഞ്ഞെല്ലാം.... അമിതവേഗത കവര്‍ന്നെടുത്തത് രണ്ടു ജീവനുകള്‍, പത്തുലക്ഷത്തിലേറെ വിലയുള്ള ആയിരം സി.സി.യുടെ സ്‌പോര്‍ട്‌സ് ബൈക്കാണ് അരവിന്ദ് ഓടിച്ചിരുന്നതെന്ന് പോലീസ്, കൂട്ടുകാര്‍ക്കൊപ്പം കോവളം ബീച്ചിലെത്തി ഫോട്ടോയെടുത്ത ശേഷം തിരികെ വീട്ടിലേക്കു മടങ്ങവേയായിരുന്നു അപകടം

അമിതവേഗത്തില്‍ പാഞ്ഞുവന്ന ബൈക്ക് ഇടിച്ചുതെറിപ്പിച്ച സ്ത്രീ തല്‍ക്ഷണം മരിച്ചു. ബൈക്ക് ഓടിച്ചിരുന്ന യുവാവ് വൈകുന്നേരത്തോടെ ആശുപത്രിയില്‍ മരിച്ചു. പനത്തുറ തുരുത്തിക്കോളനി വീട്ടില്‍ എല്‍.സന്ധ്യ(53), പട്ടം പൊട്ടക്കുഴിയില്‍ പി.ഡബ്ല്യു.ഡി. റിട്ട. ഉദ്യോഗസ്ഥന്‍ ബിനുവിന്റെയും ഷൈനിന്റെയും ഏക മകന്‍ അരവിന്ദ്(23) എന്നിവരാണ് മരിച്ചത്.

ഞായറാഴ്ച രാവിലെ 7.45-ഓടെ കോവളം-തിരുവല്ലം ബൈപ്പാസില്‍ പാച്ചല്ലൂര്‍ തോപ്പടി ഭാഗത്തായിരുന്നു അപകടം നടന്നത്.ഇടിയുടെ ആഘാതത്തില്‍ റോഡിലെ ഡിവൈഡറിലേക്കു തെറിച്ചുവീണാണ് സന്ധ്യ മരിച്ചത്. സന്ധ്യയുടെ ഇടതുകാല്‍ മുറിഞ്ഞുമാറി റോഡില്‍ വീണു. തല പൊട്ടിയും കഴുത്തൊടിഞ്ഞുമാണ് ഡിവൈഡറിലെ കുറ്റിക്കാട്ടില്‍ മൃതദേഹം കിടന്നിരുന്നത്.

ഇടിച്ചശേഷം നിയന്ത്രണം തെറ്റിയ ബൈക്ക് മുക്കാല്‍ കിലോമീറ്റര്‍ അകലെ റോഡിലൂടെ നിരങ്ങിനീങ്ങിയാണ് ഓടയിലേക്ക് വീണത്. ഗുരുതരമായി പരിക്കേറ്റ അരവിന്ദിനെ ഉടന്‍തന്നെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.

കൂട്ടുകാര്‍ക്കൊപ്പം കോവളം ബീച്ചിലെത്തി ഫോട്ടോയെടുത്ത ശേഷം തിരികെ വീട്ടിലേക്കു മടങ്ങവേയായിരുന്നു അപകടം. വീട്ടുജോലിക്കു പോകുന്നതിനാണ് സന്ധ്യ രാവിലെ വീട്ടില്‍നിന്നിറങ്ങിയത്.

തോപ്പടി ഭാഗത്തുവച്ച് ബൈപ്പാസ് റോഡ് മുറിച്ചുകടക്കവേ കോവളം ഭാഗത്തുനിന്നു വന്ന ബൈക്ക് ഇടിച്ചുതെറിപ്പിക്കുകയായിരുന്നു. തിരുവല്ലം പോലീസ് കേസെടുത്തു.

അതേസമയം ഇപ്പോള്‍ ആഡംബര ബൈക്കുകളുടെ അമിതവേഗമുള്‍പ്പെടെയുള്ള കാരണങ്ങളാല്‍ കഴക്കൂട്ടം -കാരോട് ബൈപ്പാസില്‍ അപകടങ്ങള്‍ പതിവാകുകയാണ്. ഇത്തരം അപകടങ്ങളില്‍ ജീവഹാനിയുണ്ടാകുന്നതു പതിവായിട്ടും ആളുകളെ ഭയപ്പെടുത്തിക്കൊണ്ട് ആഡംബര ബൈക്കുകള്‍ ബൈപ്പാസിലൂടെ ചീറിപ്പായുന്നതു തുടരുന്നു.